Хайызығлар тыыдылча
27.03.2025
Хабарлар
Тоғыс чорығы. Сергей Сокол паза Денис Мирошниченко Хакас Республиканың Ӧӧркі Чӧбі паза Луганск Чон Республиказының Чон Чӧбі аразында пірге тоғынардаңар чӧптезігде хол салғаннар
Пірге тоғынардаңар чӧптезігде хол салары Луганскта ирткен. Республиканың делегациязында – Хакасияның Ӧӧркі Чӧп кнезі Сергей Сокол, аның орынҷылары Михаил Молчанов паза Григорий Назаренко, ідӧк депутаттар Ольга Городкова паза Анастасия Кочергина.
Чӧптезігҷе удур-тӧдір опыттаң ӱлезері, прай хазна регионнарына теелчеткен закон сығарҷаң пастағларға хабазары, піcтің республикаларның чуртас-экономика тилізі сурығларын закон саринаң оңдайлирынҷа пірге тоғынары кӧрілче. Сергей Сокол чӧптезігде хол салғаны хоостыра сағыс-кӧрізінең ӱлезіп телеграмм-каналында пас салған:
«Лугансктағы піcтің арғыстарнаң хада пастағы ла чыл тоғынминчабыс, чӧптезігде хол салғаны піcтің хайызығларны юридическай оңдайнаң тыытханы полча. Пісті удурлааннарға, ЛНР-ның Чон Чӧбінің кнезі Денис Мирошниченкоға мероприятие матлама ирткені ӱчӱн алғызым читірчем».
Чӧптезігде хол салар алнында араласчылар «Олар Чир-суубысты ал халғаннар» монументсер чахайахтар салғаннар. Ол монумент пос кӧңнінең чааласханнарға – Луганск Чон Республиказының сарин алғаннарға – чарыдылған. Хумартхы тасты украин диверсанттары ікі хати чара чачыратханнар, 2016 паза 2017 чылларда. Че ол тур халған паза тыхталған.
Чӧптезігде хол салылған соонаң делегация Лугансктың пасха танығлығ орыннарында пол килген. Ол санда «Острая могила» хумартхылас комплексінде, чир-суғ ӱгренҷең музейде паза Чииттер туразында. Халғанҷызы национальнай проект хоостыра пӱдірілген. Ол килкім комплекс, анда чииттернең айғасчаң аймах-пасха площадкалар, ідӧк Россияның тархынынаң таныстырчатхан интерактивнай кӧзідіг залы пар.
«Ол чииттерні тартчатхан сын кін», – таныхтаан Григорий Назаренко сағыс-кӧрізінең ӱлезіп.
«Піс патриотизмге ӱгредердеңер удаа чоох апарчабыстар. Мында, Луганскта, піс пос хараанаң кӧріп алғабыс, наа чирлернің чуртағҷылары патриотизмге хайди сибер хайчалар. Піс нинҷе-де мемориал комплексінде пол килгебіс, сіліг паза уғаа чапсых интерактиванай музейнең танызып алғабыс, анда прай ниме Чир-суубысха хынарына чарыдылча», – чоохтаан Михаил Молчанов.
Сергей Сокол Луганскта СВО-дағы службазы тузында полған. Аның таниинаң, город нааҷылалча паза ӧсче. Амыр чуртас пӱдірілче. Тиксі 100 муң чуртағҷаа кӧрілген нинҷе-де чурт комплексі тӧстелген. Социальнай объекттер дее пӱдірілче.
«Піс, пілдіcтіг, чахсы оңдайнаң кӧмес атархапчабыс, мындағ локациялар, мындағ Чииттер туразы парына. Город тіріл килген, кізілер паза машиналар кӧп – ол амыр чуртас парча. Итсе хости, ырах ниместе нацисттернең кӱресчеткенібісті кӧзітчеткене киректер парох».
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
