Оларның тоғызы пӧзік паалалған
04.04.2025
Хабарлар
Хазна сыйыхтарына турысхан улус
Сыйыхтас. Киҷее, 3 хосхарда, республиканың правительство туразында Хакасия пазы Валентин Коновалов тоғыста пӧзік чидіглерге читкен улусха хазна сыйыхтарын читірген
Кибір хоостыра хазна сыйыхтары читірілер алнында Россияның паза Хакасияның гимннері ойнаан. Улуғ залдағы чон сах андох азах узына турыбысхан. Анаң сӧс алған Хакасия пазы Валентин Коновалов:
– Пӱӱн піс тоғыста тӱзімніг паза тіспен істенген кізілерге аарластығ сыйыхтар читірчебіс. Олар прайзы, тоғыста чахсы істеніп, чир-суубысха хозым иткеннер. Сірернің чидіглерің пасха кізілерні тоғыстарын ідӧк чахсы толдырарға кӧӧктiрче. Мин сірерні мындағ пӧзік чидіге читкенінең алғыстапчам.
Ӱс хосхарда хазна сыйиина тиксі сигіс кізі турысхан. Республиканың паза хазнаның халых чуртазында ӧткін араласчатхан ӱчӱн Россия президентінің алғыстазынаң таныхтатханнар Тиксі Россияның Чон фронты чӧрімнің Хакасиядағы пӧлиинің устағҷызы Ксения Лухман паза «Хакасский» заповедниктің устағҷызы Виктор Непомнящий. Тоғыста кӧп чыл тӱзімніг тоғынған ӱчӱн паза халых чуртаста ӧткін араласхан ӱчӱн «Хакасияның Iстеніс сабланызы» медаль Саяногорсктағы «Чаа палалары» халых организациязының кнезі Юрий Юровха читірілген. С.П.Кадышевтің адынаң чон чайаачызы кінінің устағҷызы Анна Шаламова республиканың культуразына хозым иткен ӱчӱн «Хакасия культуразының саблығ тоғынҷызы» атха турысхан. Паза Хакасия пазының холынаң Аарластығ пічіктернi халых деятельі Владимир Зимин, Россияның тимір чолының Ағбандағы пӧлиинің тоғынҷылары Татьяна Казакова паза Игорь Казаков, «Энергетическай оборудованиелернi паза таарлағ механизмнерні сыныхтиры паза экспертизазы» ООО-ның устағҷызы Надежда Косолапова алғаннар.
85 частығ Юрий Юров Хакасиязар 50 чыл мының алнында чуртирға кӧс килген. Ол чир-суубыстың иң саблығ пӱдіріглерінде кӧп чыл араласхан.
– Мин пістің республиканың иң улуғ пӱдіріглерінде араласханыма поғдархапчам. Сойан-Сус ГЭС-тың, Саяногорсктағы алюминий заводының пӱдіриинде араласхам. Гидростанцияда істеніп, мин партия комитедінең устап турғам. Ідӧк мағаа «Саянмрамор» комбинатта директорның орынҷызы поларға ӱлӱс тӱскен. Пӱӱн мин Саяногорсктағы «Чаа палалары» халых организациязынаң устапчам. Пістің ӧмее 1 муң 600 кізі кірче, – теен Юрий Васильевич.
Чон фронты чӧрімнің Хакасиядағы пӧлиинің устағҷызы Ксения Лухман Россия президентінің алғыстазын алғаны аның ӧмезінің тоғызы пӧзік синде таныхталчатханын киречілепче.
– Пістің тоғызыбысты Владимир Владимирович піди пӧзік паалапчатханы уғаа поғдархастығ. Піс чонның аймах ағырсымнығ сурығларынаң айғасчабыс. Ідӧк чааҷыларға гуманитарнай полызығ сыбыра чыыпчабыс. Ӱр ниместе штабты ӧртебіскеннерінде, піске амды хоза сидіксіністерні тобырарға килiсче. Че, андағ даа полза, піс тоғызыбысты тохтатпинчабыс. Чааҷыларға полызығ ідӧк чыыпчабыс. Піс ӧрт полған соонда даа Ағбанда орныхчатхан офизібістең кӧспеебіс.
Пістің ӧме пос кӱзінең тыхтағ тоғыстарын апарча. Піске прайзы полысча. Мин пістің чуртағҷыларға, идінҷектерге, аймах муниципалитеттернің устағҷыларына улуғ алғызым читірчем. Мындағ хыйаллығ кирек полған соонаң пістің чоныбыс уламох пірге тудынча, – теен Ксения Юрьевна.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
