Тоғазығ. Хакасия пазы Валентин Коновалов Федерация Чӧбiнiң устағҷызы Валентина Матвиенконаң тоғасхан. Республиканың чуртас-экономика тилiзiнеңер, бюджет политиказынаңар, регионда национальнай проекттернi паза федеральнай программаларны чуртасха кирчеткеннеңер чоохтаан.

Федерация Чӧбiнiң устағҷызы Валентина Матвиенко Хакасия пазы Валентин Коноваловнаң регионның чуртас-экономика тилир оңдайларын ӱзӱргеннер. Ӧӧркi палатаның спикерi таныхтаан, республика пазы Россия президентiнең тоғасханы, регионға хай пiрее сурығларны пос алынҷа, федеральнай хабазығ чох, пӧгерге сидiк полар тiп, федеральнай министерстволарға паза ведомстволарға сизiндiрiг пирген. Валентина Матвиенконың искiриинең, Хакасияда тилир оңдайлар таныхталча, ол санда регион устағҷызының кӱстенiзiнең.

- Чуртағҷылар Валентин Коноваловты регион пазына iкiнҷiзiн тапханы чуртағҷылар ағаа киртiнчеткенiн паза iзенчеткенiн таныхтапча. Пастағы пис чыл аразына алынған опыт, амды ағаа сурығлар пӧгерiнде алнынзар парарға полысча, - iдӧк Федерация Чӧбiнiң устағҷызы хосхан, Хакасия федеральнай программаларны чуртасха кирерiнде ӧткiн араласча тiп. - Сағам олғаннарға тынанҷаң инфраструктураларны нааҷылирына прай кӱс саларға кирек. Федерация Чӧбi анзына мыннаң мындар хабазар.

Хакасия пазы Валентин Коновалов Боград аймаа аразындағы имнег туразының пӱдiрии хайди парчатханнаңар искiрген.

- Пӱӱнгi кӱнде пӱдiрiг тоғыстары графиктең соона халбинҷа даа тирге чарир. Тимiр конструкциялары тимнел парғаннар, тураның хырына материаллар алыл парған. Пӱдiрiг тоғыстарын чайғазын тоос саларға пӧгiнчебiс, - теен республика пазы.

Iдӧк Хакасия пазы Валентин Коновалов Федерация Чӧбi устағҷызының орынҷызы Инна Святенконаң тоғасхан. Инна Юрьевна хазнаның парламентiнiң ӧӧркi палатазында хай пiрее кӧстеглернең устапча. Ол санда, регионның хазых хайраллир сурығларын паза социальнай инновацияларның тилiзiн, туризм тилiзiнҷе правительство комиссиязының тоғызында араласча. Инна Юрьевнаның полызиинаң пiстiң республикада Боградтағы имнег туразының пӱдiриине федеральнай хабазығ идiлче, iдӧк социальнай объекттерге паза пасха даа пӧгiннерге полызарында хабасча.

- Федерация Чӧбiнде пiс прайзы пiр ӧменең тудынып тоғынчабыс. Ол санда Хакасияның толдырығлығ ӱлгӱлернең сенаторы Олег Земцовнаң хада iстенчебiс. Инна Юрьевнаа, федеральнай кiннiң синiнде чуртас-экономика сурығларын пӧгерге хабасчатханы ӱчӱн, алғызым читiрчем, - чоохтаан Валентин Коновалов.