Чыл амыр ирт парзын
31.01.2025
Хабарлар

Аарластығ сыйыхтарға турысхан МЧС тоғынҷылары, Валерий Тюмереков алнындағы рядта ортызында одырча
Чыылығ. Ӧӧркi Чӧптің улуғ залында сағыбаан саайларны полдыртпас паза аның салтарларын чох идерінҷе пірге хазна системазының Хакасиядағы пӧлиинің ирткен чылның салтарларынаңар паза 2025 чылға хайдағ пӧгіннер турғызардаңар чыылии ирткен
Сағыбаан саайларны полдыртпас паза аның салтарларын чох идерінҷе пірге хазна системазының (РСЧС) републикадағы пӧлиинiң мындағ чыылии чыл сай иртче. Анда республикадағы чонға хорғыс чох полары ӱчӱн нандырығлығ министерстволар, организациялар паза муниципальнай пӱдістернің устағ-пастаа араласчалар. Олар пылтыр хайдағ сидіксіністерні тобырғаннаңар искірер алнында, сӧс Хакасия пазы Валентин Коноваловха пирілген.
– Ирткен чылда РСЧС-тың Хакасиядағы пӧлиине кірчеткен прай хазна структуралары хада-пірге тоғынып, суғ тасчатхан паза ӧрттер сығысчатхан тусты піс амыр паза ипти иртiр парыбысхабыс. Анзы пістің регионда сағыбаан саайлар полдыртпас паза аның салтарларын чох идерінҷе пірге хазна системазы тӧстел парғаннаңар паза ол чахсы тоғынчатханнаңар киречiлепче. Пӱӱл сірерге ол тоғыстарны прай узарадарға кирек полар. Мин полғаныңарға ла ол тоғыс тӧреміл апарылчатхан ӱчӱн алғызым читірчем. Паза 2025 чыл амыр ирт парыбыссын тіп прайзына алғапчам, – теен Валентин Олегович.
Ӧӧркi Чӧп кнезі Сергей Сокол, чыылған улуссар айланып, пӱӱнгі кӱнде РСЧС-тың региондағы пӧлиинзер МЧС-таң пасха, ідӧк кӧп хазна структуралары кірче тіп таныхтаан. Оларның хада-пірге хайди тоғынғанынаң республика сидік тусты чахсы алай уйан иртiр парыбызары палғалыстығ. «Піс, Ӧӧркі Чӧптің депутаттары, чонның чуртазына хорғыс полбас ӱчӱн сірернiң тоғызыңарны чахсыландырарынҷа сурығларны хаҷан даа иң пастап ӱзӱр турарбыс», – таныхтаан ол.
Соонаң МЧС-тың Хакасияҷа ӧӧн устааның пастығы Александр Мулл 2024 чылда хайдағ тоғыстар апарылғанынаңар искірген. Александр Анатольевичтiң таниинаң, ирткен чылда муниципальнай синде пір сағыбаан саай Абаза городта Ағбан суғ тас сыхханда пол парған. Ол муниципальнай пӱдісте суғ, кӧдіріліп, город хыриндағы дачаларзар аххан. Хакасия правительствозы сағыбаан саайны чох идеріне, 17 чир-суғҷыбысха хабазып, 170 муң салковай позытхан. Абазаның устағ-пастаана сағыбаан саай ағылған ӱреглерні чох идеріне 3 миллион 285 муң салковай пирілген.
Ідӧк ирткен чылда регионның аалларында ӧрт сығардырбас ӱчӱн, 2023 чылдох кӱскӱзін 255 аал ибіре хыра тартылған. Прай ол полосаларның узуны 924 километрге тиңнелген.
Пылтыр Ширада ӧрт ӱзірҷең наа часть азыл парған. Амды анда ӧрт ӱзірҷең тӧрт машина чонның чуртазына ӧрт хорғыс ағылбас ӱчӱн хадағда турча. Наа ӧрт ӱзірҷең частьты азарына республика бюджедінең 68 миллион 900 муң салковай позыдылған. Паза 2024 чылда хай пірее муниципалитеттерде кӧп палалығ сӧбірелернің алай хомай пас чӧрчеткен кізілернің чурттарында ӧрт сығыс килгенiнеңер искірҷең оборудованиелер турғызылтыр. Ол тоғысха республика бюджедінең субсидия пастыра ахча позыдылған. Прай республикада 720 андағ оборудование.
Чіт парған кізілерні тілепчеткен халых организацияларына республика бюджедінең 2 миллион салковайға тиңнелчеткен грант пирiлтір.
«Защита населения и территорий Республики Хакасия от чрезвычайных ситуаций, обеспечение пожарной безопасности и безопасности людей на водных объектах» хазна программазы хоостыра аймах тоғыстарға ирткен чылда 1 миллиард азыра салковай хорадылтыр.
Ідӧк аймах муниципальнай пӱдістерге, хайзыларынаң хости суғ ахпинча, оларда ӧрт ӱзірҷең техникаа суғ тартчаң орын тимниріне 5 миллион салковай субсидия пирiлген. Аны хоостыра чонға хорғыс полбас оңдайлар тӧстелген.
2024 чылда пістің чир-суғҷыларыбыс, полызығ сурап, 112 номерге 234 муң хати сығдыраттырлар. 3340 айланыс хоостыра полызығ киректелчеткен тоғыстар апарылтыр.
Чыл салтарларына чарыдылған чыылығда чир-чайаан паза экология, ағас хонии, пӱдіріг паза ЖКХ министерстволары, Хакасияның ГО, ЧС паза ПБ устаа чоох тутханнар. Полған на хазна органы ирткен чылда хайдағ сурығларны пӧккеннеңер паза тоғыстар апарғаннаңар чарыда чоохтап пирген.
Сағыбаан саай тузында ӱстӱнде адалған министерстволар, органнар, хада-пірге чӧптезіп, чонға хорғыс полбас ӱчӱн тоғыстар апарчалар. Іди чир-чайаан паза экология министрі Владимир Лебедев пылтыр суғ тасчатхан город-аалларнаң хости прай кирек тоғыстар тузында апарылған, пістің республикада часхы паза чайғы амыр ирт парыбысхан тіп таныхтаан. Че пӱӱл ол тоғыстар хатап узарадылар тіп искірген министр. Іди пӱӱл Абаза город паза Хубачар аал хыринда суғ тасчатхан орыннарда, хазып, cуғны тирең идерлер осхас. Ол тоғысха федеральнай бюджеттең 150 миллион салковай позыдылчаттыр. Паза пӱӱл Таштып аймаандағы Кічіг Арбыт аал хыриндағы суғны арығлирына паза аның тӱбін тирең идеріне чарыдылған проект чуртасха кирiлер тіп искірген ол. Ирткен чылда чир-чайаан министерствозы чахсы тоғыныбысхан ӱчӱн Владимир Лебедев Хакасия пазының орынҷызы Юрий Курлаевтің холынаң диплом алған.
Кибір хоостыра чыл салтарларына чарыдылған чыылығда хайди даа иң чахсы паза тӱзімніг істенчеткен тоғынҷыларны сыйыхтапчалар. Пӱӱл дее андағ сыйыхтарға турысхан кізі кӧп полған. Андағларның санында Таштыптағы 61№ ӧрт ӱзiрҷең частьтың караул устағҷызы Валерий Тюмереков полча. Кӱстенҷiк ирен «Ӧрт ӱзірҷең службаның саблығ тоғынҷызы» кӧксіне хазанҷаң танығны Хакасия пазы Валентин Коноваловтың холынаң алған. Ол ӧрт ӱзірҷең службада 1994 чылдаң сығара тоғын парир, істеніс чолын олаңай тоғынҷыдаң пастаан.
– Мин тоғызыма кӧнік парғам. Амды ол мағаа аар пілдіртпинче. Тынағ кӱннерде мин ибдең ырах пар полбинчатханыма сӧбірем дее хаҷанох кӧнік парған. Ӧрттер сығысчатхан туста пістің тоғыс кӧп полча. Піс Таштыпта ла тоғынминчабыс, хости орныхчатхан аалларда даа ӧрт ӱзірерге піске удаа килiсче. Чазыларда ӧрттер сығысчатса, андада тоғыс хоостыра піс чорыхха пасха аймахтарзар сыхчабыс. Арғыстарыбысха полысчабыс, – теен Валерий Петрович.
Сом Дмитрий Сунчугашевти
Автор :
Ольга Томочакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде