Гвардияның 41-ҷi тиксi войсколар армиязының 137-ҷi алынҷа мотострелковай бригадазының чааҷызы Юрий Кызынгашев, Хакасиядағы Таштып аалдаң ӧнетiн чаа операциязынзар парып, анда махачы чааласча.

Ефрейтор Юрий Кызынгашев, 2023 чылның чарыс айынаң чааҷы cлужбазына пос кӧңнiнең контракт идiп, артиллерия дивизионының артиллерия батареязының расчет номерi должнозында полып, ӧнетiн чаа операциязында араласча. Анда ол позына турғызылған пӧгiннернi чахсы толдырчатхан, пӧзiк пiлiстiг чааҷы чiли кӧзiтче. Аның чааҷы арғыстары ағаа тиңнезерге кӱстенчелер.

Пӱӱл кӱрген айында ефрейтор Юрий Кызынгашев, Донецк Чон Республиказындағы пiр аал хыринда артиллерия снарядтарының хоза складын хадарар пӧгiннi толдырчадып, уғаа сизiктiг паза пӧзiк профессионализмнiг полчатханын кӧзiткен.

Чааласчаң орынзар килiп, ол, чӱленҷең сетьнең, ағастарнаң паза оларның салааларынаң тузаланып, снарядтар складын кӧрiнмес иде чахсы чазыр салған. Дежурство апарчатханда, ефрейтор Кызынгашев ыырҷының пилот чох учухчатхан iкi аппарады чағдапчатханын тузында кӧр салған. Киректер хайди парчатханын табырах паалап, ол расчеттың позициязынзар радио палғалызынҷа искiрген, позы иңзерiлген тураның стенезi кистiнең «АК-74» автоматтаң хап-орта атып, iкi БПЛА-ны кииде чох идiбiскен. Iди ол снарядтар складын чара чачыратчаң нименi тастирынаң ал халған.

Ефрейтор Кызынгашевке, позына айабин, махачы тудынғаны сылтаанда артиллерия снарядтарын ыырҷының беспилотниктерiнең ал халар оңдай пирiлген. Аның соонда артиллерия расчеттары атыснаң наступлениее парчатхан штурмовой отрядтарға хабазарын узаратханнар.

137-ҷi алынҷа мотострелковай штурмовой бригадаа толдыр полбас пӧгiннер чоғыл!