Аалларны тилідері
26.03.2025
Хабарлар
Ӧӧркі Чӧп. Парламенттің эксперттері республиканың кічіг паза ыраххы аалларын тилідерінҷе наа программа тимнирін ӱзӱргеннер
Кічіг паза ыраххы аалларға хабазар наа оңдайлар тимнирге республика правительствозына чӧп пирген орындағы пос устанысча, халых пірігістерінҷе паза нациялар аразындағы хайызығларҷа эксперттер чӧбі. Андағ чирлернің орындағы чуртағҷылары пу пастағнаң сыхчалар.
Аалларда сығысчатхан ӧӧн сурығларны, кізілернең чоохтазып паза интернет пастыра сурастырығ апарып, чахсы істезерге паза иптирге республика правительствозына эксперттер чӧп пиргеннер. Алынҷа экономика тилізiнҷе министерстваа, хайзы кічіг аалларға мының алнындағы программаларның салтарларынаңар сан пиріс кӧзiткен. Олар аалларда чуртапчатхан чонның алынҷа кізілеріне социальнай тилісче, чурт пӱдірерінҷе, хырлар тыхтирынҷа хабазып, 2013 чылдаң 2021 чыл тоозылғанҷа тоғынғаннар.
Iдӧк 102 аалда 456 суғ алҷаң скважина хазылған, суғ пирҷең 15 сеть тыхталған. 65 аалда фонарьлар, санаҷаң приборлар турғызылған. Олған паза спорт площадкалары азылған. Социальнай паза культура объекттерi тикcі тыхталғаннар, материально-техническай база тыыдылған. Министерство искіриинең, тус иртчеткенде, ааллардаң пу сурығларҷа айланыстар саны хызырыл парыбысхан. Iдӧк хайди таныхталған, наа национальнай проекттер чуртасха кирілчеткенін санға алза, хазна программалары хатап толдырылчатханы кӧрiлче. Мының алнындағы программаларның пункттары нааларзар кӧзірілчелер. Че хайди таныхтапча парламенттің пос устанысча, халых пірігістерінҷе паза нациялар аразындағы хайызығларҷа комитедінің кнезі Роман Челтыгмашев, аалларда сидікciністер тоозыл парбааннар, оларны ам даа чахсы ӱзӱрерге кирек.
«Ам пірдеезі паза айланминчатса, анзы аалларда пір дее сидікciніс чоғылын таныхтабинча. Сидікciністіг сурығларны ілезіне сығарып, чуртастағы сын кирексінiстерні санға алып, наа программа тӧстирге кирек. Арса, аалда чирнең сурығлар пар, мал хадарар орыннар чидіспинче, сӧп-сапнаң сидікciністер сығысча. Кічіг аалларны піс ундут салчабыс».
Чон аразында сурастырығ иртірерге паза сидікciністіг сурығларны iлезіне сығарарға эксперттер чӧбі правительстваа пу чылның 1 кічіг хырлазына теере чӧп пирген. Чыылған искіріглерге тӧстелген наа программаны эксперттер чӧбі паза республика правительствозы тимнир. Аны 2026-2027 чылларда чуртасха кирерiн пастирға план тудылча.
Сом Хакасияның Ӧӧркі Чӧбінің хабарлар пӧлиини
Автор :
Хакасияның Ӧӧркі Чӧбі аппарадының искіріглер политиказынҷа пӧлии
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
