Кибіске 319 кізі сыххан
05.02.2025
Хабарлар
Руслан Торточаков (сол саринаң) Хакасияа алтын медаль ағылған
Спорт. Ағбанда грек-рим кӱрезінҷе марығ ирткен. Анда 2008-2009 чылларда тӧреен ооллар кӱстерін сынааннар
Хакасия чыл сай саарбахтарға кӧрілген Сибирь мариин удурлапча. Чылдаң чылға араласчылар саны ӧсче. Анзын саннар хоостыра сизінерге чарир. 2023 чылда турнирде 264 кізі харбасхан, пылтыр – 269 кӱресчі, пӱӱл, тізең, кибіcке 319 оол сыххан. Олар 9 регион – Алтай паза Хызылчар крайлары, Иркутск, Новосибирск, Кемеров, Томск, Омск областьтары, Алтай паза Хакас республикалар – ӱчӱн турысханнар. Тувада грек-рим кӱрезінҷе cекциялар чоғыл. Иң улуғ команданы – 63 кізіні – Хызылчар крайы сығарған. Хакасия ӱчӱн 61 саарбах турысхан, Новосибирск облазы ӱчӱн – 52 cпортсмен. Пик хуйахтығлар Россия первенствозында аралазар ӱчӱн харбасханнар.
Грек-рим кӱрезінҷе турнирні пайрамни азарында араласхан Хакасия пазы Валентин Коновалов. Валентин Олегович, чыылған чонзар айланып, теен:
– Прайзына чиңіc алғапчам. Марығласчатхан улус, кӧрігҷілерні сіліг кӱреснең ӧріндіріңер.
Ідӧк тренерлерге паза спортсменнерге чылығ сӧстер читіргеннер Европаның iкi хати чемпионы, тилекей марииның призеры Адам Курак паза республиканың спорт кӱрезінҷе федерациязының президенті Геннадий Канзычаков.
Кӱресчілер ікі кӱн харбасханнар. 1 азығда таллағ парған, позырахта – азах мееттер. Спортсменнер 12 кӧдірімде устарын кӧзіткеннер. Иң кӧп кізі – 47 саарбах – 60 килограмм кӧдірімде кӱс сынаан, 42-ер кӱресчі 65 паза 71 килограмм кӧдірімнерде араласхан. Кибір хоостыра аар пасчатханнар аразында кізі кӧп полбинча. Че пӱӱл 110 килограмм кӧдірімде дее кибіске 16 араласчы сыххан. Анзы Сибирьдегі грек-рим кӱрезі чахсы тилiпчеткенін киречілепче полбас па.
Марығ оңдайларынҷа 18 часха читкелек улус 4 минута харбасча. Ікі минута пазынаң олар 30 секунда тынанчалар. Турнирде харахха тасталған: кӱстіг спортсменнер «ыырҷыларын» тоғазығның пастағы чардығында чабыра пазыбызарға харасчалар. Чир-суғҷыбыс Руслан Торточаковтың харбасчаң оңдайы пасха полтыр. Саарбах пір минутаҷа китенче, анаң кӱресчіні тохтат полбассың. Тиктең нимес чир-суғҷыларыбыстаң Руслан на финалға сығып алған. Азах меетте Торточаков Мухаммадамин Баймирзаевнең (Хызылчар крайы) хада харбасхан. Пастап ол 0:1 саннаң утырчатхан, соонаң «ыырҷызын» 8:1 саннаң чиңен.
Руслан Торточаков Асхыс чоғархы аалдаң. Грек-рим кӱрезінең 1-ғы класстаң айғас парир. Спортсмен Геннадий Бурнаковтың холында харбазарға пастаан. Геннадий Леонтьевич чоохтаан:
– Ӱгренҷіме ізенгем. Уғаа кӱстенҷік оолах. Ол Олимп резерві училищезiнде (техникумында) ӱгренче, 45 килограмм кӧдірімде харбасча. Амды аның тренерлері Вадим Топоев паза Юрий Боргояков. Пылтыр, мында первенствода кӱс сынап, хола медаль утхан, амды пастағы орынға сыхты. Мин аның паба-іҷезін махтирҷыхпын. Родион Валентиновичнең Евгения Алексеевнаның читі пала. Руслан иң улии. Пабазы, Русланның ӱчӱн «ағырып», Сибирьні ибір пар килген тирге чарир. Санапчам, чыл хомай нимес пасталча. Кӱрген айда Бердскте 16 часха читкелектерге СФО первенствозы ирткен. Анда ӱгренҷім Дима Тортомашев хола медаль холға кирген.
Первенствода Хакасиядаң ӱзінҷі орын ӱчӱн 8 кізі харбасхан: Владимир Меткижеков, Алексей Мамышев (48 килограмм), Алтаир Табурчинов (51 килограмм), Тимур Сульбиреков, Нурсултан Касымов (55 килограмм), Аймир Карамчаков, Рамиль Мехравар (60 килограмм), Вадим Чебочаков (65 килограмм) паза Иван Чистяков (92 килограмм). Финаллар алнында тренерлер ізенізінең ӱлескеннер: «Пис хола медаль хайди даа полар». Салтарында, пістіңнер кибіске сыхчалар, соон сӱрістіре утырчалар. Табурчинов медаль чох халғанда, прайзы ӱрӱккен. Алтаир пӧзік устығ спортсмен, хылии пик. Тоғазығны утырчадып, ол санны тиңнестірібіскен. Таблода 4:4 сан полған. Нинҷе-де секунда аразына «ыырҷызы» хоза ікі сан тоғынып аларға маңнанған.
Кӧрігҷілерні Аймир Карамчаков чӱрексіндірген. Хакас оол кибісте Михаил Степановнаң тоғасхан (Новосибирск облазы). Ікі cпортсменнің кӱзі тиң. Аймир, кибісте ӧткін хайынып, тоғазығның пастағы чардығы соонда 5:0 cаннаң утчатхан. Степанов тӧдір пазынарға хынминча. Ағаа медаль кирек. Харбазығ тоозыларына 2 ле секунда халғанда, сан 6:5 пол парған. Ол ікі секунда хайди ӱр иртті. Вадим Чебочаков морсындырған. Кибіссер сыххан, «ыырҷызын» чиңіп алған.
Пір сӧснең, кӱресчілерібіс Хакасияа ӱс медаль ағылғаннар: пір алтын, ікі хола. Россия первенствозында Руслан Торточаков, Аймир Карамчаков паза Вадим Чебочаков кӱс сынирлар. Кӱрген айында ідӧк хазна марығларына таллағны иртiбіскеннер 16 часха читкелек саарбахтар Ярослав Тумояков (тренер Степан Мамышев), Андрей Челтыгбашев (тренер Олег Сенотрусов), Данил Бурнаков (тренер Владимир Боргояков) паза Дмитрий Тортомашев (тренер Геннадий Бурнаков). Ильяс Палтушев 21 часха читкелектернің аразында Сибирь первенствозында чиңіс тутхан. Ол Александр Худяковтың паза Валентин Кольчиковтың устаанынаң харбасча. Аның арғызы Денис Чернов хола призер полыбысхан. Спортсмен Новосибирск облазы паза Хакасия ӱчӱн турысча. Пір ай пазынаң таллағны иртер Руслан Палтушев. Чиит кізі сыйыхтығ орынға сығарына ізеніс пар.
Турнирзер айланза, ол пӧзік синде ирткен. Прай чарғыҷылар пілізіп тоғынғаннар. Араласчылар кӧп тее полған ползалар, арға-мӧрій пір тыныснаң ирт парыбысхан тирге чарир.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
