Сағыста ӱрге халарға кирек
21.03.2025
Хабарлар
Чыылығ тузында
Чыылығ. Пу наада республиканың ӱлгӱ туразында чағдапчатхан Илбек Чиңiстiң 80 чылын таныхтирына тӧстелген оргкомитеттiң теестегi чыылии ирткен
Чыылығны асчадып, Хакасия пазы Валентин Коновалов прайзын сизiндiрген: Илбек Чиңiстiң 80 чылы таныхталчатса, иң пастап чаа араласчыларына, оларның ипчiлерiне, сӧбiрелерiне, тыл тоғынҷыларына, чаа палаларына, Ленинград хурчаанда полғаннарға, кiчiгде концлагерьзер кiр парғаннарға, кiчiг чаалазығларда араласханнарға, CВО махачыларына хайығ айландырыларға кирек.
Илбек Чиңiстiң 80 чылын Хакасияда алғым таныхтирына тимнеглiг тоғыс 2024 чылда пасталған. Аннаңар республика правительствозының министерстволары паза ведомство-комитеттерi постарының алнында хайдағ нандырығлығ пӧгiннер турчатханын чахсы пiлчелер, танығлығ пайрамны пӧзiк синде иртiрiбiзерге маңат тимнен саларға харасчалар. Мындағ чыылығлар тузында сан пирiс итчелер, хоза чахығлар алчалар. Пӧгiннернi чуртасха кирерге харазарлар.
Мында даа кирек андағох оңдайнаң парған. Iди республиканың iстенiс паза социальнай арачыланыс министрi Татьяна Раменская Илбек Ада чаа ветераннарына, оларның ипчiлерiне, чаа палаларына хайдағ сыйыхтар тимнелгеннеңер искiрген. Пу тоғысты сӧӧ тартпас ӱчӱн, кӧрiк айынаң сығара андағ сыйыхтар пирiп пастабыстылар. Татьяна Николаевнаның сӧcтерiнең, Хакасияда тыл тоғынҷылары паза чаа палалары илееде. Оларның полғаны ла хайығ кирексiпче.
Андағох оңдайнаң чоох тутхан хазых хайраллаҷаң министр Олег Ананьевский. Олег Васильевичтiң сӧcтерiнең, Илбек Ада чаа ветераннары саны Хакасияда пис кiзi. Улуғ частығлар, аннаңар хайзы даа имҷiлер хайиин кирексiпче. Оларның хазии сыбыра хайығда тудылча. Iдӧк имҷiлер хайиинда тыл iстенҷiлерi, чаа палалары. Кирек полза, теестегi диспансеризацияны ибде иртчелер. Сағам андағ оңдайлар пар.
Прайзының хайиин тартхан Хакасияның ветераннар чӧбiнiң кнезi Галина Трошкинаның сӧcтерi. Галина Алексеевна пайрамға тимнелчеткен хол часыларынаңар чоох апарған. Хакасиязар олар ызылтырлар, че читкiҷе нимес. Хоза чахирға килiзер сурығны пӧгiбiссе, чарирҷых теен ол.
Паза Галина Трошкинаны Хакасиядағы, ӧӧнiнде Ағбандағы харындас сыыраттары сағыссыратча. Ағбанда андағ сыыраттар пiр ле нимес. Тыл тоғынҷылары, чаа палалары, олаңай даа чуртағҷылар харындас сыыраттарында чыылған чаа араласчыларының сӧӧктерiнзер ӱлӱкӱн тузында чағын кiр полбинчатхан осхастар – кiзi най кӧп хайынча.
Ағаа хоза, пiстiң республикада, тиксi хазнабыстағы чiли, 9 сiлкерде машиналар колонназы Хакасияҷа чӧрче. Галина Алексеевнаның чӧбiнең, чарабас па оларға пiр машина хозыбызарға, андар баннер турғыс саларға, «Совет Союзының Матыры» аарластығ атха турысханнарның паза ӱс степеньнiг Слава орденiн алғаннарның сомнарын андар чапсыр саларға. Ыраххы аалларда чуртапчатхан улуғ-кiчiглер кӧрiп алзыннар, телефонға суурзыннар хан тӧгiлiстiг чааның махачы араласчыларын, чир-суғҷыларыбысты.
Республиканың культура тоғынҷылары Илбек Чиңiстiң 80 чылын хайди алғым таныхтирға тимненчеткеннеңер, аал-городтарда хайдағ ойыннар турғызыл турардаңар чарыда чоохтап пирген Хакасияның культура министрiнiң пастағы орынҷызы Ирина Браим. Ирина Викторовнаның сӧcтерiнең, иң чахсы чайаачы ӧмелер 9 сiлкерде кӱн тооза Ағбанның аймах орыннарында ойыннар турғызарлар. Городтың ӧӧн ачығында аал-городтардаң килген пос кӧңнiнең ойыннар турғысчатхан ӧмелер кӧрiгҷiлернi постарының устарынаң ӧрiндiрерлер.
Ағбанның ӧӧн ачығында Чиңiс кӱнiнде чааҷылар паза чаа техниказы хайди иртердеңер хысхаҷахти искiр пирген Анатолий Яцутко, Хакасияның мобилизация тоғызынҷа паза хазна чазыттарын хайраллирынҷа хазна комитедi кнезiнiң тоғызын толдырчатхан устағҷы. Аның араласчыларына килiстiре кип-азах тiгiл партыр. Че Анатолий Валентиновичтiң сӧcтерiнең, пӱӱл парад араласчылары пiр колоннаа кӧп полар – CВО араласчылары парадта аралазарға сурынып алғаннар. Олар алынҷа колоннанаң парарлар. Пiрдең, CВО-да чааласчатхан кип-азахтығ поларлар.
Пӱӱл «Ӧлiмi чох полктың» чӧрiмiн иртiрерге чаратпинчалар, ӱлӱкӱн амыр иртер ӱчӱн. Че городта баннерлер турғызылар, хайда полған на чуртағҷы паба-ағаларының, хайзылары чаада араласханнар, сомнарын iл салар оңдай полар. Ол киректеңер искiрген «Россияның ӧлiмi чох полкы» халых чӧрiмiнiң Хакасиядағы пӧлиинiң устағҷызы Тамара Сосновская. Тамара Геннадьевна тиксi хазнабыста тараан «Пабалар махачызы – оолларының ханаттары» чӧрiм iдӧк «Ӧлiмi чох полктың» чардығына тиңнелче теен. Халғанҷы туста ол алғым тарап сыхты.
– Илбек Чиңiстiң 80 чылына чарыдылған пайрам Хакасияның прай чуртағҷыларының сағызында ӱрге халарға кирек, – таныхтаан Хакасия пазы Валентин Коновалов, оргкомитеттiң теестегi чыылии тоозылчатханда. Олох арада Валентин Олегович CВО араласчыларын сыбыра хайығда тударға чахаан.
Cом Дмитрий Сунчугашевти
Автор :
Анатолий Султреков
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
