«Минiң матыр ағам». «Хакас чирi» республика газетазының редакциязы чарлапчатхан марыға ызылған тоғыстарны сығарарын узаратчабыс.

Илбек Ада чаа тузында кӧп нациялығ Хызыл Армияда Хакасиядаң парған чааҷылар махачы чааласханнар. Кiчиҷек ле чирiбiстең фронтха 70 муңа чағын кiзi парыбысхан. Олардаң 31 муңҷа кiзi чаадаң айланмаан. Оларның санында 700-че кiзi хызыллар родынаң полған. Андада полған на сӧбiреде андағ чобағ полған полар.

Мин мында сӧбiремдегi улуғларыбыстаңар чоохтап пирерге сағынчам. Минiң пабам Михаил Александрович Янгулов 1915 чылда тӧреен. Чааға Ширадағы военкоматтаң хабылған. Илбек Ада чаада пастағы кӱннердең сығара фашисттернi чиңен кӱнге теере араласхан. Пабам чаада старшина званиелiг разведчик полған. Берлинге читкен паза Рейхстагта позының инициалларын пазыбысхан: «Я.М.А». Анаң хоза пасхан: «Могильная ЯМА для фашистов». Махачы чааласхан ӱчӱн ол Хызыл Чылтыс, «Слава», «Илбек Ада чаа» орденнернең паза «За отвагу» медальнаң сыйлаттырған.

Пабам чаа соонда Ширадағы военкоматтаң НКВД органнарынзар тоғынарға ызылған. Аның соонаң Хара кӧл аалдағы совхозта ферма устағҷызы полған.

Iҷемнiң харындазы Роман Алексеевич Табаткин 1926 чылда тӧреен. Ширадағы военкоматтаң Ыраххы Востоксар япон азымахчыларынаң чаалазарға ызылған. Чаа тоозылғанда, Закарпатьедегi пограничниктер отрядынзар служить поларға парған. Анда ол бандеровецтердең тоғыр чааласхан. 1951 чылда аны запасха ызыбысханнар. Роман тайымның «Победа над Германией», «Победа над Японией», «За взятие Берлина» медальлары паза «Орден Великой Отечественной войны» сыйығы пар полған. Ибiнзер айланғанда, Шарыпов городта шоферға ӱгренiп алып, Сыралығ Ӱӱc аалдағы ағас хониинда, анаң СССР-ның соох чирлерiнде шофер полып тоғынған. Соонаң Свердловск облазында харағай ағастың чуғын чыып тоғынған. Анаң Хакасиязар айланып, тынаға сыхханҷа Таштып аймаанда iстенген.

Алексей Николаевич Табаткин ағамның харындазы Фёдор Николаевич Табаткин 1922 чылда тӧреен. Сыралығ Ӱӱcтегi военкоматтаң чааға 1941 чылда ӱртӱн айында хабылған. Чаада ол лейтенант званиелiг летчик полған. Рижскай полктағы бомбардировщикте учух чӧрген. «Орден Великой Отечественной войны», «За отвагу», «За победу над Германией» медальларнаң сыйыхтатхан. Чаа соонда ол, чааҷы летчик-испытатель полып, службазын узаратхан. Демобилизация соонда ол военкоматта паспортнай столның пастығы, автошколада ӱгретчi полып тоғынған.

Iҷем Аксинья Алексеевна Табаткина тыл iстенҷiзi, Iстенic ветераны полған, трудармияда тоғынған. «За доблестный труд в ВОВ» медальнаң сыйыхтатхан. Чаа тузында Секты (Киров) аалда маллар кӧрген. Чаа соонда Шипилинскай рудникте, Сыралығ Ӱӱcтегi подхозта iнек сағҷаң ус, хадағҷы полған.

Iҷемнiң пиҷезi Елена Алексеевна Табаткина iдӧк трудармияда тоғынған, iстенiс ветераны. Чаа тузында аал хониинда тоғынған, «За доблестный труд в ВОВ» медальнаң сыйыхтатхан.

Сомнар авторның архивiнең

Сомда: пабам Михаил Янгулов, лётчик Фёдор Табаткин