Спорт. Пу кӱннерде Ағбанда грек-рим кӱресчiлерiне сборлар иртчелер. Тренер Владимир Покояковтың устаанынаң 30 артиинаң кiзi узын таптапча.

Хызылчар крайының паза Хакасияның спорт палғалызы хаҷан даа пик полған. Пiстiң республика кӧп чыл хонҷых регионға кiрген нооза. Илееде кiзi, тӧреен чирiнде улуғ спортсар пастағы хаалағлар идiп, толдыра кӱзiнең Хызылчарда харбасчаң, чӱгӱрҷең. Пу кибiр амға теере чiтпеен. Кӧзiдiмге, «Енисей» командада хоккеист Илья Лопатин маңнаныстығ ойнапча. 2024 чылда Гаврил Анжигановнаң Тимур Чепчигашев, Хызылчарда устарын таптап, грек-рим кӱрезiнҷе Россия чемпионадында ӱзiнҷi орынға сыхханнар. Пӱӱл Ярыгин турнирiнде хола медальны утхан Артур Чебодаев. Пiр cӧснең, iкi регионның палғалызы орындағы спортты кӧдiрерге полысча.

Грек-рим кӱрезiнде пу чӧрiмде Хызылчардағы тренер Владимир Покояков ӧткiн араласча. Пiстiң тренерлер чир-суғҷыбыснаң тоғынарға хынадырлар. Олар, ӱгренҷiлерi спортсменнер чiли аннаң андар ӧссiннер тiп, чииттернi Владимир Петровичтiң холына пирiбiсчелер. Ағаа хоза, Покояков оолларны Хакасиязар сборларға чылда iкi хати ағылча. Мероприятие iдӧк орындағы кӱресчiлерге кӧрiлген. Владимир Петрович чоохтапча:

– Позым Томыҷахтар аалынаңмын. Хызылчарда чиит тустаң сығара чуртап парим, Сайтиевтiң адынаң Олимп резервi спорт школазында улуғ тренер полып iстенчем. Грек-рим кӱрезi секциязын тӧртӧлең апарчабыс. Ӱгренҷiлер саны 150 кiзее читче полар. Позымның ӱс ӧме. Амғы сборға 17 кӱресчiнi ағылғам. Ноға Ағбанзар килчебiс? Идiнҷек паза тренер Вадим Ильич Топоев спортсменнерге мында истiг оңдайлар тӧстеен. Чахсы зал, полда iкi кибiс тӧзелiк. Хостел пуох турада орныхча, столовай паза мылча пар. Школа директоры Виктор Кириллович Райковха алғыс читiрерге кирек. Ол сборларға ахча тӧремiл позытча. Чайғызын Пiлӧ кӧлде чыылысчабыс.

Ӱгренҷiлерiмнi пеер ағылып, орындағы спортсменнерге хабас пирер сағыс парох. Хакасияда спаринг-партнерларнаң сидiк. Олар тренировкаларда удур-тӧдiр харбазып кӧнiк парғаннар. Пу чағында Суздальда 18 часха читкелектернiң аразында Россия первенствозы иртер, анаң улуғлар Сибирь чемпионадында кӱстерiн сынирлар. Сборлар, тiзең, чииттерге марығларға чахсы тимненiп алар оңдай пирчелер.

Сизiнгенде, сборларда режим ӧӧнi полтыр. Ооллар 8.00 часта турчалар, анаң оларны зарядка сағыпча. Азыранып алған соонда спортсменнер узирға чатчалар. 11.00 частаң – пастағы тренировка. Ооллар обедке пар килчелер, пазох узупчалар. 17.00 часта чон иирдегi тренировкаа чыылысча. Кибiсте чахсы тирлеп алған соонда кӱресчiлер столовайзар чол тутчалар. Андада ла Владимир Петрович оларға телефоннарын пирiбiсче. 22.00 часта чииттер телефоннарын тренерге айландырчалар. Мындағ режимге тудынарға оой нимес, неке. Олох туста пасха оңдайнаң чидiглерге читпессiң.

