Илбек Чиңiс. Алындағы кӱнде Хакасия пазы Валентин Коновалов, Боград аймаанзар парып, Толча аалдағы Илбек Ада чаа араласчызы Афанасий Федосеевич Кудоярға Илбек Ада чаа Чиңiзiне 80 чыл толчатханына пайрамнығ медаль читiрген.

Сидiк чаа чылларында саарбахтар Илбек Чиңiстi чағыннадарға полысханнар. Пiр саңай улуғланып, чааға парып, хатығ чаалазығда араласханнар. Оларның санында 17 час толдыр салған Афанасий Федосеевич полған. Пӱӱл Илбек Чиңiстiң пайрамнығ 80 чылына удур республика пазы Валентин Олегович узах частығ ветеранға Илбек Чиңiстiң пайрамнығ 80 чылына чарыдылған медальны, ибiнзер парып, читiрген. Iдӧк республиканың ветераннар чӧбi тимнеен Илбек Ада чаада араласхан чир-суғҷыларыбыстаңар пазылған паза оларның чапсых сомнарынаң чазалған чыынды – кинденi сыйлап пирген.

Афанасий Кудояр 1926 чылның от айының 8-ҷi кӱнiнде Украина Совет Социалистическай Республикада Вовна аалда тӧреен. Чуртаста iди салыл парған, оларның сӧбiрезi 1938 чылда Сибирьзер кӧскен. Олар Боград аймаандағы Пiлӧлiг аалда чуртааннар.

Афанасий кiчiгдең сығара тоғынған, мал хадарчызы полып, улуғларнаң тиңнең тиңе iстенҷең. 1943 чылда, хаҷан ағаа 17 час полған, аны чаа службазына хығырғаннар. Ол ӱзiнҷi артиллерия полкында, атығҷы полып, 1944 чылға теере чааласхан. Соонаң 55-ҷi пограничнай отрядта службазын апарған. 1945 – 1950 чылларда 2152 чааҷылар частьының составында Япониядаң тоғыр чаалазығларда араласхан.

Демобилизация соонаң 1950 чылда Боград аймаанзар айланған. Зоя Павловнанаң, хоных хонып, 12 палаа чидiнгеннер. Афанасий Федосеевич аймах тоғыстарда iстенген. Рудник шахтазында тоғынған, Сойан-Сус ГЭС-тың пӱдiриинде араласханох. 1965 чылда зоотехник курстарын иртiбiзiп, 50 азыра чыл малларнаң айғасхан.

Афанасий Федосеевич Кудояр мындағ сыйыхтарнаң таныхтатхан: «За победу над Германией», «За победу над Японией», «30 лет Советской Армии», 1941 – 1945 чыллардағы Илбек Ада чаа Чиңiзiнiң пайрамнығ медальларынаң, пограничнай войсколарның, «Покрышкиннiң» медальынаң, «Фронтовик 1941 – 1945» кӧксiне хазанҷаң танығнаң, «Ветеран границы», «Пограничнай служба учреждениезiне 100 чыл» танығларнаң.

Республика пазы Валентин Коновалов, чаа араласчызын алғыстап, пик хазыхтығ поларға паза узах час чазирға, туған-чағыннарның хайиинда поларға алғаан.

– Сiрер, сидiк чаа чылларында ӧткiн сағыстығ паза турыстығ хылыхтығ полып, хатығ сидiктi тобырғазар. Пу медаль, чиңiс тутхан совет чонының чиңiзiн ундубинчатханын паза улуғлапчатханын таныхтапча! Сiрер чуртастың сынын улуғлирына, аны арачылирына наа тӧлге чахсы кӧзiдiм паза кӱс хосчатхан кiзi полчазар, – теен Валентин Коновалов.

Илбек Ада чаа ветераны Афанасий Федосеевич хызынаң хада чуртапча. Узах частығ ағадаң аның нинҷе парха паза кӧргенек сурғанда, чоохтап полбаан. Пис тӧлдең саназа, иң чағыннары 85 кiзi пол парчаттыр.

Илбек Ада чаа ветеранына танығлығ сыйыхтар читiрген соонаң, Валентин Олегович Тадар Тис аалзар чол тутхан. Ирткен чылда ӱртӱн айында анда наа поликлиниканың пӱдiрии пасталған. Ол iкi модульлығ корпустардаң пӱдер, оларны чылығ коридор пiрiктiрер. Наа поликлиника пiр сменаа 170 пациентке полызығ пирер оңдайлығ, ол санда 40 палаа. Ол «Узах паза ӧткiн чуртас» национальнай проекттiң пастағы имнег полызиин пирҷең имнег учреждениелерiн нааҷылиры программаҷа пӱдiрiлче. Объекттiң пӱдiриин республика пазы позының хайиинда тутча. Аннаңар пӱдiрiг тоғыстары хайди апарылчатханын сыныхтирға паза тоғыс хоостыра подряд организациязының сидiксiнiстер алай хай пiрее сурығлар табылза, орында ӱзӱрiп, чыылығ иртiрче.

Пӱӱнгi кӱнде поликлиниканың пастағы паза iкiнҷi корпустарының колонналары турғызыл парғаннар. Пiр блогында кӧзенектер паза iзiктер турғысчаң орыннар тимнелче, iкiнҷiзiнде – тура хырының ӱстӱндегi прогоны. Мыннаң мындар монтаж тоғыстарын толдырарына пӱдiрiг площадказынзар сэндвич-панельлер ағыл салғаннар. Олар пiр корпусха чидер иде алыл парғаннар, килчеткен неделяда iкiнҷi корпузына сэндвич-панельлер алыл парар. Амғы туста поликлиниканың пӱдiрии сала майың парча, чылығлар турыбысса, тоғынҷыларны iкi сменанаң тоғындырары чыылығда ӱзӱрiлген. Хайди таныхтааннар подряд организациязы, пӱдiрiг кӧрiлген графиктең тың на соона халбинча, оларның анзын тӱзедiбiзер тус пар. Наа поликлиниканың пӱдiрии сӧӧ тартылбасха кирек, аны тузында тимге сығарыбызарынаңар чоох апарылча. Аннаңар пӱӱл кӱскӱзiн имнег туразы тоғынып пастир тiп кӧрiлче. Чыылығда Хакасия пазы Валентин Коновалов, подряд организациязына чыылығда ӱзӱрiлген сурығларны хайыға алып, сидiксiнiстернi тузында пӧгерге чахаан.

Сомнар Дмитрий Сунчугашевти

Сомда: Илбек Ада чаа араласчызы Афанасий Федосеевич Кудояр; Хакасия пазы Валентин Коновалов министрлернең паза подрядчик кiзiлерiнең чыылығ иртiрче