Таңдағызына пӧгiннер
02.04.2025
Хабарлар
Хакасияның хазых хайраллаҷаң министрi Олег Ананьевский
Сан пирiс. Хакасия пазы Валентин Коновалов республиканың хазых хайраллаҷаң министрi Олег Ананьевскийнең тоғасхан. Олар профильлiг проекттер паза программалар чуртасха кирерiн паза хазых хайраллир системаны мыннаң мындар тилiдер пӧгiннернi ӱзӱргеннер
Регион правительствозының ӧӧн пӧгiннерiнiң пiрсi – чонның хазиин тыыдары, чуртағҷыларға имнег полызиин пирерiн чахсыландырары паза имненҷең оңдайлар тӧстирi.
Чыл сай регионның хазых хайраллаҷаң системазының тоғызына паза аның тилiзiне тиксi хорадығлар cинi хозылча. 2023 чылнаң тиңнестiрзе, пылтыр позыдылған ахча iкi миллиард салковайға кӧп пол парча. Пӱӱл бюджетте сидiксiнiстер полза даа, позыдылар ахчаның синi iдӧк хозыл парған.
Чыл салтарлары хоостыра Хакасияда пала тӧрiпчеткенi, хазнадағы паза Сибирьдегi ортымах саннарнаң тиңнестiрзе, пӧзiк синде. Пiстiң республика ол кӧзiдiмнерҷе СФО-да тӧртiнҷi орында турча. Ӱрепчеткеннернiң тиксi саны, Сибирьдегi федеральнай округты кӧрзе, тӧбiн. Iдӧк 2024 чылда ыңааҷахтарның ӱрепчеткенi иң асхынах полған. Ол танығлар хоостыра пiстiң республика СФО-да паза Россияда ортымах кӧзiдiмнерҷе тӧбiн синде.
Национальнай проекттерде паза федеральнай программаларда араласчатханы республиканың инфраструктураларын турыстығ тилiдерге, имнег тураларын паза поликлиникаларны амғы тусха килiстiре имнег оборудованиелерiнең тирiндiрерге оңдай пирче. Хакасияда 2019 чылдаң 2024 чылға теере 30 азыра имнег объектi пӱдiрiл парған, тиксi тыхтағ тоғыстары 150 азыра объектте идiл парған. Имнег учреждениелерiнде автопарк паза оборудованиелер нааҷылалғаннар. 2024 чылда Асхыста олған поликлиниказының пӱдiрии апарылған. Андағох поликлиникалар Ағбанда паза Харатаста пӱдiрiлчелер. Оларны пӱӱл тимге сығарары кӧрiлче. Республикадағы олған имнег туразының тиксi тыхтағ тоғыстары тоозыл парир. Федерация Чӧбi хабазиинаң Тадар Тис аалда модульлығ поликлиниканың пӱдiрии парча, аны iдӧк пӱӱл тимге сығарары кӧрiлче.
Президенттiң пастаанынаң пу чағында наа нацпроекттер чуртасха кирiлерiнҷе аннаң андар апарҷаң тоғыстар кӧрiл парған. Имнег киреенде кадрларның санын кӧдiрерiнҷе чардыхти тоғыстар апарылча. Пӱӱнгi кӱнде Хакасия правительствозы имнег тоғынҷыларына 14 хабазығ оңдайларын чуртасха кирче. Кӧзiдiмге, 2024 чылда ол пӧгiннерге 249,4 миллиард салковай позыдылған. Iдӧк амғы туста Сибирьдегi вузтарда 726 студент имнег ӱгредиин алча. Олар, тоозыбызып, Хакасияның имнег тураларынзар тоғынарға килерлер.
Олег Ананьевскийнiң искiриинең, Россияның хазых хайраллаҷаң министерствозынзар кӧстег хоостыра ӱгренчеткеннернiң санын ӧскiрерiнеңер сурыныс пiчии ызылған, чарадығ пирiлген. Хакасияа имнег киреене ӱгренерiне 200 азыра квота позыдылча. Iдӧк республиканың ӱгредiг паза наука министерствозында орындағы ӱгредiг учреждениелерiнде ортын имнег ӱгредиин аларына бюджет орыннарының санын хозар тоғыс апарылча. Пӱӱл 250 бюджет орны полары кӧрiлче. Ағаа хоза, наа кӧстеглер азылчалар: ол санда тiс имҷiлерiне паза лаборанттарға ӱгредерлер. Хакасия пазы Валентин Коновалов Олег Ананьевскийнi паза тиксi хазых хайраллаҷаң министерствоны 2024 чылда идiлген тоғыстары ӱчӱн алғыстаан, хай пiрее кӧстеглернi таныхтаан. Ӧӧнi – имнег учреждениелерiне кадрларны пирерi, республиказар имҷiлернiң хайиин тартары паза имнег тоғынҷыларын тимнепчеткен ӱгредiг учреждениелерiнде кӧстегҷе ӱгренчеткен орыннар санын ӧскiрерi. Хакасия пазы таныхтаан, имнег учреждениелерiнiң инфраструктураларын тилiдерiнҷе тоғысты узарадарға паза материально-техническай базаны нааҷылирға киректелче. Наа нацпроекттерге паза тӧстелген федеральнай программаларға ӧткiн кiрерге кӱстенерге кирек тiп таныхтаан.
Сом r-19.ru сайттаң
Автор :
Тимнеен Наталья Тюкпеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
