Крымнаң хадабыс!
21.03.2025
Хабарлар
Концерт тузында
Концерт. 18 кӧрікте Крым паза Севастополь Россияа хозылғанына чарыдылған «Піс хадабыс!» пайрамнығ концерт ирткен
Амғы Россияның тархынында 2014 чыл иң танығлығ полча тізе, саба полбас, неке. Андада пістің хазнаа Крымнаң Севастополь хозылғаннар нооза. Ол тустаң 11 чыл ирт парған полза даа, референдум киҷее ле полған осхас. Хайдағ ӧрініснең Россия чуртағҷылары наа чир-суғҷыларын удурлааннар! Тиктең нимес Крымнаң Севастополь айланғанын піс чыл сай алғым таныхтапчабыс.
Чӧрімде аймах учреждениелер араласчалар. Кӧзідімге, пӱӱл Олимп резерві училищезiнде (техникумында) студенттерге «Крымнаңар чоохтазығ» ойын ирткен. С.П.Кадышевтің адынаң чон чайаачызының национальнай кінi Ағбандағы 1 № школаның улуғ класстар ӱгренҷілеріне «Крымдағы часхы» тоғазығ тимнеен.
Че ӧӧн мероприятие Хакас филармониязында 18 кӧрікте полған. Чалахай иирге чон чахсы чыылысхан. Улуғ залда даа, балконда даа пос орын кӧрінминчеткен. Мероприятиені асханнар Ольга Васильеванаң Олег Гриценко. Кееркестіг ӱнніг ырҷылар, прай кӧңнілерін салып, «За тебя, Родина-мать» сарынны толдырғаннар. Ол «Любэ» ансамбльның ыры. Аны артисттер 2014 чылда Сочидегі Олимп ойыннарына удур чайап салғаннар. Кӧрігҷілер сарынның ӧӧн сағызынаң чарасханнар: Ада чир-суубыстаң аарлығ ниме чоғыл.
Чалахай иирде аарлығ аалҷылардаң чоох тутханнар Хакасия пазы Валентин Коновалов, Ӧӧркі Чӧп кнезі Сергей Сокол, Россияның журналисттер пірігізінің орындағы пӧлиинің кнезі Ольга Ширковец паза СВО-ның араласчызы, хирург Игорь Арчимаев. Кӧрігҷілер полғанын на ситкiп тыңнааннар. Пастап сӧс алған Валентин Коновалов. Хайди таныхтаан Хакасия пазы, Россиянаң Крым піріккені хазнаның кӱзін, піс пір чон чіли тудынчатханын киречілепче. Тӱрчедең амыр чуртас Донбасста полар тіп ікінҷілес чоғыл. Ол прай Россияның сағынған сағызы. Валентин Олеговичтің сӧстерін чыылған чон ізіг айа сабызынаң удурлаан. Сергей Сокол Севастополь аның тӧреен-ӧскен городы полча тіп таныхтаан. Чир-cуғҷылары пістің хазнаа хозылар ӱчӱн ӱннерін пирібіcкенде, Сергей Михайловичтің ӧрінгеніне харах частары аххан. Ӧӧркі Чӧп кнезі – офицернің оолғы, аның пабазы суғ алтынҷа чӱc чӧрҷең кимеде служба ирткен, ағазы Илбек Ада чаа тузында Севастопольны арачылаан.
Ольга Ширковец Крымда референдум хайди ирткенін сағысха кирген. 2014 чылда часхызын Хакасиядаң чарым олтырыхсар улуғ делегация чӧрген. Ээлер пістіңнерні уғаа чылығ удурлаптырлар. Ольга Валериановна Донбасстаң, аннаңар тӧреен чирінде полчатхан киректерні чӱреене чағын алча. Кӧрігҷілер хирург Игорь Арчимаевті чӱрексініп искеннер. Имҷі Украинада парчатхан ӧнетін чаа операциязында чуртастарын пир салған чааҷыларны сағысха кирерге сурынған. Аның пастаанынаң прай зал пір минута сым турған.
Концерттеңер чоохтаза, Хакас филармониязы чонға сыйых ит пирген тирге чарир. Ол кӱн Васильевадаң паза Гриценкодаң пасха, сценаа сыхханнар Артур Марлужоков, Анастасия Алексеева, Сергей Зибуков. «Саяночка» паза «Шейк» чайаачы ӧмелер, сіліг теелбектер толдырып, кӧрігҷілернің чӱреен кӧӧреткеннер. Сизінгенде, чалахай иирге ӧӧнінде амғы туста пазылған сарыннар таллалтыр. «Матушка» ырның авторы – Татьяна Куртукова. Ырҷы 1993 чылда тӧреен, кӧрігҷілерні сарыннаң 2022 чылда таныстырған. «Россия-Матушка» сарын Жасминнің репертуарынаң полтыр. Абахай артист аны 2013 чылдаң толдырча. Пicке Сергей Трофимовтың «Родина» ыры уғаа чӱрексініcтіг пілдір парған. Ольга Васильеваның паза Олег Гриценконың толдыриинаң на аның тирең сағызын оңарып алғабыс. Артур Марлужоков, «Белая лебедь» паза «Легендарный Севастополь» сарыннарны ырлап, кӧрігҷілерге кӧп ӧрініс сыйлаан. Пастағы ырны Леонид Дербенёвнаң Александр Флярковский пасханнар, ікінҷізін – Пётр Градовнаң Вано Мурадели. «Легендарный Севастополь» сарын 1994 чылдаң городтың гимні полча.
Чалахай иир пір тыныснаң ирткен. Итсе, концерт тузында пірее хакас сарын толдырылған полза, уламох чахсы поларҷых. Пылтыр мероприятиеде «Ӱлгер» ансамбль араластыр. Артисттерні пазох хығырып аларға чарир полған. Филармонияның солисттері репертуарларын амғы сарыннарнаң пайытчатханы ӧріністіг. Полған на тӧлге культураа позының ырларын хозарға кирек нооза.
Сом Илона Каковани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
