Пӱӱн – Россиядағы фельдшер кӱнi. Елена Кобежикова Таштып аймаандағы Чоғархы Ибiг аалда фельдшер полча. Тӧреен чирiнзер ол 2020 чылда городтаң айланған.

Аның алнында ол Ағбандағы наркология диспансерiнде тоғынған, имнег киреенде Елена тиксi 15 азыра чыл.

– Ноға Сiрер фельдшерге ӱгренерге парғазар?

– Минiң iҷем Валентина Абдуловна Почеряева (хыс фамилиязы Утимуратова) фельдшер полған, имнег киреене 50 чыл пир салған. Позы ол Боград аймаанда тӧреен, чуртаан Харатаста. 1970 чылда, Ағбандағы имҷiлер училищезiн тоозып, Чоғархы Ибiгзер кӧстег хоостыра килген. Мында пабамнаң хада хоных тӧстееннер, хайдағ-да туста Индiркi Хурлығаста чуртааннар, че 1991 чылда нандыра Чоғархы Ибiгзер кӧскеннер. Ол тусха мында наа фельдшер-акушер пунктын пӱдiр салғаннар. Пабам агроном полып тоғынҷаң, пiс аны удаа кӧрбинчеткебiс. Пiснең, 3 паланаң, ӧӧнiнде iҷем айғасчаң. Сӧбiреде, миннең пасха, Ксения пиҷем имҷее ӱгренiп алған, ол амды Сахалинде чуртапча.

Таштыптағы школаны тоосхан соонаң Елена городта чуртаан, хоных тӧстеен. Пала тӧрiткен соонаң, 28 частығда, Ағбандағы имнег-психология институдынзар кiрiп алған. Анда ол тӧрт чыл фельдшер ӱгредиин алған. Наркология диспансерiнең пасха, Елена Владимировна республиканың имнег туразындағы сосудистай кiнде iстенерге маңнанған.

Аалзар iҷезiнiң ӱчӱн килiбiскен, Валентина Абдуловна ағырыбысхан, кирiп сыххан, аның соонҷа кӧрерге тiп. Городтаң аалзар айланғаны имҷiнiң кӧңнiн кӧдiрген:

– Сах андох iнектер, сосхалар тут сыххам, городта андағ оңдай чох полған, хонҷыхтар чаратпинчатханнар. Чайғызын чахайахтар одыртарға хынчам.

– Сiрер имнег киреен таллап алған ӱчӱн хомзынминчазар?

– Чох, тоғызым кӧңнiме кiрче. Пiрее тың аар сидiксiнiс сых килзе, андағ сағыс полча. Че андағ ниме пасха даа профессияда пол парча, неке.

– Пос тусты хайди иртiрчезер?

– Маң тус кӧп тее халбинча, иб аразында хайынарға кирек. Чайғызын пиҷемнең хада отпуск тиңе алчабыс. Ол Сахалиннең килзе, палаларнаң хада Хакасияның саблығ чирлерiнҷе, кӧллерiнҷе чӧр сыхчабыс. Мин тӧреен чирiмнi чахсы пiлерге кирекпiн тiп санапчам.

Елена Владимировна iдӧк кӧс чӧрҷең ФАП-тығ неделяда пiр хати имҷi чох аалларҷа чӧрче: Иңдiркi Мадырзар, Улуғ Порзар, Харойзар, Харачулзар, Кировсар, Чоғархы Сирзер. Андағ оңдайнаң имҷiлер ыраххы кiчiг ааллар чуртағҷыларының хазиин хайраллапчалар.

Елена Владимировнаның 9 класста ӱгренчеткен хызы чуртас чолын iдӧк имнег киреенең палғалыстырарға пӧгiнче. Ол акушер-гинеколог профессиязын таллап аларға сағынча.

Сом авторни

Сомда: Чоғархы Ибiгдегi фельдшер Елена Кобежикова