Наа нацпроекттернең толдыразынаң тузаланарға
31.01.2025
Хабарлар

2025 чылда Хакасияның чолларын тыхтирына 5,3 миллиард салковай позыдылча
Сан пиріс. 27 кӱргенде Хакасия пазы Валентин Коновалов республиканың транспорт паза чол хонии министрі Олег Емелиннең тоғасхан
Олег Емелин республика пазына министерствоның тоғыс салтарларынаңар паза пу чылға транспортты паза чол хониин тилідерінҷе пӧгіннерінеңер искір пирген.
Чыл сай чолларны нааҷылирына паза тиксі тыхтирына, тротуарларны паза чол кисчең орыннарны иптиріне, тохтағларны, сиденнерні паза чарытхыны алыстырарына позыдылчатхан ахча сині хозылча. Ирткен чылда Хакасияның чол чыындызы 3,5 миллиард азыра салковайға тиңнелген. Пу чылға иң кӧп 5,3 миллиард салковай салылған.
2024 чылда 104 километр чол кӧрілген синге читірілген, ол санда нацпроект пастыра 30,6 километр, 2019 чылдаң пасти, тізең, 304 километр, ол санда нацпроектче – 262-ҷе километр.
Ағаа хоза ирткен чылда чол кисчең 152 орын, ол санда ӱгредіг учреждениелері хыринда, наа стандарттарҷа иптелгеннер, ікі перекрёстокта камералар турғызылған, хоза сомға паза видеоға суурчатхан ікі комплекс турғызылған.
Пу паза пасха тоғыстар чол чӧрізінің прай араласчыларына хорғыс чох поларын тӧстирге, саайлар санын хызырарға полысча. Аның салтары – 2024 чылда Хакасия хазнабыстың прай субъекттері аразында саайларда ӱрееннернің саны хызырылчатхан синҷе пастағы орынға сыххан.
«Аалларның тиксі тилізі» хазна программазынҷа Таштып аймааның Ибіг аалында ікі орамада чол тыхталған.
Пассажирлер саны ӧсче. «Ағбан» аэропорт ирткен чыл аразына 416 муң чорыхчаа полызығлар читірген, ол 2023 чылдағызынаң 12 процентке кӧп. Алты чыл аразына пассажирлер саны ікі хати ӧс парған.
Пӱӱл прай учуғар кӧcтеглер халған. Олег Емелиннің искіриинең, Екатеринбургка читіре субсидиялығ маршрут азары кӧрілче, ідӧк мыннаң мындар Хазан городха читіре учуғарын азарынҷа тоғыс апарылар.
2025 чылда республикада хорғыс чох паза чахсы чоллар санын ӧскіреріне, чол-транспорт инфраструктуразын иптиріне кӧcтелген тоғыстар «Чуртасха инфраструктура» национальнай проектче узарадылар. Ол Россия президенті Владимир Путиннің пастаа.
Хакасия пазы, чыылған опытха тӧстеніп, наа нацпроекттің прай оңдайларынаң тузаланарға, федеральнай кін турғысхан прай кирексініcтерні толдырарына ситкіп хайарға пӧгін турғысхан.
Алында республиканың чол чыындызында ол син ахча салылбаанын, хай син пу чылға кӧрілгенін санға алып, подрядчиктер, тоғыстарны тузында толдырып, ахчаны хорадарға киректер, чахығҷылар, муниципалитеттернің устағ-пастаа паза Хакасавтодор, тізең, олар тоғыстарын кӧрілген тусха толдырарға маңнанчатханын тӧреміл хайығда тударға киректер, соона халчатханнар чох полар ӱчӱн. Регион пазы анзына ідӧк хайығ айландырған.
Республика пазы таныхтаан, «Ағбан» аэропорттың чорыхчылар санын ӧскірерінҷе тоғысты узарадарға кирек.
Сом Дмитрий Сунчугашевти
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде