Сарын чоннарны пiрiктiрче
21.03.2025
Хабарлар
Ӱс республиканың эстрада сарыннарының пастағы фестивальының араласчылары
Фестиваль. С.П.Кадышевтiң адынаң чон чайаачызының национальнай кiнiнiң «АРОН» арт-резиденциязы «Тыва. Хакасия. Алтай» ӱс республиканың эстрада сарынының регионнар аразындағы фестивальын пастағызын на иртiрдi
Фестиваль Сойан-Алтай чоннарының культура палғалыстарын пиктирiне кӧстеглiг. Ол культура опыдынаң алызар, чоннар кибiрлерiнең чағын таныстырар, ӧбекелерiбiстең читкен кӧг-сарыннарны хайраллир паза харындас чоннарның амғы тустағы чайаачызын тилiдерге полызар ачых чiли тӧстелген. Iдӧк тӧстегҷiлерi фестиваль пастыра чоннарның культура ис-пайын хайраллир, чоннар аразындағы палғалыстарны, ынархасты паза оларның удур-тӧдiр пiлiсчеткенiн пиктир пӧгiннер турғысчалар. Мыннаң мындар аның, уламох кӧп регионнаң араласчыларны чыып, чыл сай иртiрiлерi кибiрге кiр парарына iзенiс пар.
Ӱс республика фестивальы iкi кӱн ирткен. Пастағы кӱнде аны Асхыстағы культура паза ӱтертiс кiнiнде пайрамни асханнар. Хайди таныхтапчалар «АРОН» арт-резиденцияда, фестивальны азар орын чiли Асхыс аймааның кiнi тиктең нимес таллалған. Аны республика культуразының паза кибiрлерiнiң «чӱрее» тiп адапчалар нооза.
Гала-концерт, тiзең, Ағбандағы чон чайаачызының национальнай кiнiнiң улуғ залында ирткен. Кӧрiгҷiлернi аның устағҷызы Анна Шаламова удурлаан. Таныхтирға кирек, Асхыста даа, Ағбанда даа Хакасияның паза хонҷых регионнарның ырҷыларын истерге кӧп кiзi чыылысхан. Концерттi «АРОН»-ның устағҷызы Хара Хусхун (Алексей Торбастаев) паза алтай, хакас, орыс тiллернең сарыннар толдырчатхан Айат Канысов апарғаннар.
Фестивальда чайаачы чолларын наа ла пастапчатхан ырҷылар паза саблығ, чон чахсы таныпчатхан артисттер араласханнар. Оларның санында Анита Чаптыкова, Елена Кызласова, Анастасия Иптышева, Ирина Кыжинаева, Аржан Тодош (Туденев), Алексей Кыжинаев, Владимир Мокану (Хакасия), Айана Темеева, Алтай Республиканың саблығ артизi Алан Темеев, Адель Баталов, Алия Кеберекова (Алтай), Тыва Республиканың саблығ артизi Омак Ооржак, Анчы Салчак, Сайын Дойур (Тыва) полғаннар. Iдӧк фестивальға ӧнетiн аалҷылар хығыртылғаннар: Кемеров облазындағы телеуттарның «Солоңы» («Тигiр хуры») чон ансамбльы паза Хакасияның чон артизi, Алтай Республиканың саблығ артизi Артур Марлужоков.
– Фестиваль уғаа чахсы, турыстыра ирттi. Аны кӧрерге кiзi кӧп кил парды, аның ӱчӱн прай кӧрiгҷiлерге улуғ алғызыбыс читiрчебiс. Аалҷылар уғаа чайаачы кiзiлер, кӧбiзiнең мероприятие алнында таныс полғабыс. Пiстi кӧрiп, олар пос чирлерiнде андағох фестиваль иртiрер сағыстарынаң ӱлескеннер. Чайғызын чонны iдӧк чыып кӧрерге пӧгiнчелер. Пiс позыбыстың саринаң аны иртiрерге полызарға, аннаң андар хада-пiрге тоғысты апарарға тимдебiс. Iдӧк Тыва, Алтай чоны Тимур Тюкпеевтi постарынзар хығырча, аймах мероприятиелернi тимнирiнде пiлiстерiнең ӱлессiн тiп. Ол уғаа чахсы режиссер, аның узы чылдаң чылға ӧзiп одырча.
Пiс, чайаачы кiзiлер, пiр тоғыс апарчабыс нооза, аннаңар пiске тiл алызарға оой. Мындағ фестивальлар опытнаң алызар, удур-тӧдiр хабазып, ӧзiп одырар оңдай пирче. Ӱс республика фестивальын Чыл пазы алнында иртiрерiн кибiрге кир саларға, аны алғыдарға сағынчабыс. Мындағ улуғ мероприятиелернi иртiрерге кӧп кӱс кирек, пӱӱнгi кӱнде пiс аны арт-резиденцияның на кӱзiнең иртiргебiс. Аннаңар мыннаң мындар, аймах гранттарда аралазып, хайдағ-да полызығ таап, фестивальны чуртасха кирерiн узарадарбыс, – ӱлескен сағыстарынаң Хара Хусхун.
«АРОН» арт-резиденция устағҷызының таниинаң, олар мындағ мероприятиелер, концерттер соонаң наа сарыннар сығарарға кӱстенчелер. Iди, кӧптең кӧп программа тимнеп, репертуарларын алғыдып одырчалар. Ирткен фестивальда наа сарыннар полғанох, кӧзiдiмге, рэп оңдайынаң толдырылған «Iҷедеңер» сарын. Че прай ла наа сарыннарны аның программазына кирер оңдай чох полтыр. Аннаңар оларны чайаачылар Чыл пазында иртер чииттер программазында чон алнына сығарарға пӧгiнчелер.
«Тыва. Хакасия. Алтай» ӱс республиканың фестивальы «Сарнаңар» сарыннаң тоозылған. Араласчылар аны ӱс тiлнең толдырғаннар. Анзы киречiлепче: сарын, хайдағ даа хырығларны тобырып, аймах чоннарны пiрiктiрче.
Сом «АРОН» арт-резиденцияни
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
