Ирткен чылдағы служба салтарлары кӧрілген
29.01.2025
Хабарлар
Хакасияҷа МВД коллегиязында республиканың устаа араласхан
Коллегия чыылии. Хакасияҷа МВД министрі, полицияның генерал-майоры Владимир Генералов министерствоның алғым коллегия чыылиин иртірген
Чыылығда араласханнар Хакасия пазы Валентин Коновалов, Ӧӧркі Чӧп кнезі Сергей Сокол, Ӧӧркі чарғы кнезі Олег Нарожный, республика прокуроры Сергей Фирсов, МВД-дағы Халых чӧбінің кнезі Андрей Готлиб, регионның право хайраллаҷаң органнарының устағҷылары, Хакасияҷа МВД министрінің орынҷылары, аймахтардағы МВД органнарының пастыхтары паза даа пасхазы.
Хайди коллегия чыылиинда таныхталған, 2024 чылда Хакасияның істіндегі киректер органнарынаң 9131 уголовнай сайбағ санға алылған. Анзы пис чыл мының алнындағызынаң 16 % асхынах, регионда сайбағлар сині хызырылғаны іле кӧрінче. Мындағ сайбағлар – тонағлар, тирігнең тузаланып тонағлар иткені паза оғырластар – хызырылғаны кӧзiдіглерде улам чахсы кӧрінче. Iди регионда ирткен чылда 52 тонағ, тирігнең тузаланып 8 тонағ паза 1947 оғырлас санға алылған.
Уголовнай сайбағларны ілезіне сығарғаннаңар чоохтаза, ол кӧзiдіглер Хакасияда Россиядағы ортымах синнең пӧзік, олар 52 % тиңнелчелер. Iди кізілернi оғырлаан, тирігнең тузаланып тонағ иткен, кізiлерні иреелеен, кізiнi аар палығлатхан сылтаанда, ол кізі ӱреп парған, кізее кӱл салған сайбағлар прай ілезіне сығарылғаннар.
Хакасияның полициязы право хайраллаҷаң тоғыстың ӧӧн кӧстеглерінің пірcін – хайдағ даа иділген сайбағ ӱчӱн хайди даа хатығлас поларын – чуртасха кирерге кӱстенче. Пылтыр ирткен чылларда полған 224 уголовнай сайбағны, ол санда 5 ӧдірісті ( оларның 3-i 20 чыл мының алнында иділген) iлезіне сығарғаннар.
Сағам компьютер паза телекоммуникация технологияларынаң тузаланып иділчеткен сайбағлар саны ӧсчеткені сағыссыратча. Пылтыр андағ сайбағлар саны 3416 тиңнелген, анзы 2023 чылдағызынаң 24 % кӧп. Республикада иділчеткен сайбағларның полған на ӱзінҷi сайбаа оларға килісче. Киберсайбағҷылар республика чуртағҷыларына улуғ ӱрег итчелер, аның сині чарым миллиард салковайға чит парған.
Хакасияҷа МВД кӱҷӱрлестердең тоғыр профилактика мероприятиелерін кӧп апарча. Ол тоғыс хомай нимес салтарлар ағылча: чуртағҷылар кӱҷӱрлес иділчеткенiн оңарчатхан сылтаанда, пылтыр кӱҷӱрлер 200 сайбағны читіре ит полбааннар. 390 кізі IТ-сайбағ иткен пір ӱстіг чардыхтаң кӧп андағ сайбағ iлезіне сығарылған (прай – 614), ол санда аар паза уғаа аар – 1,5 хати кӧп (саннарнаң – 427). Мындағ сайбағларны ілезіне сығарарын ӧскірчеткені хоостыра Россия регионнары аразында Хакасия иң артых 10 регион санына кірген.
Наркотиктернең палғалыстығ сайбағлардаң тоғыр кӱрезіг апарар сферада 2024 чылда пір ӱстіг чардыхтаң кӧп сайбағ iлезіне сығарылған паза пічiкке кирілген, оларның саны 1094-ке тиңнелген. Законнаң хыйыстыра айланыстаң 49 килограмм наркотик алылған, ол санда 8 килограмм «синтетика». Республиказар наркотиктер ағылчатхан 18 канал чох иділген, наркотиктернең тузаланчатхан 31 орынның тоғызы тохтадылған. Ведомствоның пастаанҷа наркотиктер садарға паза андағ пропаганда апарарға тузаланылчатхан 38 интернет-ресурс чабылған.
Пылтыр алынҷа хайығ салылған миграция киректеріне. Миграция законодательствозы сайбалчатханы 1600 хати тохтадылған, законнаң хыйыстыра килген 160 кізі хазнадаң нандыра ызылған. Законодательствоны сайбапчатхан ӱчӱн пасха ханнарның 508 кізiзiне Россиязар килер оңдайы чабылған. Хакасияҷа істіндегі киректер министрі чарадиинаң аар паза уғаа аар сайбағлар иткен ӱчӱн 5 кiзi Россия гражданствозын алдыртхан.
Полиция тоғынҷылары чонның амыр чуртазына хадылчатхан 10,5 муң азыра сайбағны тохтатханнар. Аның сылтаанда халых чон полчатхан орыннарда иділчеткен сайбағлар саны 20 %-ке хызырыл парған, андағ сайбағлар саны 1785-ке тиңнелген. Ағбанда изірік кізiлернi сағартчаң ӧнетін учреждение тоғынып пастаанда, андағлар иткен сайбағлар саны 16 % хызырыл парған.
Iдӧк улуғ хайығ салылча чоллардағы чӧрісті хорғыс чох идеріне: чоллардағы саайлар саны аның алнындағы чылдағызынаң 4,4 % хызырыл парған, iди прай 500 саай санға алылған. Оларда 48 кізі ӱреен (2023 чылда – 75 кізi). Полиция тоғынҷылары транспорт рульы кистінең 2,5 муң ізілік водительні хыйа иткеннер.
Коллегияның алғым чыылиин тоозып, Хакасияҷа МВД министрі полиция тоғынҷыларына наа чылда толдырар пӧгіннер турғысхан: читпестерні тӱзедерге паза оперативнай служба тоғызын тӱзімніг толдырарға, iдӧк сайбағлар полдыртпас профилактика тоғызын пӧзік синге кӧдірерге, иң пурнада искіріг-телекоммуникация технологияларынаң тузаланып иділчеткен сайбағлардаң тоғыр. Владимир Генералов IТ-сайбағларны ілезіне сығарарында наа оңдайларнаң тузаланарға кирек полчатханына паза ырахтын оғырластар иділчеткенінең тоғыр профилактика тоғызын апарчатса, ведомстволар аразындағы палғалыстарны тыыдарына хайығ айландырған.
Хайди полиция генералы таныхтаан, 2024 чылда апарылған чахсы тоғыс региондағы киректернi тӧреміл холда тударға хабасхан паза аны тӧбін тӱзірер оңдай пирбеен. Министр прайзын чахсы тоғыc ӱчӱн алғыстаан, службада пӧзік чидіглер кӧзітчеткен тоғынҷыларға сыйыхтар читірген.
Сом Хакасияҷа МВД-ның пресс-службазыни
Автор :
Тимнеен Николай Султреков
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
