Iкi улуғ фуралығ – Донбассар
19.03.2025
Хабарлар
Людмила Круговых гуманитарнай полызығ чыыпчатхан пунктта
СВО-ға полызығ. Ӧнетiн чаа операциязында араласчатхан пiстiң чааҷыларыбысха гуманитарнай полызығ чыыпчатхан Ағбандағы пункттаң теестегi полызығ Донбассар ызылған
Ӧнетiн чаа операциязы пасталғаннаң анда араласчатхан пiстiң чааҷыларға гуманитарнай полызығ тӧремiл ызылча. Аны тимнеп ызарында сыбыра араласчалар Хакасия правительствозы, Ӧӧркi Чӧбi, город-аймахтардағы хазна учреждениелерi, ӱгредiг заведениелерi, халых пiрiгiстерi, идiнҷектер, спонсорлар, волонтёрлар паза хайдағ-да полызығ идерге сағынчатхан олаңай чуртағҷылар. Прайзын адирға даа сидiк.
Амғы гуманитарнай полызығны апарарға складтар алнындағы площадкада iкi улуғ фура турыбысхан. Олар онарлап тонна таарлағ апарарлар. Пу теестегi полызығны СВО зоназынзар ызарға тимнееннер республиканың Ӧӧркi Чӧбiнiң депутаттары паза Ада чир-суубыс чааҷыларының сӧбiрелерi комитедiнiң региондағы пӧлии.
Улуғ фураларға волонтёрлар таарлааннар «Буханка» адалчатхан УАЗ автомобильлернi (оларға чааҷылар чол чох таа орыннарҷа чӧр полчатхан ӱчӱн хынчалар), мотоцикллернi, пiр улуғ «Урал» машинаны, пилот чох учухчаң аппараттарны (дроннарны), генераторларны, автомобиль тегiлектерiн, тимiр пестернi, газ балоннарын, гигиена ниме-ноозын, чылығ кип-азахты, фрукттарны паза пасха даа ас-тамахты. Iдӧк чааҷыларға олғаннар пасхан пiчiктер ызылчатханнар. Чуртағҷылар, пу кiнзер килiп, постарының туған-чағыннарына посылкалар тимнепчеткеннер. Коробкаларда олар чааҷы служба апарчатхан чаа частьының номерiн, адрезiн паза адресаттың ады-солазын пас салчатханнар.
Таныхтирға кирек, ызылчатхан таарлағда музыка тирiглерi, караоке осхас аппараттар учурапчатхан. Прай нимелернi адап полбассың, пiр сӧснең, чааҷыларға киректелчеткен прай даа ниме-ноо ызылча. СВО-дағы пiстiң чир-суғҷыларыбыс постары ниме киректелчеткенiн сурчалар. Аннаңар гуманитарнай полызығны чыырында республиканың город-аймахтарының кӧп чуртағҷызы араласча.
Хайди таныхтаан Ӧӧркi Чӧп кнезiнiң орынҷызы, «Единая Россия» фракцияның устағҷызы Денис Кабанов, ӧнетiн чаа операциязы пасталғаннаң сығара Хакасия Ӧӧркi Чӧбiнiң депутаттары полызығ чыырында паза тимнирiнде араласчалар. Ам Ада чир-суубыс чааҷыларының сӧбiрелерi комитедiнең хада 30 азыра тонна гуманитарнай полызығ тимнеп салғаннар. Ол санда СВО араласчыларына ибде тимнеен посылкалар ызылчалар. Мин Сергей Михайлович Соколны (ол пу полызығны чыырынаң устаан), депутаттарны паза пiстiң чааҷы чир-суғҷыларыбыстаңар сыбыра сағыссырапчатхан Хакасияның чуртағҷыларын алғыстирға сағынчам. Мындағ хада-пiрге тоғыс прайзыбысты пiрiктiрче.
Чааҷыларға ам ызылчатхан гуманитарнай полызығ Хакасия чааҷыларынаң пасха, ДНР-ның паза ЛНР-ның чуртағҷыларына парар.
