Пiске пасчалар. Ағбандағы 23№ школаның 8Б класс ӱгренҷiлерi «Думать Тишину» фильмнi кӧрiп алғаннар.

Фильм кӧрiгҷiлернi Ленинград хурчағда полған чылларзар апарыбысча, анда уғаа сидiк оңдайларда паза хызылыста чуртаан олғаннарның ӱлӱзi кӧзiдiлче. Аны кӧрiп алған соонда палалар иң аар тустарда хайди Кiзi полып алардаңар ӱзӱргеннер. Ӱгренҷiлер iдӧк кiзiнiң паарсах хылиинаңар чоохтасханнар. Паарсас, удур-тӧдiр полысханы, хабасханы – кiзiнiң хылии, хайзын Ленинград чуртағҷылары иң хорғыстығ чылларда кӧзiткеннер. Мындағ оңдайнаң олар пазағы тӧлге городты ла нимес, iдӧк сындырлығ хылыхтарын хайраллап халарға полыс пиргеннер! Олғаннар пiстiң туста паарсах полары ниме таныхтапчатханнаңар, че ӧӧнi прай пӱӱнгi кӱнде хайди паарсах поларынаңар чоохтасханнар. Пiс, амғы тӧл, ол аар чаа чылларынаң ырахпыс.

8Б класс ӱгренҷiлерi чыл тооза СВО чааҷыларына полызардаңар, пасха ӱгренҷiлерге, пiстiң чурт аймаандағы чуртағҷыларға паза аалҷыларға чӧрiм тӧстирге киректеңер чарадығ алыбысханнар. Чӧрiм «Прай ниме фронтха! Прай ниме чиңiс ӱчӱн!» адалча.

Пу чӧрiм пастыра олғаннар ӧнетiн чаа операциязы араласчыларына хабасчалар, чайаачы паза тузалығ тоғыста араласчалар, ол санда блиндаж свечiлерiн паза «Чуртас браслеттерiн» тимнирiнең айғасчалар. Мындағ оңдайнаң чааҷыларға сындырлығ хылыхтарын паза тӧллер аразындағы палғалысты тыыдарға полысчалар. Мындағ пастағлар чииттернiң патриот кӧрiстерiн алғытчалар паза ӧбекелерiбiс, пiстiң хазнаны арачылап, пiске ниме ит салғанын аарлир сағысты читiрчелер. Пӱӱн пiстiң чӧрiмге хозылғаннар: «Арығ чӱректер» волонтёр отряды, Хакас Республиканың православие ипчiлерi пiрiгiзiнiң араласчылары, хайзылары палаларны чӱленҷең сетьтер палғирға ӱгреткеннер, Хакас Республикаҷа Росгвардия устанызының ОМОН-ның политика тоғызынҷа пӧлiк устағҷызы, полиция полковнигi Андрей Кобельков олғаннарнаң хада свечiлер тимнеен. Чурт аймағының старостазы, Ағбан городтың депутаттар чӧбiнiң депутады Ольга Глущакова ӱгренҷiлернең хада чааҷыларға пiчiктер пасхан. «Ағбанэнергосбыт» ООО-ның директоры Александр Петрук паза ӱгренҷiлернiң iҷе-пабалары браслеттер тимнееннер.

Тиктең нимес пу чӧрiм кӱрген айының 27-ҷi кӱнiнде иртiрiлген. Пу кӱн Россияның тархынында танығлығ полча. Ол кӱн Ленинград фашист хурчаанаң позыдылған, хайзы 872 кӱн полған паза чонның пазынмас кӱзiн, махачызын таныхтапча. «Прай ниме фронтха! Прай ниме чиңiске!» осхас чӧрiмнер аар чыллардағы патриотизмнi паза пiрге полчатханын таныхтапчалар. Чӧрiм тархын хумартхызына аарласты ла нимес, iдӧк чииттернiң халых чуртаста ӧткiн араласчатханын, чонның пiрге тудынчатханын паза удур-тӧдiр полысчатханын кӧзiтче.

Пу чӧрiмге пӧзiк паалағ пирiлче паза аны эксперттер таныхтааннар. Ол Киноуроктар сайтында пар.

СӦС СОО: Пу чӧрiмнi иртiрген ӱчӱн Надежда Крекова паза 8Б класс ӱгренҷiлерi Киноуроктарның чон премиязына турысханнар. 23№ школаның ӱгретчiлерi паза ӱгренҷiлерi мындағ танығлығ кирекнең Надежда Александровна Крекованы ӱгренҷiлерiнең хада алғыстапчалар, ӱгредiг киреенде маңнаныс паза ӧңненiс алғапчалар!

Сом Ағбандағы 23№ школаның архивiнең

Сомда: Ағбандағы 23-ҷi школаның 5 паза 7 класс ӱгренҷiлерi СВО араласчыларына пiчiктер пасчалар