Хазнаа кирек специалисттер тимнелче
12.03.2025
Хабарлар
«Профессионалы» чемпионаттың араласчылары
Чемпионат. Хакасияның ортын профессиональнай ӱгредiг организацияларында студенттер аразында марығ ирткен. Чиит оол-хыстар «Профессионалы» чемпионатта аймах кӧстеглерҷе устарынаң сынасханнар
Ағбанда коммунальнай хоных паза сервис техникумында нинҷе-де кӧстегҷе марығ ирткен. «Плотницкое дело» кӧстегде пис студент араласхан. Оларға сiрее, пӱдiрiг тахтазын идiбiзерге кирек полған. Анаң ағастаң идiлген ниме-нооны тыхтап полчатханын кӧзiт пирерге. Халғанҷызында тоғыс пирчеткеннернiң чахии хоостыра студенттерге iзiксер замок турғызарға киректелген.
Хайди чоохтаан «Плотницкое дело» кӧстегнiң ӧӧн чарғыҷызы Леонид Субраков, пу кӧстегҷе Хакасияда коммунальнай хоных паза сервис техникумында ла ӱгретчелер, аннаңар чемпионатта пу кӧстегҷе пу ла техникумның студенттерi араласханнар. Чииттер пастағы паза iкiнҷi курстарда ӱгренчелер.
«Столярное дело» кӧстегде, тiзең, iдӧк пис студент узынаң сынасхан. Прай тоғыстарны толдырыбызарына оларға 13 час пирiлген. Пӱӱл пу кӧстегҷе iдӧк пу ла техникумның студенттерi араластылар.
– Студенттерге, ағастаң кӧзенек рамазы чардыхтарын идiп, оларны чыып, чылбыраң идiбiзерге киректелген. Марығ араласчылары аразында чапчаң тоғынчатханнар парох, итсе-де, ағас тоғызында ӧӧнi – аннаң иптiг тоғынары, – таныхтапчалар «Столярное дело» кӧстегнiң чарғыҷылары.
Ирткен чылда пу кӧстегде республикада артых полыбысхан студент, Крымзар парып, марығның халғанҷы чардығында араласхан. Прай регионнар аразында ол иң артых 10 араласчы санында полыбысхан.
Тимiр хабыстырҷаң кӧстегде алты студент араласхан. Олар Ағбандағы пӱдiрiг, коммунальнай хоных паза сервис, Харатастағы тағ-пӱдiрiг техникумнарында ӱгренчелер. Ӱс кӱн аразына чииттерге пирiлген тоғыстарны прай толдырыбызарға киректелген. Соонаң идiлген конструкцияның пик полчатханын чарғыҷылар сыныхтааннар.
Марығ хайди иртчеткенiн Хакасия пазы Валентин Коновалов кӧр парыбысхан. Ол, ӧӧн эксперттернең чоохтазып, марығ араласчыларына пӧзiк устарын кӧзiт пирерге алғаан.
Iдӧк регион устағҷызы техникум хыринда орныхчатхан «Студенттернiң садығ туразынзар» кiр парыбысхан. Анда студенттернiң ағастаң паза тимiрдең идiлген ниме-ноозы садыға сығарылча.
– Амғы туста чон экология саринаң арығ ниме-ноодаң сығарылған товарнаң тузаланарға хынадыр. Пiссер удаа ағастаң идiлген iдiс-хамысты аларға килчелер, сыйыхха хоостар паза ибде тудынҷаң-хабынҷаң нимелер алчалар, – искiрген садығ туразының тоғынҷызы, техникумның мастерi Светлана Нечепуренко.
Пӱӱл «Профессионалы» чемпионат Ағбанның, Харатастың, Саяногорсктың паза Шираның профессиональнай ӱгредiг организацияларында 13 ачыхта ирткен. Анда 250 азыра студент паза ӱгренҷi араласхан. Пу наада аның чиңiсчiлерiн адааннар. Артых полыбысхан студенттер амды марығның регионнар аразындағы паза халғанҷы чардыхтарда устарынаң сыназарлар. Олар часхызын паза чайғызын Россияның аймах регионнарында иртерлер.
«Профессионалы» чемпионаттың ӧӧн пӧгiннерiнің пiрсi – регионға паза хазнаа квалификациялығ cпециалисттернi тимнирi. Пӱӱл ол Хакасияда ӱзiнҷi чылы иртiрiлген. Ортын профессиональнай ӱгредiг организацияларының материально-техническай базазы чылдаң чылға нааҷылалчатханда, студенттернiң дее устары тилiп одырча.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
