Хоккей ойнап, хазыхтарын пиктееннер
29.01.2025
Хабарлар

Хоккеисттер меспекті пыласчалар
Чӧрім. Хакасия «Студент спорт хараазы» акцияа хозылған
Пістің хазнада 25 кӱргенде Студент кӱні таныхталча. Кибір хоостыра ағаа удур аймах мероприятиелер иртірілче, ол санда «Студент спорт хараазы» акция. Чӧрім тархынын 2019 чылдаң апарчаттыр. Аның ӧӧн пӧгіні – оол-хыстарны хазых чуртасха тартары. Пістің республика чӧрімге 2021 чылда хозылған. Андада Хакасия правительствозының кізілері ХГУ-ның студенттерінең мини-футбол ойнааннар. Правительство командазынаң республика пазы Валентин Коновалов устаан. Вузтың піріктірілген ӧмезі устағҷыларны 4:1 саннаң утып алған.
Пӱӱл акция ӱчӱн нандырған Олимп резерві училищезi (техникумы). Программа катанкалығ хоккейдең паза «ағырчатхан» улустың мариинаң пӱткен. Мероприятиені пайрамни азарында араласхан Хакасия пазы Валентин Коновалов. Валентин Олегович, чыылған чииттерзер айланып, теен:
– Студенттер – пістің хазнабыстың таңдағызы паза ізенізі. Сірер хайдағ даа чидіге чидер оңдайлығзар. Пу фестиваль иң ӧткіннерні, пик хуйахтығларны піріктірче. Прайзына талаан алғапчам. Пайрам тузалығ иртсін.
Катанкалығ хоккейҷе арға-мӧрій училищенің стадионында ирткен. Турнирде 11 команда араласхан. Олар аймах ӱгредіг организациялары ӱчӱн турысханнар. Пір тоғазығ 7 минута парған. «Ағырчатхан» улус чох марығ марыға саналбинча. Кӧрігҷілер турнирге матап тимнентірлер. Полған на ӧме плакаттар хоостаан, хысхырыстарны ӱгрен салған. Оларны истіп, хоккеисттер чазыда уламох чапчаң хайынчатпастар ба.
Ойынҷылардаң хайиимны тартхан Илья Сульбереков. Хакас оол Асхыс аймаандағы Апчанай аалдаң. Тӧреен тілінең матлама чоохтанча. ХГУ-ның cтуденті теен:
– Пістің сӧбіреде алты пала, мин ікінҷiзiбiн. Вузты тоосса, ОБЖ паза физкультура ӱгретчізі поларбын. Ікi специальность алчатхан ӱчӱн бакалаврға пис чыл ӱгренчебіс. Алында спорт кӱрезінең айғасхам. Пӱӱнгі кӱнде футбол паза хоккей ойнирға кӧңніме кірче. Іҷем Александра Васильевна пісті чалғызан ӧскірче. Ол аалдағы клубта тоғынча. Аҷам пуох факультеттi тоосхан. Туңмам Яна, часха кічіг полза даа, футбол ойнирға кӱс. Командада алты кізі, сағынчам, чахсы ойнабызарбыс.
Чир-суғҷыбыс орта ухаанҷылап пиртiр. Салтарында ХГУ-ның командазы катанкалығ хоккейде чиңіс тутхан. Ікінҷі орында кӧп кӧстеглiг Хакас техникумы (Харатас) пол парған, хола призер – Хакас политехническай колледжтің пӧлии (Ағбан пилтірі). Кӧрігҷілер мариинда прайзын ас парыбысханнар Олимп резерві училищезi (техникумы) паза Ағбандағы пӱдірігҷілер техникумы, кӱмӱc медальны холға кирген Коммунальнай хоных паза сервис техникумы, ӱзінҷі орынға сыххан Профессиональнай технологиялар, экономика паза сервис колледжі.
Сом Илона Каковани
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде