Россия Матыры – абахай ипчі
12.03.2025
Хабарлар
Россияның паза ДНР-ның Матыры полковник Ольга Качура
Матырлар тузы. Хакасияның Л.Р.Кызласовтың адынаң чир-суғ ӱгренҷең национальнай музейінде Украина чирiнде парчатхан ӧнетін чаа операциязы араласчыларынаңар уғаа чапсых, тузалығ кӧзідіг азылды
Хайдағ даа кізінің хайиин тартчатхан сом. Аның хыринда ӱгренҷілер дее, чииттер дее, ортын частығлар даа тохтабысчалар, ситкіп кӧр сыхчалар. Мына ікі ӧӧренiң пірсі, сом алтында ниме пазылғанын хығырып алып, аны сыйбастырарға сағынып, холын андар сунған. Сах андох аның хыринда музей тоғынҷызы кӧріне тӱскен, аны тохтадарға харасхан.
– Сыйба, сыйба, хызычағас. Сағаа чарыдылча, – Андрей Готлибтің ӱні паарсах, амыр истіле тӱскен аның хыринда.
Музей директоры Андрей Готлиб, кӧзідіге сығарылған сомны сыйбирға сағынчатхан хызыҷахха амырада чоохтанып, ағаа харығ полбас ӱчӱн, хыйа пастырған. Позы хакас ӱгренҷідең харах албинча. Сырайында хайдағ-да пілдізі чох кӱлімзірес. Анаң пазын тӧбін тудыбысхан.
Чағын пастыр килдім. Изеннесчебіс. Пiс аннаң хаҷаннаң сығара таныспыс. Че мындағ чӱрексіністіг туста сым на турчабыс. Анаң Андрей Иосифович, пазын хызыҷахсар икіп, арса, аның пірее туғаны Украина чирiнде чааласча полар, аннаңар ол сомны сыйбапча тіп ағырин чоохтан салған.
– Пілчезің ме, Анатолий, пу сіліг кӧрімніг полковник ипчінің ӱлӱзінеңер истіп алғанда, харахтарым суғлан парыбысханнар. Пастап Донецк Чон Республиказының Матыры, анаң Россияның Матыры аарластығ аттарға турысхан Ольга Сергеевна Качураны чох идерге Украинаның ӧнетін службалары дрон-камикадзе тимнееннер, – мӧңіссірепче иргі танызым.
– Анаң чи, чабал сағыстары толған ма? – сурчам аннаң.
– Россияның Матыры танығны Россия президенті Владимир Путин Кремльде аның хызына читірген. Донецк Чон Республиказының армиязында ол реактивнай дивизионнарның чалғыс ла ипчі-командирi полған. Аның сола ады «Карса» полтыр. Чааҷылар прайзы даа андар «Хыс туңмаҷағыбыс» тiп айланҷаң, полызығ сурҷаң полтырлар, – чооғын узаратча музей директоры, пазын тӧбін тут салған туста.
Паза ла сизінзебіс, пістің хырибыста ӱгренҷiлер илееде чыылыс партырлар. Андрей Иосифовичті хынып исчелер. Аннаңар даа музей директоры тохтабаан, чооғын узаратхан. Хызыҷахтар пастарын iдӧк тӧбін тӱзiрглеп салтырлар. Хайдағ андағ ипчі полған. Сомда, тізең, уғаа иптіг кӧрімніг чааҷы-офицер. Погоннарында ӱс чылтыс – полковник званиеліг.
– Амды, хызыҷахтар, пасха сомны кӧріп аларбыстар. Анда автоматтығ чааҷының холында хоосха. Азахтары хыринда чоон адай турча. Уғаа чахсы сом, – кӧӧктірче ӱгренҷiлерні Андрей Иосифович. Амды аның ӱні сала чалахай арах сыхча.
Ӱгренҷілер чапсых сомнарнаң танысчалар
Мин сіліг кӧрімніг чааҷы-полковник ипчінің cомы хыринда тур халғам. Хайдағ-да аптастығ кӧрістіг Ольга Качура позының хыринзар хығырчатханға тӧӧй. Аннаңар даа, кӧзідіг азылчатханда, Хакасия пазы Валентин Коновалов мындағ сомнарны республиканың парчан чуртағҷылары кӧріп аларға киректер тіп таныхтаан позының чооғында. Уғаа орта сӧстер. Кӧзідіг «Донбасс» адалча. «Донбасс» сӧcті истіп ле алза, прайзыбыстың сағызында иң пастап хазыр чаалазығлар кӧрімнері тӧріпче. Мында даа пастағы туста андағох кӧзідіг полар тiп чарат салчазың. Сынында кирек сала пасха арах чіли пілдірче.
