«Саяны» Суперлигада ойнирына ізенчебіс
05.03.2025
Хабарлар
«СКА-Нефтяник» команданың капитаны Алан Джусоев меспекті хадарча
Меспектіг хоккей. Хакасияның ӧмезі Россия чемпионадында 13-ҷі орынға сыххан
Россия чемпионады тоозыларға чит парир. Пӱӱн, 5 кӧрікте, марығның плей-офф ойыннары пасталча. Пістің «Саяны» халғанҷы матчын ибде 1 кӧрікте иртірген. Оолларыбыс «СКА-Нефтяник» команданаң тоғасханнар.
14 азығда «Саяны» Хызылчардағы «Енисейнең» хайым ойнабысханда, прайзы Хакасияның командазы аннаң андар пик хылиин кӧзідер тіп ізенген. Че 19 азығда «Волганаң» тоғазығ 1:6 саннаң тоозылған. Ульяновсктағылар пылтырғы утырыс ӱчӱн ӧс алғаннар тирге чарир. 2024 чылның 17 улуғ хырлазында «Саяны» Ағбанда оларны 6:5 саннаң чиңіп алған нооза. «Стартнаң» матч Нижегородскай областьта ирткен. Сан – 2:6. «Старт» – кӱстіг ӧме. Тӧреміл плей-оффсар таллағны иртiбісче.
26 азығда Ағбанның ӧӧн стадионында пістіңнер «Байкал-Энергиянаң» тоғасханнар. Алында «Саяны» иркутсктағыларнаң аймах ойнабысчаң. Итсе, амғы сезонда «ыырҷы» оолларыбысты айағ чох чабыра пасча. Аннаңар Хакасияның ӧмезіне хатығ чуғар тіп ікінҷілес чох полған. Олох туста «ағырчатхан» улустың чӱреенде команда хаҷан даа ізеніс поладыр. Салтарында, ойынның ӧӧн матырына кӧрігҷілерні санирға чарир. Олар, ӧмедегілерге хабазарға пӧгініп, ойын тооза хысхырғаннар, сығырғаннар. Анзы тың на полыспаан. Пастағы таймдох пістіңнернің хаалхазынзар соон сӱрістіре алты меспек учух килген, «ыырҷының» хаалхазы, тізең, хуруғ турча. Хоккеисттерібіс хайди арачыланарға кирек полчатханын ундут салғаннар, таң. Хаалха хадағҷызы Яков Гах таа, чӱрексініп, турыстыра ойнап полбаан. Ікінҷі таймда аның орнына Владислав Атапин сыххан.
Ойынның ікінҷі чардығы хынығ арах ирткен. Аалҷылар 46-ҷы минутада постарының аттарына читінҷі меспекті пас салған соонда, «Саяны», усхунған чіли, «Байкал-Энергияа» ӱс голнаң нандыр пирген. Пастағы ікі меспек Василий Жаукеновтың чидии. Чир-суғҷыбысха Руслан Гавричков паза Егор Егорычев полыс пиргеннер. 57-ҷі минутада орындағы кӧрігҷілерні Руслан Гавричков ӧріндірген. Пу гол соонда пос салыныбысхан иркутсктағылар пазох атакаа пар сыхханнар. Ойын 4:12 саннаң тоозылған. «Байкал-Энергияа» тӧртінҷі меспекті Денис Петров 12 метрдең кире сабысхан.
1 кӧрікте «СКА-Нефтяникнең» тоғазығ андағох оңдайнаң ирткен. Пастағы тайм соонда сан 1:7 полған, ікінҷі тайм соонда – 4:14. Махтирға кирек Руслан Гавричковты паза Денис Петровты. Полған на хоккеист ікілер гол сабысхан.
Турнир таблицазында 14 ӧменің аразында «Саяны» олох ла 13-ҷі орында. 2024 чылда пістің алтында полған «Уральский трубник», амды – «Мурман». Хакасияның командазы, 26 ойын иртiрібізіп, 13 сан чыып алған. Хоккей ӧмезі 20 кічіг хырласта «Родинаны» 4:2 саннаң чиңіп алған, 27 кічіг хырласта 7:1 саннаң – «Мурманны», 17 улуғ хырласта 6:5 саннаң – «Волганы», 15 кӱргенде – «Мурманны» 7:1 саннаң. 14 азығда «Енисейнең» хайым ойнабысхан. Сан – 3:3. Пылтырғызынаң тиңнестірзе, команда пір сан чідір салтыр. 2024 чылда «Саяны» тӧрт хати чиңіс тутхан, ікі хати хайым ойнабысхан. Хакасияның ӧмезі «Родинаны» 4:3 саннаң утхан, «Сибсельмашты» – 6:4 саннаң, «Уральский трубникті» – 5:4 саннаң, «Енисейні» – 5:4 саннаң. Оолларыбыс «Стартнаң» (4:4) паза «Байкал-Энергиянаң» (6:6) тиңни ойнабысханнар.
«Саянының» алнында 10-ҷы орынға сығып аларға пӧгін турған. Команданың узы читпеді. Ӧӧн тренер Евгений Баженов хоккей ӧмезі Суперлигада ойнирына ізенче. Евгений Николаевичтің сағынған сағызы толған полза, чахсы поларҷых. Суперлига чох Хакасияда меспектіг хоккей толдыра кӱзінең тилібес. Пістің тренерлер пӧзік устығ хоккеисттерні тимнир оңдайлығлар. Чир-суғҷыларыбыс иң кӱстіг ӧмелерде турыстыра ойнапчалар. Алан Джусоевнең Семён Чупин «СКА-Нефтяник» ӱчӱн турысчалар, Илья Лопатин – «Енисейнің» капитаны, тӧрт ойынҷы «Байкал-Энергияда». Пӱӱл «Саяныға» Василий Жаукенов чахсы полыс пирген. Чииттер ӧмезі финалға ирт полбаза даа, кӧрігҷілерні чидіглерінең ӧріндіргеннерӧк.
Хайди даа полза, «ағырчатхан» улусха хозылып, «Саяны» командаа ойын ӱчӱн алғызыбыс читірчебіс, аның таңдағызына киртінчебіс.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
