Европа первенствозының чемпионы Наталья Пудова

Поғдархас. Наталья Пудова Европа первенствозында чиңіc тутхан. Кӱресчі хыстардаң ол иң пурун Россия командазына алтын медаль ағылған

Пу кӱннерде Албанияның ӧӧн городы Тирана спорт кӱрезінің кі­ніне айлан парған тирге чарир. Анда Европаның первенствозы иртче нооза. Турнирде 23 часха читкелек чиит­тер кӱстерін сынапчалар. 

Кибіске пастап сыхханнар ола­ңай кӱреснең айғасчатхан ооллар. Чир-­­суғ­ҷыларыбыс турыстыра харба­зыбыс­ханнар. Оларның сигiс медаль: алты алтын, пір кӱмӱс паза пір хола. Чи­ңіс тутханнар Лев Павлов (57 кг), Амаль Джандубаев (65 кг), Магомед Эми Эльтемиров (70 кг), Исмаил Ханиев (74 кг), Арсен Балаян (79 кг)  паза Мухамед-Тагир Ханиев (92 кг). Бады-­Маа­дыр Самдан (97 кг) кӱмӱc медальны холға кирген, Арслан Багаев (86 кг) – хола медальны. 

10 – 12 кӧрікте ипчілер кӱрезінҷе ма­рығ ирткен. Абахайлар ідӧк 10 кӧ­дірімде чиңіс ӱчӱн харбасханнар, олар­ның санында полған хакас хыс На­талья Пудова. Халғанҷы туста Тӧӧ чирінең сыххан кӱресчі чидіглерінең тӧреміл ӧріндірче. Пылтыр ол пір дее арға-мӧрійдең медаль чох айлан­маан. Иң танығлығ чидіглерінеңер чоох­та­за, 2024 чылда Наташа Ярыгин турнирінде ӱзінҷізі полыбысхан, Рос­сия чем­пионадында хола медаль ут­хан. Ча­рыс айында, тізең, абахай чир-­суғ­ҷыбыс тилекей первенствозында кӱ­мӱс призер полыбысхан. 

Прайзы сағынған, 2025 чылны Наташа пазох чиңістернең азар. Че пӱӱл Ярыгин турнирінде хакас абахайға оң полбады. Спортсмен медаль чох халған. Пудова пос салынмаан. 13 – 15 азығда Минскте чоннар аразындағы арға-мӧрій ирткен. Ол ӱc хати олимп чемпионы Александр Медведьтің хумартхызына чарыдылған. Чир-суғҷыбыс, анда кӱзiн сынап, хола медаль утхан. 

Европа первенствозында кирек хайди парыбызар ни? Наташа 50 килограмм кӧдірімде харбасча. Пу кӧдірімде кӱресчілер саны сыбыра илбек пол­ча. Марығларға таллағны даа иртерге оой нимес. Тӧӧ чирінде пик хуйахтығ чон чуртапча. Пудова, азах мееттің тӧртінҷі чардығында Мария Торрес­ті (Испания), 8:0 саннаң утчадып, учаландырыбысхан. Чарым финалда ол Наталья Вальчакты (Польша) 11:0 саннаң чиңіп алған. Азах меетте пістің хысха хатығ чухтыр. Ол Анастасия Янотованаң (Белоруссия) харбасхан. Пудова, «ыырҷыны» утчадып, алҷаас идiбістір. Че харбазығның халғанҷы секундаларында чиңісті кӱснең алып алған. Сан – 7:5. Финал соонда Наташа, сыдаспин, ылғабысхан. Ол чиңіс харах частары полған. 

Таныхтирға кирек, кӱресчі хыс­тар­даң азах меетке пис кізі cыххан. Че Россия командазына алтын медаль­ларны Наталья Пудова паза Кристина Братчикова (72 кг) ла ағылғаннар. Братчикова «ыырҷызын» 4:3 саннаң утып алтыр. Екатерина Кошкина (53 кг), Амина Танделова (62 кг) паза Ольга Козырева (76 кг) кӱмӱс призер полыбысханнар.

Европа первенствозында чиңіс тутханы – улуғ чидіг. Пістің кӱресчілердең халғанҷызын пу марығда Мария Тюмерекова 2019 чылда утхан.

Наталья Пудова Республиканың хар­бас кӧрімнерінің олимп резерві спорт школазының ӱгренҷізі полча. Аның тренерлері – Виталий Леонидович Канзычаков паза Марат Семёнович Кичеев. Хакас хыс Евгения Сер­геевна Карамчаковның холында харбазып пастаан. 

Сом интернеттең