– Полған на сомда наа хоных пасталарына кӧстег. Пу даа хызыҷағастар прайзының хайиин тартча поларлар. Аалны неонацисттер холынаң наа ла позытхан осхастар. Танк ам даа мында турча. Че аның хыриндағы велосипедтіг хызыҷахтарның сырайларында ӧрчіліг кӱлiмзірес, чиңicке ізеніс. 8 мартха уғаа килістіре. Хызыҷағастар таңдағы кӱннің ээлері, – позының чарых сағыстарынаң ӱлесче пiр оол хыринда турчатхан хыстарнаң.
Оңарылыстығ, прайзының даа пір тӧӧй сағыс: мындағ таңнастығ, таңдағы кӱнге ізеніс пирчеткен сомнарны кӧзiдіге тимнеен чайаачы ус мында ни? Итсе, аның позының сомы «Российская газета» хыринда іліл партырҷых. Пу газетаның сомҷызы, запастағы майор, разведчик Владимир Аносов Украина чирiнде ӧнетін чаа операциязы пасталған тустаң сығара мында тоғынчатханы алынҷа таныхтал партырҷых. 2022 чылдаң сығара ол позының газетазында чӱзерлеп сомнар сығарарға маңнантыр.
– Владимир Александрович, позының сомнарын кӧзідiге сығарып, кӧп марығларда араласча, сыйыхтығ орыннарға сыхча. Мариуполь, Донецк паза даа пасха городтарда аның сомнарының кӧзідіглері удаа иртірілчелер, пӧзік паалағ алчалар. Пу сомнар чааласчатханнарның даа кӧңнілерін матап кӧдірчелер, – таныхтаан «Российская газетаның» Сибирьдегі пӧлиинің редакторы Ирина Полищук.
Таныхтирға кирек, ол пу кӧзідігні Ағбанда иртірерінде улуғ хозым иткен. Пастап пу сомнарны Сибирьнің чуртағҷылары кӧріп алғаннар. Анаң кӧзідіг Хызылчарда ирткен. Аның соонда Ағбанзар читкен. Музей директоры Андрей Готлиб Хакасияның илееде аалларының чуртағҷылары пу кӧзідігнең танызарға маңнанарына ізенче.
Видеопалғалыс пастыра кӧзiдіг хайди азылчатханын кӧріп аларға чыылысханнарзар алғыстас сӧснең айланған Владимир Александрович Аносов. Махачы сомҷы тоғыс тузында Хакасиядаң парған чааҷыларға тоғасчатхан осхас. Оңарылыстығ, ол иң пастап позының чооғында Россия Матыры Аймир Миягашевті адаан. Хакасиядаң килген андағ махачы чааҷылар мында пар теенінде, кӧрігҷiлернiң айа сабызы истiле тӱскен – чир-суғҷыларыбыс ӱчӱн поғдархапчатханнарын андағ оңдайнаң кӧзiткеннер кӧрігҷілер.
Паза ниме чапсытхан кӧзідіг тузында? Ағбандағы харахтаң уйан палаларның школазынаң ӱгренҷілер илееде полған. Олар кӧңнілеріне кірчеткен пірее сомнарны хати-хати кӧрчеткеннер. Харах оды уйаннаңар, ол сомзар сырайларын чағын тутхлап алчалар, сала ла холнаң сыйбастырбинчалар.
– Яна Коршунова имҷі пістең тың на улуғ полбиндыр. 23 частығ хыс. Ӱр ниместің не аразына палығлатхан 150 чааҷыны чаалазығ тузында арачылирға маңнантыр. Ол даа герой поларға турыстығ, – ӱлесчеткеннер постарының сағыстарынаң уйан кӧрчеткен хызыҷахтар.
Сомнар Дмитрий Сунчугашевти
Автор :
Анатолий Султреков
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
