Пӧгер оңдайлар табарға
31.01.2025
Хабарлар

Сапогов аал чӧбі пазы Екатерина Лапина, Хакасия пазы Валентин Коновалов, Томыҷах аал чӧбі пазы Григорий Митюхляев тоғазығ тузында
Тоғыс чорығы. Кӱрген айының 29-ҷы кӱнiнде Хакасия пазы Валентин Коновалов Ағбан пилтiрi аймаандағы Сапогов аал чуртағҷыларынаң тоғасхан
Тоғазығ аалдағы Культура туразында ирткен. Республика пазынаң тоғазарға илееде кiзi чыылған: чиит iҷелер, школада, олған садында паза пасха даа орыннарда iстенчеткен улус, тынағдағы аға-ууҷалар. Олар республика пазына сағыссыратчатхан сурығларын пирерге, устағҷыдаң кӧнi нандырығ аларға сағынғаннар. Сурығлар пирер алнында Валентин Олегович таныхтаан, пу тоғазығ Сапогов аал чуртағҷыларынаң пастағызы нимес. Пазох кӧнi чоохтазығ апарып, аал чуртазын чахсыландырар, тилiдер сурығларны паза чӧптернi сахтапчатханнаңар искірген.
Таныхтирға кирек, тоғазығ сурығ-нандырығ оңдайнаң ирткен. Хакасия правительствозы хабазиинаң 2019 чылдаң сығара Сапогов аалда Культура туразында тыхтағ иртiрілген, олғаннарға ойнаҷаң орыннар турғызылған, кӧп тузалығ спорт площадказы пӱдiрiлген, футбол ойнаҷаң улуғ нимес ачых, орамалардағы чарытхы нааҷылалған, ӧрт ӱзiрҷең автомобиль алылған. Аал чӧбiне чол хониин чахсыландырарына 60 миллион салковай пирiлген. Республика правительствозы, орындағы ӱлгӱлернең аал чуртазын чахсыландырарынҷа тоғысты хада-пiрге апарып, оларға хабасча.
Чыылығда Ағбан пилтiрi устағ-пастааның, Сапогов аал чӧбiнiң кiзiлерi полғаннар. Iдӧк республиканың хазых хайраллаҷаң министрі Олег Ананьевский, аал хонии паза ас-тамах министрi Сергей Труфанов, транспорт паза чол хонии министрi Олег Емелин, ӱгредiг министрiнiң орынҷызы Алла Идимешева, Хакасияның Ӧӧркi Чӧп депутады Валерий Старостин паза даа пасхазы араласханнар.
Тоғазығда аал чуртағҷылары регион пазына аймах сурығлар пиргеннер. Ол санда ӱгредiг киреене, спортха, ЖКХ сурығларына, ӧрт ӱзiрҷең транспортха, чолларны тыхтирына теелчеткен, автобусха хоза тохтағ кирексiпчеткеннеңер, суғ скважиназын турғызарынаңар, специалисттерге чурт пӱдiрерiнеңер.
Валентин Олегович профильлiг министерстволарға, Ағбан пилтiрi аймааның устағ-пастаана паза Сапогов аал чӧбiнең хада-пiрге тоғынып, аал чуртағҷылары искiрген ағырсымнығ сурығларны пӧгер оңдайлар табарға чахығ пирген.
Чуртағҷылар Хакасия пазы Валентин Коноваловха идiл парған тоғыстар ӱчӱн паза азых чоохтазығлар иртiрчеткен ӱчӱн алғыстарын читiргеннер.
Сом Илона Каковани
Автор :
Наталья Тюкпеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде