Наа устағ кадрлары тимнелчелер
14.03.2025
Хабарлар
«Хакасия матырлары». Россия президенті Владимир Путиннің пастаанҷа пылтыр хазнада СВО араласчыларын паза ветераннарын устағ тоғызына, ӱгредіп, тартар программа тоғынып пастаан
Анаң регионнарға андағох программалар тоғындырарға чахығ пирілген. Iди ам республикада «Хакасия матырлары» программа тоғызын пастапча. Аның ӧӧн пӧгiнi – ӧнетін чаа операциязы араласчыларын паза ветераннарын хазна аппарадында паза бизнесте устағ тоғызына тимнирі. Ӧнетін чаа операциязы араласчыларынаң тоғазып, Россия президенті Владимир Путин таныхтаан:
– Кӧрчем пу махачы кізілерзер, піреелері саңай чиит ооллар, анаң пір дее иртіре хоспин чоохтирға сағынчам, пістің чуртағҷыларыбыс, пістің чоныбыс паза пу кізілер ӱчӱн чӱрек поғдархаснаң толча. Андағлар хаҷан даа тӧдір пазынмас, хайдағ даа киректе кізее хомай ниме итпес.
Аннаңар даа ол позының Федеральнай Чыылығзар айланызында, наа элита тӧстелердеңер чоохтап, таныхтаан, элита – ол прай нимелернең тузаланчатхан алынҷа каста нимес, ол Россияа саңай пирін салғанын киречілеп салған кiзiлер.
Программа араласчылары амох пӧзік устағ тоғызына турғызылчалар. Iди, кӧзiдімге, ДНР-ның Матыры Артём Жога президенттiң Уралдағы федеральнай округтағы полномочиеліг кізiзі полыбысхан. Устағ тоғызына турғызылған полған на кізінің тоғызы программа тӱзімніг полчатханын кӧзітче. Аның араласчылары регионнардағы устағның, чииттер политиказының, спорттың паза технологияларның кӧрімін алыстырып пастапчалар, ӧсчеткен тӧллерге чахсы кӧзідім полыбысчалар.
Пістің республикада 2025 чыл Хакасия матырлары чылы тіп чарлалған. Аннаңар республика пазы Валентин Коновалов 21 азығда искірген. Аның cоонда пір неделя пазынаң устағ кадрларын тимнирінҷе «Хакасия матырлары» программа тоғынып пастаан. Аны чуртасха кирердеңер чоохтап, Хакасияның Федерация Чӧбіндегі сенаторы Олег Земцов искірген:
– Проекттің ӧӧн пӧгiнi – ӧнетін чаа операциязы араласчылары паза ветераннары санынаң ӧзер оңдайлығ устағҷылар командазын тӧстирі паза тимнирі. Олар Хакасияда хазна паза муниципальнай устағ системазында, iдӧк пасха даа сфераларда тоғыс апарарлар.
Программада аралазарға сығанчатханнарның сурыныс пічіктері 28 азығдаң алыл сыхханнар. Хайди искірген Хакасия пазының пастағы орынҷызы – правительство аппарадының устағҷызы Татьяна Курбатова, таллаға позыдылчалар Россияның гражданнары, хайзылары СВО араласчылары алай ветераннары полчалар, пӧзік ӱгредігліг паза кізілернең устаан опыды пар ползын, кӧмес тее... Программа араласчыларын санға турғызылған, сыныхтағ паза чоохтазығ иртірiлген салтарларҷа аның Халых чӧбі адап пирер. Халых чӧбінең устапча республика пазы Валентин Коновалов.
Сурыныс пічіктері кӧрік айы тоозылғанҷа алылар. Ӱгредіг пӱӱл 1 ӱртӱннең пасталар, ол пiр чыл узарадылар.
«Матырлар тузы» федеральнай проект осхас программаларны регионнарда тӧстирге паза тоғындырарға киректеңер чоохтаан Россия президенті Владимир Путин. Андағ проекттер пастапчатханнаңар iдӧк иcкіргеннер Сибирьдегі Томск, Кемеров паза Иркутск областьтарының, Алтай крайының ӱлгӱлері.
Проект араласчылары таллағ тузында СВО-да ползалар, олар проекттің резервіне кирiлчелер, ӧнетін чаа операциязында аралазарын тоос салзалар, олар «Хазна паза муниципальнай устағ» программаҷа ӱгренерлер.
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
