Пастарын матап чайхадылар
29.01.2025
Хабарлар
Тоғазығ тузында
Тоғазығ. Хакасияда пу наада аарлығ аалҷылар пол парыбыстылар
Пастап оларны Л.Р.Кызласовтың адынаң чир-суғ ӱгренҷең музейде чылығ удурлааннар. Оларның хайхааннары оңнығ ла полбаан. Тохтабыстылар. Экскурсовод оларға орындағы чуртағҷылар тилекейге хайдағ таңнастығ кӧзідімнер артыс салғаннаңар амыр ӱннең чоохтапча. Пурунғы хайа-тастарда артысхан муңарлап чыллардағы пічіктерні кӧзітче, чир ӱстӱндегі иң хыйға пастығ ученайлар 300 чыл оларны хығыр полбин турғаннаңар искірче. Аның соонда аймах-пасха кӧг тиріглерінең таныстырып пастабысча.
Музейнің аалҷылары, тізең, олаңай кізілер нимес. Олар тилекейні парчан даа нинҷе-нинҷе хати ибір салған саблығ хоккеисттер паза футболисттер. Хайди тидірлер мындағ туста, кӧп чирде полғаннар, кӧп ниме кӧргеннер. Аннаңар андағ аалҷыларны таңнадып аларға сидік тіп сағынғаннар. Сынында, олар пастарын удаа чайхап салчатханнар, муңарлап чыллар Хакасияның аймах орыннарында турған пурунғы кӱргеннердең харахтарын албинчатханнар. Мындағ туста олаңай кiзiнің чуртазы хайдағ хысхаҷах полчатханын сизiнчезің.
Аннаңар даа саблығ хоккеисттер хабарҷыларнаң тоғасчатхан туста постарының чоохтарын орындағы музейде хайдағ паалаҷаа чох ис-пай чыыл парғаннаңар пастааннар. Аалҷыларның прайзы даа мында пастағызын на. Ол сылтағнаң Олимп ойыннарында сыйыхтығ орынға сыххан Андрей Николишин дее, Европа мариинда хола медальға турысхан футболисттер Дмитрий Сычев паза Роман Широков таа тың хайхааннарын чазырбинчатханнар.
Республика музейінде олар, Шира аймаанда чыл сай иртірілчеткен марығда аралазарға киліп, аалҷы полғаннар. Шира аймаандағы ӧӧн курорттың им кӧлнің суу хысхызын тооп парча. Аннаңар анда айас тигір алтында стадионнар тимге сыхчалар тирге чарир. Ол марығ «Шира кӧл кубогы» адалча. Анда аралазарға шайбалығ хоккей ойнапчатхан командалар чыылысчалар. Тоғазығлар уғаа хазыр оңдайда иртчеткенін хабарҷыларнаң тоғасхан туста прай даа аалҷылар таныхтааннар. Улуғларның паза олғаннарның командалары ӧӧн сыйыхты холға кирерге матап сіренчелер.
– Таныхтирға кирек, кӧрігҷілер саны, хайдағ даа кӱн полза, кӧп поладыр. Сіліг ойынны орта паалапчалар, че постарының командалары ӱчӱн матап «ағырчалар». Сӧбіренең килглепчеткеннер дее пар, – ӱлесче позының сағыстарынаң саблығ телекомментатор Денис Казанский.
Оңарылыстығ, андағ аалҷы Шира кӧлде шайбалығ хоккей марии хайди хазыр ирткеннеңер тиксі Россияа искірер. Олох арада Денис позы даа шайбалығ хоккей ойнирға хынча, марығда хайди даа араласча. Нанҷы-арғыстарынаң хада Ширазар килзе, марығда аралазып, маңат тынанып алчатханын таныхтирға ундутпинча, ибіркі чир-чайаанны махтапча.
– Ноға піс Шира кӧлде шайбалығ хоккейҷе марығ иртірерге чарадыбысхабыс? Мында кӧп команда араласчатханы чахсы. Олох арада піс орындағы палаларнаң тоғазығлар иртірчебiс. Хазнабыстың ыраххы даа пулуңнарында шайбалығ хоккейні тилідерге кирек, – чоохтаан Олимп ойыннарының призеры, саблығ хоккеист Андрей Николишин.
21 – 24 кӱргенде «Шира кӧл кубогы» марығда Иркутск паза Томск областьтарының, Алтай, Хызылчар паза Забайкальск крайларының, Туваның, Бурятияның паза Хакасияның командалары араласханнар. Беларусьтаң спортсменнер полғаннарох. Чиңic тударға прайзы даа парчан узын, кӱзін салған. Кибірге кір парған арға-мӧрій прайзына даа улуғ ӧрініс сыйлаан, спортнаң айғазарға, хазых чуртас апарарға кӧӧктірген. Уламох олғаннар марығлар тузында стадионнардаң хыйа парбинчатханнар, азыранарға даа ундут салчатханнар. Тынағ тузында пістің саблығ хоккеисттерібіс, мындағох марығларда аралазып, устарын таптааннарын сағысха киргеннер. Кем пілер, арса, мыннаң даа пастирлар улуғ спортсар пастағы хаалағларын пірее оолағастар.
Таныхтирға кирек, пӱӱл пу марығ Илбек Чиңicтің 80 чылына чарыдылып иртірілген.
Сом Л.Р.Кызласовтың адынаң чир-суғ ӱгренҷең музейнің сайтынаң
Автор :
Анатолий Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
