Чааны сағысха киріп
05.03.2025
Хабарлар
Чаа ветераны Николай Николаевич Шоев
«Минің матыр ағам». «Хакас чирі» республика газетазының редакциязы чарлапчатхан марыға ызылған тоғыстарны сығарарын узаратчабыс «Минің матыр ағам». «Хакас чирі» республика газетазының редакциязы чарлапчатхан марыға ызылған тоғыстарны сығарарын узаратчабыс
Минің пабам Николай Николаевич Шоев 1942 чылда пос кӧңнінең фронтсар чаалазарға парыбысхан. Ол хызылчардағылардаң тӧстелген 65-ҷі Рижскай гвардейскай атығҷылар дивизиязында снайпер полып служить полған. Ағаа Калининскай, 1-ғы Прибалтийскай фронттарда чаалазарға киліскен. Мына ниме ол позынаңар чоохтаан:
– Мин чаалазып пастаам Калинин город хыринда. Анда мин, снайпер полып, ыырҷыны атхам. Пiс анда пулемётчиктерге алай фашисттер снайперлеріне аңнап турғабыс. Мин чаа алнында аңҷы полғаным мағаа уғаа туза полған. Аннаңар немецтер піcтің ухтарыбыснаң илееде атырт сал турғаннар.
1942 чылда улуғ хырлас айында, ыырҷының миназы чарылып, азаамнаң палығлаттырт салғам. Госпитальда чатхан соонда мин пасха частьсар кір парғам. Анда iдӧк чир-суғҷыларым табыл парғаннар.
Пірсінде піс ыырҷылар окоптарынзар хараазын ӧнетін чахығнаң парғабыс. Фашисттер кӱнӧрте репродуктор пастыра орыс тілінең пісті пленге кірерге чоохтаҷаңнар. Пістіңнер олар орныхчатхан орынны кӧр салғаннар. Аннаңар хараазын ыырҷының окоптарынзар чызынахтап парғабыс. Окоптарзар чағын килгенде, пір фашист, окоптаң пахлап, пісті кӧр салған. Ол пісті пленге кірерге килгеннер тіп сағынған одыр. Пасха даа немецтер окоптаң піссер пахлап сыхханнар. Че мында пістің автоматтарыбыс тыҷыраза тӱскеннер. Немецтер, ухтарға атыртып, окоп iстінзер чіде халғаннар. Ол хараазын піc анда матап хайыныбысхабыс. Ыырҷының піске уғаа кирек документтерін алып алғабыс. Ол сылтағнаң немецтернің пістің фронтта хайди чаалазарға иткеннерін азынада піліп алғабыс паза оларның пӧгіннерін сайбаабыс.
Пістің частьтаңар кӧп андағ киректі сағысха кирерге чарир. Дивизия командирі пістің полкка гвардейскай знамяны пирген. Чаа чолларын иртіп, піс Чиңiстi Прибалтикада удурлаабыс.
Сом сӧбіре архивінең алылған
Автор :
Галина Доможакова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
