Пiстiң тӧреен чирiбiс – Россия!
21.03.2025
Хабарлар
Хакасия пазы Валентин Коновалов Илбек Ада чаа ветераны Николай Гнидовнаң хада
Тоғыс чорығы. Хакасия пазы Валентин Коновалов Харатас городсар тоғыс чорығынаң чӧрген. Анда ол Илбек Ада чаа араласчызынаң тоғасхан паза городтағы кӧп кӧстеглiг техникумда полған
Ветераннаң тоғазығ
Николай Владимирович Гнидов 1938 чылда Смоленск облазындағы Балбаш аалда тӧреен. Илбек Ада чаа пасталыбысханда, аның пабазы фронтсар хығыртылған, аннаң палығлат салып айланған. Итсе-де, Николай Владимирович позы даа, ыырҷының миназына орта пол парып, палығлатхан.
Чаа тоозылғаннаң илееде чыл ирт парғанда, чиит оол Николай, чазыда таарығ тоғыстарын апарчатханда, фашисттiң миназына орта пол парған. Аның ит-сӧӧгiне 17 ух кизегi кiрген. Палығлатхан соонаң амға теере Николай Гнидов аннаң ирееленче, II группа кинегi полча.
Хакасиязар ол хаҷанох кӧскен. Харатастың пiр транспорт предприятиезiнде водитель полып тоғынған. Инструктор даа, механик тее поларға килiскен. Харатастағы шахтада даа iстенерге ӱлӱс тӱскен. «Чир-суум хайдар ысчаң, андар тоғынарға парҷаңмын. Чуртирың килчетсе, сiренерзiң» тирге хынча ол. Амды ол чалғысхан чуртапча. Хада хонғаны хаҷанох ӱреен, чалғыс оолғы iдӧк. Улуғ частығ ағаның соонҷа аның танызы Надежда Ивановна кӧрче. Аннаңар аның ибiнде арығ, истiг паза iзiг чиис хаҷан даа пар.
– Пос чирiне хынарға кирек, – таныхтаан улуғ частығ ирен. – Мин Хакасиязар хаҷанох кӧскем, миннең Cмоленсксер, тӧреен чирiңзер, тартылбинчазың ма тiп удаа сурчалар, мин оларға тiпчем: «Пiстiң прайзыбыстың тӧреен чирiбiс – Россия, мин ибдебiн».
Пу наада Хакасия пазы Валентин Коновалов, Харатас чуртағҷызынаң тоғазып, ағаа Илбек Чиңiстiң 80 чылына чарыдылған медаль паза кинде читiрген.
– Валентин Олегович, алғыс Сiрерге, пiс осхас олаңай кiзiлерзер ааллап килчеткен ӱчӱн. Мин Сiрернi улуғлапчам. Пiр хати, Сiрернiң алныңар алып, хонҷығымнаң матап таласхам. Ол регион устағҷызы чиит кiзi полчатханына хомзынған, мин ағаа чииттернiң кӱзi пар, олар чапчаңнар, тоғынзыннар, улуғ частығлар тынанзыннар теем, – айланған Николай Гнидов республика пазынзар.
«О ветеранах» федеральнай закон хоостыра Николай Владимирович Гнидов Илбек Ада чаа араласчызына тиңнелче.
Техникум
40 азыра чыл Харатастағы кӧп кӧстеглiг техникум регионға кирек специалисттернi тимнепче. Ӱр ниместе «Имнег кирее», «Стоматология профилактическая» паза «Формация» специальностьтар азылған. Студенттерге пӧзiк пiлiс пирер ӱчӱн, лабораторияларзар имнег киреене киректелчеткен прай ниме-ноо алылған, iңелердең пасти манекеннерге теере. Мында студенттернi пастағы имнег полызиин пирерге, уколлар турғызарға, кардиограмма идерге паза пасха даа кӧп нимее ӱгретчелер.
Кӧп кӧстеглiг техникумның «Имнег кирее» лабораториязы
Техникумда медсестраларны тимнепчелерӧк. Лабораториялар iдӧк прай оборудованиелiг. Пу кӧстеге кiрерге сағынчатханнарның аразында чыл сай улуғ таллағ иртче. Пiр бюджет орнына 20-ҷе кiзi полча, неке. Медсестра ӱгредиин алғаннар имнег учреждениелерiнде ле нимес, iдӧк косметологиянаң палғалыстығ тоғыстарда iстенчелер.
Техникум «Акушерство» кӧстегҷе лицензия алған, пӱӱл пастағы абитуриенттернi сағыпча. Ол санда кӧстеглiг оңдайҷа. Аннаң пасха, техникум чыл сай ас-тамах устарын, механиктернi паза пасха даа устарны сығарча.
Техникум студенттерi нинҷе-де чыл изере «Профессионалы» чемпионаттың региондағы чардығының араласчылары полчалар. Республиканың ортын профессиональнай ӱгредiг учреждениелерi иптелчеткенде, андар ӧнетiн оборудование алылчатханда, студенттер марыға прай саринаң чахсы тимненiп алчалар.
Хакасия пазы Валентин Коновалов техникум лабораторияларын пӧзiк паалаан паза регион экономиказына кирек специалисттернi тимнепчеткен ӱчӱн алғызын читiрген. Халғанҷызында регион пазы, СПО-ның ӧмезiнең тоғазып, сурығларға нандырған. Техникум ӱгретчiлерiн паза тоғынҷыларын социальнай объекттер тыхтиры, имнег кирее, чиит сӧбiрелерге хабазары, экология паза пасха даа сурығлар сағыссыратчалар.
Сомнар Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
