Меспектiг хоккей. «Саяны» команда «Енисей» хоккей ӧмезiнең тиңни ойнабысхан. 14 азығда тоғазығ 3:3 саннаң тоозылған

Сынны чоохтаза, 14 азығда «Саянының» теестегi ойынына кӧңнiм чох парчатхам. Ол кӱн «Енисейнең» матч ирткен. Халғанҷы туста хызылчардағыларның киректерi уйан даа полза, олар пiстiңнерге сыдан саларлар тiп iкiнҷiлес чоғыл. Трибунада турып, пазох «Саянының» утырчатханын кӧрiп одыр. Че газета хығырығҷыларының аразында меспектiг хоккейге хынчатхан кiзi илееде. Олар полған на матчтың салтарларын сағыпчалар. «Саяны» хайди даа ойназа, «ағырчатхан» улустың чӱреенде командаа хыныс сообинча.

Итсе, Хакасия ӧмезiнiң халғанҷы ойыннары кӧрiгҷiлернi хомзындырғаннар. 8 азығда «Саяны» Кировтағы «Родинанаң» тоғасхан, 11 азығда – «Кузбасснаң». Пiстiңнер кемеровтағыларға унада саптырыбызарын прайзы пiлген. Амғы туста Россиядағы меспектiг хоккейде «Кузбасс» иң кӱстiг командаа саналча. Аннаңар, ойын 0:10 саннаң тоозылғанда даа, чон кiлебеен. «Родинаа» утырыс, тiзең, тарындырған. Пос чазызында кировтағыларға хайди чиңдiрҷең? Пастап кирек хомай нимес парған. Я, 8-ҷi минутада санны асханнар аалҷылар. 4 минута пазынаң пiстiңнер нандыр пиргеннер. Голны позының адына Руслан Гавричков пас салған. «Ыырҷы» ээлернi чабыра пазарға харасча. «Саянының» хаалхазынзар хоза iкi меспек учух килдi. Пастағы тайм 2:3 саннаң тоозылған. Iкiнҷi меспектiң авторы – Сергей Дёмин.

Ойынның iкiнҷi чардығында «Родина» пазох алнында парған. Оларның кӱстенiзiнең 54-ҷi минутада сан 2:4 пол парған. Хоккеисттерiбiс, ӧкпелен парып, таң, соон сӱрiстiре «ыырҷының» хаалхазынзар iкi меспек кире сабысханнар. Сан – 4:4. Сергей Дёминнең Егор Егорычевтi махтирға кирек. Че халғанҷы сӧс «Родина» соонда халған. Аалҷылар пiстiңнернi 5:4 саннаң утып алғаннар. Чиңiске iзенген кӧрiгҷiлернiң прай кӧңнi тӱскен.

14 азығда харахха тасталған: командалар ла нимес, «ағырчатхан» улус ойынға матап тимнентiр. Хоккеисттер пуста чиңiс ӱчӱн харбасчатхан аразында iкi ӧменiң кӧрiгҷiлерi кем артых хысхырарында, командаларының кӧңнiн кӧдiрерiнде марығласханнар тирге чарир. Ол сылтағнаң пятницада стадионда кӱӱлес-суулас iкi хати кӧп турған. «Саянының» хаалхазынзар пастағы меспектi кире сабысхан Сергей Ломанов, iкiнҷiзiн – Илья Лопатин. Лопатин Ағбаннаң, пӱӱнгi кӱнде «Енисейнiң» капитаны полчаттыр. Сан – 0:2. Че хомзынарға ирте. Пiстiңнер пуста харбасчалар. Трибунадағы чон iдӧк тӧдiр пазынминча. Хысхырыстарнаң хоккеисттернi «хамҷылапчалар». Кӱстенiс тикке парбады. 41-ҷi минутада сан 1:2 пол парды. Ол Сергей Максимовтың чидии. Кiзiлернiң ӧрiнiзi пу чир нимес.

Тоғазығның iкiнҷi чардығы уғаа хынығ ирткен. Iкi ӧменiң хоккеисттерi атакаа парчалар, арачыланчалар, пiрдеезi гол саап полбинча. Сан паза алыспас, неке. Михаил Лисюк аннаң чараспаан. Спортсмен, меспектi позына кирiп алып, аны пустығ чазының пiр саринаң хаалхаа теере читiрiп, 68-ҷi минутада гол сабысхан. Лисюктi «Енисейнiң» пiрдеезi тохтат полбаанында чапсыҷаң ниме чоғыл. Хоккеист андағ узун кизектi учух парыбысхан чiли пiлдiрген. Орта чоохтаҷаң Россияның саблығ тренерi Евгений Ерахтин: «Меспектiг хоккейде табырах чӱгӱр чӧрерге кирек. Ол чох чиңic тут полбассың».

Пiр секунда даа сым турбаан кӧрiгҷiлер уламох хысхыр сыхханнар. «Енисей» – пӧзiк устығ команда. Аалҷылар 73-ҷi минутада нандыр пиргеннер. Сан – 2:3. Сизiнгенде, меспектiг хоккейде матчтар сайбағлар чох иртпинчелер. «Енисейнiң» паза «Саянының» хоккеисттерi, теестезiп, ойыннаң сығардырғаннар. Пуста матч тооза iкi командада кiзi cаны тиңни полған. Че халғанҷы минуталарда аалҷылар ӧмезiнең ӱс кiзi cығардырыбысхан. Пiстiңнер, пу кирекнең тузаланып, 89-ҷы минутада санны тиңнестiрiбiскеннер. Сан – 3:3. Матч хайымнаң тоозылған. Пу тоғазығ «Саяны» команданың тархынында хаҷанға даа халар.

Ойыннарның салтарларынаң танысханда, «Енисейнiң» киректерi тың на чахсы нимес. 2 азығда хонҷыхтар «Родинанаң» тиңни ойнабысханнар. Сан – 4:4. 11 азығда «Сибсельмашнаң» тоғазығ утырыснаң тоозылтыр. Новосибирсктегiлер 5:2 саннаң чиңiп алғаннар. «Енисей» алызығлар кирексiпче. Амғы чемпионаттың ӧӧн матырына «Уральский трубниктi» санирға чарир. Пӱӱл первоуральсктағылар плей-офф ӱчӱн харбасчалар. Узы-пазына сығып аларға киректер. Пiстiң команда 13-ҷi орында, ол аннаң пӧзiк кӧдiрiл полар ба?

«Саянының» пу сезонда тӧрт ойын халған. Ӧмедегiлер, чорыхха сығып, 19 азығда «Волганаң» тоғазарлар, 22 азығда – «Стартнаң». Халғанҷы матчтар Ағбанда 26 азығда паза 1 кӧрiкте иртерлер.

Сом «Саяны» клубти