22 азығда Покояков ӱгренҷiлерiн Томыҷахтар аалынзар апар килген. Аалда аның тренерi Анатолий Леонидович Аев маңнаныстығ iстенче. Автобусты пиртiр Вадим Топоев. Хызылчардағылар олғаннарға мастер-класс иртiргеннер. Палаларның ӧрiнiзi пу чир полбаан.

Владимир Петровичнең тренировка тузында чоохтасхабыс. Ол хабарҷының сурығларына нандырарға, спортсменнернi хайығда тударға маңнанҷаң. Тренернiң чооғынаң, ӱгренҷiлерi Гаврил Анжигановнаң Тимур Чепчигашев, СВО-да араласчатсалар даа, Россияның пiрiктiрiлген командазынзар кiрчелер. Iкiзi дее Россияның Арачыланыс министерствозы ӱчӱн харбастыр. Анжиганов пылтыр Россияның Тирiглiг кӱстерiнiң чемпионадында чиңiс тутхан. Олар, службаны тоос салзалар, пазох кибiссер сығарлар. Алексей паза Антон Пахтаевтер – iзестiг спортсменнер. Харындастар 2002 чылда тӧрееннер, оларның пастағы тренерi – Александр Михайлович Худяков. Алексей 2024 чылның улуғ хырлазында чоннар аразындағы турнирде хола медаль утхан. Ооллар часхызын Сибирь чемпионадында паза 24 часха читкелектерге кӧрiлген Россия первенствозында кӱс сынирлар. Пахтаевтерге Тимур Чебодаев хозылар.

2025 чылны чидiглернең Артём Сагалаков пастады. Чиит кiзi пу наада Минскте ирткен чоннар аразындағы марығда хола призер полыбысхан. Хакас оол Киндiрлiг пилтiрi аалдаң полтыр. Аның iкi хыс туңмазы Алёна паза Алина iдӧк харбасчалар. Сагалаковтарны кӱреске тренер Николай Иванович Шулбаев кӧнiктiрген. Амды прайзы вузта ӱгренче.

Чоохтирға кирек, Владимир Петрович, чонның палазын на нимес, позының оол-хыстарын спортха тартарға харасча. Ол кӧп палалығ паба. Хада хонғаны Надежда Александровна iдӧк тренер полча. Ипчi волейбол секциязын апарча. Покояковтың пастағы хонығында тӧреен хызы Францияда сӧбiрезiнең хада чуртапча. 19 частығ оолғы Иван, iҷезiнiң чолын пазып, волейбол ойнапча. Ваня Санкт-Петербургтағы Олимп резервi училищезiн тоосхан, ол «Зенит» команданың чииттер ӧмезiнiң спортсменi. Аның ӧскен сыны – 202 сантиметр. 9 частығ Костя дзюдонаң айғасча, очы хызына 5 ле час, пала олған садынзар чӧрче.

Сборлар хоостыра сағыстарынаң чиит тренер Юрий Боргояков ӱлескен. Юрий Альбертович теен:

– Минiң кӧрiзiмнең, амғы туста Владимир Петровичтi Сибирьде иң кӱстiг тренерлернiң санында адирға чарир. Ол Олимп ойыннарының хола призеры Мингиян Семёновты марығларға тимнирiнде араласхан. Аннаң кӧп нимее ӱгренчем. Позым Вадим Ильич Топоевнең хада тоғынчам. Сборларда 15-че ӱгренҷi араласча. Прай сағызыбыс Россия первенствозында ла. Пiстiң cекциядаң анда Руслан Торточаков, Вадим Чебочаков паза Алтаир Табурчинов аралазарлар. Санапчам, хада-пiрге тоғынғаны улуғ туза ағылча паза спорт ынархазын тилiтче.

Сом Дмитрий Сунчугашевти

Сомда: чииттер тренер Владимир Покояковтың устаанынаң прай кӧңнiлерiн салып харбасчалар