Iдӧк Ӧӧркi Чӧптiң экологияҷа, чир-чайаан ис-пайынҷа паза чир-чайааннаң тузаланарынҷа комитедiнiң кнезi Ольга Городкованың чооғынаң, олар Горловкадағы олған туразының палаларынаң хаҷаннаң ынағласчалар. Оларға ӧнетiн ойнаҷахтар чыындыларын, чайаачы ойыннар чыып пиргеннер. Андағы палаларға мындағ посылкалар сыбыра ыс турарға кӱстенчелер.
Гуманитарнай полызығ чыылчатхан пунктта таарлағ тоғызынаң устап парчатхан Ада чир-суубыс чааҷыларының сӧбiрелерi комитедiнiң (КСВО) Хакасиядағы пӧлиинiң устағҷызы Людмила Круговых искiрген:
– Пу гуманитарнай полызығны чыырында комитеттiң город-аймахтардағы пӧлiктерi араласханнар. Таарлағ чааҷыларның сурыныстарынҷа чыылған, iдӧк пiс чааҷыларға ибде тимнелген посылкаларны чыып алғабыс. Олар прай чааҷыларға кӧнiзiнең читiрiлерлер. Таарлағ апарчатхан фуралар пазағы неделяда Донецксер чидерлер, аннаң андар Хакасияның чааҷылары чааласчатхан орыннарзар таарлағ тарадылар. Пiс позыбыс андар самолёттығ чидербiс, Донецкте фураларны пiс паза Хакасия пазының чӧпчiзi Сергей Комаров удурлирбыс. Таныхтирға кирек, Сергей Комаров анда тӱзiмнiг тоғыс апарча.
Мында iдӧк Людмила Круговыхтың тоғызын таныхтир сағыс пар. Ол чиит хакас ипчi, кӧп палалығ iҷе, Россия Матыры Аймир Миягашевтiң чағын туғаны, Хакасияны сабландырған олаңай кӱресче спорт узы Иосиф Уксековтың хызы полча, Таштып аалда чуртапча. Ӧнетiн чаа операциязы зоназынзар пiстiң чааҷыларға гуманитарнай полызығны позы кӧп хати апарған.
Хакасияда КСВО пӧлии 2023 чылдаң тоғын сыххан, Людмила Круговых пастап КСВО-ның Таштып аймаанҷа пӧлиинең устаан, амды ол прай Хакасияҷа пӧлиинiң устағҷызы полча. Хайди ол чоохтапча, Донбассар гуманитарнай полызығ ыс турары – ол комитет тоғызының чардығы ла. Аның ӧӧн пӧгiнi – СВО чааҷыларына паза оларның сӧбiрелерiне полызары. Комитетсер хараа-кӱнӧрте аймах сурығларҷа сығдыратчалар. Нандырығ уғаа пӧзiк, синiң полызииң кемге-де сыбыра киректелче. Синнең полызығ сағыпчалар, iзенчелер.
Комитеттiң штабтары иң ӧткiн тоғынчалар Ағбанда, Саяногорскта, Таштып, Пии, Асхыс, Шира, Орджоникидзе аймахтарында. Комитетте тоғынчатхан пiрее ипчiлер постарының чағыннарын СВО-да чiдiр салғаннар. Штабтар волонтёр пiрiгiстерiнең, халых тоғынҷыларынаң, олаңай чуртағҷыларнаң хада-пiрге тоғынчалар. Пiреезi чӱленҷең сетьтер палғапча, пасхазы окоп свечiлерiн тимнепче, чылығ носкилер палғапча. Посылкаларны кӧнi комитетсер ағыларға чарир, олар прай кӧзiдiлген адрестерҷе читiрiлчелер.
Таарлағ тимнепчетсе, пiс чааҷылар сурыныстарын толдырарға кӱстенчебiс...
Мындағ тыс пiлбес, ӧткiн чиит ипчiдеңер мыннаң даа кӧп ниме чоохтирға чарир. Аның аллығ чӱрее сылтаанда пiстiң чааҷыларыбысха, оларның сӧбiрелерiне кӧп ниме идiлче.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
