Пӱдiрiглер тимге сых парир
19.03.2025
Хабарлар
Хакасиядаң сығара Хазна Думазының депутады Николай Шульгиновха Асхыстағы олған поликлиниказында турғызылған имнег оборудованиезін кӧзітчелер
Нацпроекттер. Хазна Думазының депутады Николай Шульгинов Хакасиядағы нацпроекттерҷе апарылған социальнай объекттер пӱдіриин паалаан
Хакасиядаң сығара Хазна Думазының депутады Николай Шульгинов, тоғыс чорығынаң киліп, республикадағы социальнай объекттер пӱдірии хайди парчатханынаң танысхан. Пу хати ол ветераннар пансионадына хоза пӱдiрiлчеткен корпуста паза Асхыстағы олған поликлиниказының наа туразында пол килген. Депутатха полған на пӱдiрiгде тоғыстар хайди парчатханнаңар, хайдағ сидіксіністер парынаңар паза оларны пӧгіп алҷаң оңдайлардаңар чарыда чоохтап пиргеннер.
Республиканың ветераннар пансионадына пӱдірілген хоза корпуста істіндегі тоғыстар паза вентиляция системазын турғызары тоозылча. Улуғ частығ кізілернің чуртазына истіг оңдайлар тӧстиріне паза имнег полызығларын чахсы пиреріне алынҷа хайығ салылча. Наа корпус улуғ тӧлнің чуртазын чахсыландырарына кӧcтелген «Демография» национальнай проект полызиинаң пӱдірілген.
Чорыхтың паза пір ӧӧн чардығы – Асхыстағы пір сменада 200 пала кир полар наа олған поликлиниказы. Ол учреждение аалдағы имнег инфраструктуразын тилідерінде уғаа кирек пӧгінні толдырар. Имнег учреждениезі «Хазых хайраллиры» национальнай проект хоостыра пӱдірілген. Николай Шульгинов пӱдірігҷілернең паза регионның хазых хайраллаҷаң министерствозы кізілерінең хада объектті кирек оборудованиенең тиріндірер паза аның тоғызы тохтағ чох апарылар сурығларны ӱзӱрібіскен. Алынҷа хайығ, ыраххы аалларның чуртағҷыларына имнег полызиин пирер ӱчӱн, пеер транспорттығ чидіп алар сурыға салылған.
– Амғы туста поликлиниканың туразы толдыразынаң пӱдіріл парған паза азыларына тимде. Че аны тузаланысха киреріне хоза оборудование алары киректелче. Садығлар пӧлии киректелчеткен оборудованиее пасха оңдайларны ӧткін тілепче. Пістің ӧӧн кӧстеебіс – ізестіг паза хап-орта тоғынчатхан приборлар алары, хайзылары пiлдiрiглерi хоостыра пасха хазналарда сығарылғаннардаң соона халбастар, – искірген «Тиксі пӱдіріг устанызы» Хакас Республиканың хазна казеннай учреждениезiнiң кізізі Денис Задирейко.
Тоғыс чорығының салтарларынҷа объекттерні тузаланысха кирерін айныдыбызарынҷа, ілезіне сығарылған сидіксіністерні пӧгерінҷе паза региондағы хазых хайраллаҷаң учреждениелернің тоғызын тӱзімніг идерінҷе чӧптер тимнелер.
Сом r-19.ru сайттаң
Автор :
Екатерина Труш
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
