Ӧкпелеріңні сыныхтаныбыс!
26.03.2025
Хабарлар
Сыныхтағ иртерге теес
Чӧрім. Республиканың ӧкпе ағырығлары диспансерi Хызыл кiрес комитедi тоғынҷыларынаң хада, Туберкулёзтаң тоғыр кӱресчең тиксi тилекейдегi кӱнге чарыдып, чуртағҷыларға флюорография иртiбiзер оңдай пиргеннер
Чуртағҷылар 24-25 кӧрiкте Ағбанда Белоярскай орамадағы 66-ҷы тура алнындағы ачыхта паза ӧӧн рынокта кӧс чӧрчеткен флюорограф машиназында сыныхтағ ирткеннер. Мындағ оңдай полған на кiзее пирiлген. Ӧӧнi сыныхтанчатхан кiзее паспортын алай кем полчатханын киречiлепчеткен пасха пічік алып аларға киректелген. Ӧӧн рынокта турчатхан флюорограф машиназында республиканың ӧкпе ағырығлары диспансерiнде iстенчеткен рентгенолаборант Ольга Разнова сыныхтағны иртiрген. Имҷi тоғызын пастир алнында аннаң чоохтазып алғабыс.
– Пӱӱнгi чӧрiм Туберкулёзтаң тоғыр кӱресчең тиксi тилекейдегi кӱнге чарыдылча. Ол iкi кӱн ирткен. Мин сыныхтағ иртерге килген кiзiнiң пiчiктерiнiң танығларын компьютерзер кир салчам, анаң ӧкпелернiң рентген сомын итчем. Прай ол танығлар минiң компьютерiмде полча. Идiлген сом хоостыра диспансердегi имҷiлер сыныхтағ иртiрчелер. Чуртағҷылар сыныхтағның салтарларын имҷі-терапевттең пiлiп аларлар. Ӧкпе ағырии сығысхан кiзiлернең палғалызып, оларға имнег туразынзар айланарға чахығ идiлче. Мин айланчатхан полған на кiзiнiң чуртапчатхан адрезiн пазып алчам, аннаңар оларнаң палғалысчаң оңдай пар полча, – чарытхан Ольга Разнова.
Кӧс чӧрчеткен флюорограф машиназының хыринда асхынах нимес кiзi чыылыс парған. Чуртағҷылардаң улуғ нимес теес пол парған, айланғаннарның аразында тынағдағылар паза тоғынчатханнар полғаннар. Iдӧк имҷiлернiң машиналарының хыринда Хызыл кiрестiң тоғынҷылары олаңай иртчеткен кiзiлернi сыныхтаныбызарға хығырғаннар. Оларның пiрсi – ВИЧ чуғынҷах паза туберкулёз ағырығлары профилактиказынҷа программаларның координаторы Юлия Казакова. Ол Хызыл кiрес комитедiнде 19-ҷы чылы iстен парир. Полған на сай Туберкулёзтаң тоғыр кӱресчең тиксi тилекейдегi кӱнде чуртағҷыларға ӧкпелерін сыныхтаныбысчаң чӧрім иртiрчелер. Аның кӧрiзiнең, прай чуртағҷыларға сыныхтағ ирт турарға киректелче, анзы, ағырчатханнарның санын ӧскiрбин, тузында имненiбізерге оңдай пирче.
– Пӱӱн республикадағы ӧкпе ағырығлары диспансерiнең хада пiс ӧкпелер сыныхтаан иртiбiзерге паза наа ла ағырарға пастапчатханнарға аны тузында iлезiне сығарып, имненерге пастирға оңдай пирчебiс. Сыныхтағ иртер кӧңнiліглер саны полған на сай кӧп полча. Пiс аймах социальнай сетьтерде, телевидениеде паза газеталарда искiрiглерні азынада сығарчабыс, тузында истiп, сыныхтағда аралассыннар тiп. Полған на чылда ортымахти пiрее 100-ке чағын кiзi сыныхтағ иртiбiсче. Ағырығны тузында имнеп пастааны кiзее чуртазын паза хазиин хайраллап аларға полысча. Полған на кiзi хазиина чахсы хайарға паза аны хайраллирға кирек. Ағырығны, тiзең, олаңай, пiр дее сидiк нимес сыныхтағлар полызиинаң iлезiне сығарарға чарир. Аннаңар прай чуртағҷыларны ӧкпелерiн сыныхтаныбызарға хығырчам. Чӧрімде аралазарға маңнанмаан ползаңар, имнег туразында флюорографияны иртiбiзерге чарир, – чоохтаан Юлия Казакова.
Чӧрімде аралазып, ӧкпелерiн сыныхтирға килгеннернiң аразында «8 № Мехколонна» ООО-ның электригi Антон Сунчугашев полған. Аннаң пу чӧрімнеңер хайди пiлiп алғаннаңар паза ноға килерге чарадыбысханнаңар сурғабыс.
– Тоғыста пiр кiзiнiң туберкулез ағырығ сығыс килген, аннаңар прайзыбысты сыныхтағ иртерге ызыбысханнар. Пiске, тоғысха сыхпин, мында рынок хыринда алай диспансерде сыныхтағ иртерге чахааннар. Амғы туста пiстiң организациядаң iкi кiзi килген, пасхалары Белоярскай орамазар парарға пӧгiнгеннер, – чоохтаан Антон Сунчугашев.
Сом Илона Каковани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
