Ойын тооза харбазығ парған
07.02.2025
Хабарлар
Ікі команданың хоккеисттері прай кӱстерін салып ойнааннар
Меспектiг хоккей. 5 азығда «Саяны» команда «Динамо» хоккей ӧмезінең тоғасхан
Пістің ооллар Суперлигада ойнапчатханда, орындағы «ағырчатхан» улусха Россияның иң кӱcтіг командаларын кӧріп алар оңдай пар. Амғы туста пастағы номерлерге «Кузбасс» паза «Водник» хоккей ӧмелері саналчалар. Кемеровтағылар пылтырғы чемпионатта пір ле хати утырғаннар. Андада оларны «Водник» 6:4 саннаң чиңіп алған. 2024/2025 чылларның сезонынаңар чоохтаза, «Кузбассты» Хабаровсктағы «СКА-Нефтяник» ла утхан. Сан – 4:3. Архангельсктегі «Водник» ідӧк пірдеезіне маң пирбинче. Ӱзінҷі орын ӱчӱн «СКА-Нефтяник» паза «Динамо» командаларның аразында харбазығ парча.
«Саяны» ибде «Водникнең» ойнабызарға маңнанған. 18 кӱргенде тоғазығ 0:8 саннаң тоозылған. Пӱӱн «Динамонаң» матч cағыпча. Ол хайди иртер ни? Таныхтирға кирек, аалҷылар ӧмезінде алызығлар пол парған. Янис Бефус амды «Кузбасста» ойнапча. Ӱс хати тилекей чемпионы Алмаз Миргазов допингнең тутыр салтыр. Суперлиганың иң чахсы бомбардирінің анализтерінде остарин таап алғаннар. Хатығластар кирілген соонда Миргазов пуссар 2026 чылда ла сығар. Пылтыр кӱскӱзін «Динамоның» ӧӧн тренері Евгений Иванушкин тоғызынаң сығардырыбысхан. Ӧӧн сылтағ – команда Россия кубогында азах меетке сых полбааны. Москвадағылар чарым финалда «Водникке» 2:7 саннаң утыр салғаннар. Алында «Динамо» Россия кубогында 9 хати чиңіc тутхан.
Пір cӧснең, 5 азығда Ағбанның ӧӧн cтадионында пасха «Динамо» ойнаан. Ағаа «Саяны» матап удурланған. Санны асханнар аалҷылар. Пастағы меспек пістіңнернің хаалхазынзар 3-ҷi минутада учух килген. Хакасияның ӧмезі тӧдір пазынминча. Ӧткін арачыланча паза атакаа парча. 15-ҷі минутада сан 0:2 пол парған. «Ағырчатхан» улустың чӱреенде «Саяныға» ізеніс сообинча. Гол! Матвей Воробьев Василий Жаукеновтың хабазиинаң «ыырҷының» хаалхазынзар меспекті кире сабысхан. Стадионға толдыра хысхырыстар. Пістіңнер «Динамоға» маң пирбинчелер нооза.
Итсе, 29-ҷы минутаа сан 1:4 пол парған. Хомзынарға ирте. «Саяны» пір минута пазынаң нандыр пирген. Голның авторы – Руслан Гавричков. 29 частығ хоккеист команда ӱчӱн прай кӧңнін салып ойнапча. Ол полған на матчта гол сабызарға кӱстенче. Пастағы тайм 2:5 саннаң тоозылған.
Хакасия ӧмезінің кибір пар. Матчтың пастағы чардығында чахсы ойнабызарға, анаң ікінҷі тайм тооза тынанарға. Алай пастағы чардығында утыр салып, ікінҷі таймда «ыырҷыны» чиңіп аларына прай кӱстерін саларға. 30 кӱргенде «Сибсельмашнаң» (Новосибирск) тоғазығ пастағы сценарийҷе парыбысхан. Пӱӱн ойын олох оңдайнаң иртер бе?
Кізілер тиктең чӱрексінтірлер. Тынағ соонда ойын уламох хазыр пар сыххан. Ікі команда кӱс алынып алтыр. Аалҷылар піске гол саап пирчелер, «Саяны» нандыр пирче. Матч 5:8 саннаң тоозылған. Халғанҷы ӱс голны постарының аттарына пас салғаннар Чингис Хандамаев, Руслан Гавричков паза Сергей Дёмин.
Амғы матч пылтырғызынаң пасхалалған. 2023 чылда «Динамоның» хоккеисттері пастағы таймда пір дее кӱстенмин «Саяныға» тӧрт меспек кире сабысханнар. Аалҷыларның хаалхазы, тізең, хуруғ тур халған. Ікінҷі таймда ойын ӧткін арах пар сыххан. Салтарында пістіңнер 3:14 саннаң утыр салғаннар. Амғы «Динамоның» узы пӧзік. Хоккеисттер хада-пірге ойнапчалар, пуста конькиліг табырах чӱгӱр чӧрчелер. Че «Саянының» москвадағыларнаң тиңни ойнабызарға кӱзі чидерҷік тіп ікінҷілес чоғыл. Команданың позына киртініс читпинче полар чи.
«Саянының» амғы ойыны чонны ӧріндірген. Кізілер матч соонда пӧзік кӧңніліг тарасчатханнар. Пу тоғазығ соонда «Саяны» 13-ҷі орынға тӱс парыбысхан. Кӧрігҷілернің піреезі команда аннаң пӧзік кӧдіріл полбас тіп ухаанҷылапча. Кӧбізі команданың таңдағызына киртініснең кӧрче. Санапчам, «Саяны» 5 азығда чіли полған на сай ойнаан полза, 10-ҷы орында тудыл халарҷых. Хакасияның Россия чемпионадында ойнапчатхан пасха команда чоғыл, аннаңар «Саянының» ӱчӱн «ағырарбыс», хоккеисттерібіске киртінербіс.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
