Сан пирiстер
19.03.2025
Хабарлар
Хакасияның ЖКХ паза энергетика министрi Максим Виноградов республика пазы Валентин Коноваловха 2024 чылның тоғыс салтарларынаңар искiрген
ЖКХ паза энергетика тилiзi
Республикада чурт-коммунальнай инфраструктура паза энергетика комплексiн тилiдерiнҷе тоғыс чахсы парча. Пу Хакасия правительствозының ӧӧн тоғыстарының пiрсi полча. ЖКХ инфраструктуразын нааҷылирынҷа тоғыс 2019 чылдаң сығара чардыхти апарылча. Ол тустаң сығара отрасльда алызығлар кирерiне нинҷе-де миллиард салковай хорадылған.
Суғ, чылығ паза чарытхы сетьтерiнiң тоғызы чахсыланча, коммунальнай паза чарытхы объекттерiнде саайлар саны хызырылча. 2024 чылда саайлар саны 51 % хызырыл парған, 2023 чылдағызынаң тиңнестiрзе.
Халғанҷы алты чыл аразына пу сезонда муниципалитеттернiң чылығ пирҷең тусха тимненiзi иң пӧзiк синде – 87 %. Хысхы тусха тимнен салғаннаңар, 46 паспорттаң 40-ы пирiл парған. Пасха муниципалитеттерде, хайзыларына Ростехнадзор аймах сылтағларнаң паспорттар пирбеен, чылығ читiрерiнҷе тоғыс иптiг иртче.
Орджоникидзе аймаандағы Приисковай аалда республика бюджедi ахчазына пӱдiрiлген наа котельнай тузаланысха кирiлген. Асхыс аймаандағы Тӧӧ пазы посёлокта суғ пирҷең системаны тиксi тыхтирынҷа тоғыс узарадылча.
Энергетиктернең хада республиканың чарытхы сетьтерi хониин нааҷылирына улуғ хайығ салылча. Ағбан пилтiрi аймаандағы Тазоба пилтiрi аалда чарытхыны iзестiг пирерi паза тиксi тилiдерi программаны чуртасха кирерi узарадылча. Пылтыр «Хакасэнерго» чарытхы пирҷең пис линияны нааҷылабысхан паза подстанцияларның кӱзiн хозыбысхан.
ЖКХ паза энергетика министерствозы пасха структураларнаң хада законны сайбап тоғынчатхан майнерлернi iлезiне сығарарынҷа тоғысты апарча.
«Чурт паза городтағы оңдайлар» нацпроекттiң «Арығ суғ» проектiнҷе Ағбан пилтiрiнде транзиттiг суғ пирҷең провод салылған.
2019 чылдаң сығара «Чурт паза город оңдайлары» нацпроекттiң ӧнетiн программазынҷа изелчеткен туралардаң Хакасияның 1150 азыра чуртағҷызы кӧзiрiлген.
Пӱӱл Хакасия «Чуртасха инфраструктура» нацпроекттiң «Коммунальнай инфраструктураны нааҷылиры» федеральнай проектiнде аралазар. Мының алнында пу пӧгiнге ахча республика бюджедiнең не пирiлҷең, амды федеральнай бюджеттең чахсы хабазығ позыдылар. 2025 чылда читi аймахтың 12 аал-городында суғ паза чылығ пирҷең системалар тиксi тыхталар.
Валентин Коновалов министерствоның паза муниципальнай ӱлгӱлернiң алнында мындағ пӧгiннер турғысча – хысхы тусха тимненiс кӧзiдiглерiн чахсыландырарынҷа тоғысты узарадарға паза прайзына паспорттар алып аларға, анзына республиканың прай оңдайлар пар, тоғыс планы паза аннаң андар ниме идерi.
Аның таниинаң, федеральнай хоза ахчаны тартып алар оңдайларнаң толдыразынаң тузаланарға кирек, ол санда наа нацпроект хоостыра.
Хакасияның культура хумартхыларын хайраллирынҷа хазна инспекциязының устағҷызы Дмитрий Левченко ирткен чылдағы тоғысча сан пирiс иткен
Пурунғы кӱргеннер ӧӧн хайығда
Пӱӱнгі кӱнде республика чирінде хазна синінде хайраллалчатхан 2538 хумартхы саналча. Оларның ӧӧн чардығы, 97 проценті, археология хумартхызы. 2024 чылда иртірілген сыныхтағларның салтарлары хоостыра, хумартхыларның 85 проценті сайбалбиндыр.
Олох туста ирткен чылда иргілен парған алай сайбалып пастабысхан хумартхы тастарны нааҷылир паза хайраллап халар тоғыстар узарадылғаннар. 2024 чылда андағ тоғыстар Орджоникидзе аймаандағы Наа аал хыринда иртірілгеннер. Анда «Дума-1» кӱргеннернің орны пар. Iди халғанҷы ӱс чылға изелчеткен читі хумартхы хайраллалған.
Полызығ кирексіпчеткен кӱргеннер чир тоғыстарын иртірер алнындағы сыныхтағлар тузында ілезіне сығысчалар. Iди пылтыр андағ оңдайнаң 18 археология хумартхызы табылған.
Iдӧк хазнабыстың тархынынаң алай тилекейде полған танығлығ киректернең палғалыстығ объекттер хайығ кирексiпчелер. Мында чааҷыларға чарыдылған хумартхы тастарны, саблығ кізілернің бюсттарын, чаа ветераннары чыылған сыыраттарны ла нимес, iдӧк архитектура хумартхыларын таныхтирға кирек.
2024 чылда хазна инспекциязы Хакасиядағы муниципальнай пӱдіcтернең хада Илбек Ада чаа араласчыларына чарыдылған хумартхы тастарның паспортизациязын иртірген. Тиксі Хакасияда андағ 199 орын санға алылған. Дмитрий Левченконың искірии хоостыра, пӱӱл полған на андағ хумартхы таста хакас паза орыс тілінең пазылған танығлар іліл парар. Iдӧк ол танығның хыринда куар-код турғызылар.
Пылтыр прай кічіг ааллардаңар, муниципальнай пӱдістердеңер электроннай Хумартхылас книгазын тимнирі тоозылған. Андар Илбек Ада чаада араласхан парчан чир-суғҷыларыбыс кирілген.
Хакасия пазы Валентин Коновалов пирген чахығ хоостыра СВО-да, аралазып, чуртастарын пир салған чааҷыларға хумартхы чардылар тимнир тоғыс апарылча. Ирткен чылда андағ 64 чарды тимнелген.
Хакасия пазы хазна инспекциязының ӧмезін тӱзімніг тоғызы ӱчӱн алғыстаан. Паза республиканың ис-пайына саналчатхан хумартхыларны ӧсчеткен тӧлге хайраллап халарға алғаан. Хайди таныхтаан Валентин Коновалов, анзы туристтерні піссер тартарға полызар.
Iдӧк Илбек Чиңiстің 80 чылы алғым таныхталчатхан чылда, Илбек Ада чаа хумартхыларына улуғ хайығ салардаң пасха, iдӧк СВО-ның махачыларына чарыдылған орыннар тӧстирге кирек теен Хакасия пазы.
Сомнар r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
