Олар чиңісті чағыннатчалар
29.01.2025
Хабарлар
Волонтёрлар чааҷыларның сурынызы хоостыра хысхы чӱленҷең сетьтер ӱрчелер
Матырлар тузы. 2022 чылдаң сығара Харатас городта «Подари тепло солдату» волонтёрлар чӧрімi тоғынча. Аның араласчылары тынағ кӱн чох таа чааҷыларыбысха кирек ниме-ноо тимнепчелер паза чӱленҷең сетьтер ӱрчелер
Ӱс чыл мының алнында ӧнетін чаа операциязы пасталыбысханда, пістің хазнабыста прай даа чонның чуртазы кинетін алыс парған. Чуртағҷыларның сағызы, кӧңні дее алысхан. Ир чоныбыстың ӱчӱн сағыссырапчатхан улус оларға полыс пирер оңдайлар тілеен. Іди хазнабыстың аймах пулуңнарында полызығ пирҷең фондтар, чӧрімнер, ӧмелер тӧстелгеннер. Харатас городтың чуртағҷызы Елена Картина даа, посха орын таппин, чааҷыларға хайди полыс пирҷең тіп чӱрексеен. Аның пос городында фронтха полысчаң ӧме тӧстирдеңер сағыс тӧреен. Че олох туста ипчі ол тоғысты апарарға аның кӱзі чидер бе тіп ікінҷілеен. Елена сағызынаң хада хонғанынаң ӱлескенде, апсаа Юрий чааҷыларға хайди даа полызарға кирек тіптір.
Ол чоохтазығ соонаң Елена, ікінҷілес чох городтың ӧткін чуртағҷыларын піріктіріп, «Подари тепло солдату» пос кӧңнінең чааҷыларға полысчаң чӧрім тӧстеен. Ипчінің хайдағ даа пастаана хада хонғаны чӧлег полча.
2022 чылның ӱртӱн айында Харатастағы чӧрім тоғынып пастаан. Че ӧткін улусха, чыылызып, хада-пірге тоғынҷаң орын кирек полған. Андада Елена городтың устағ-пастаанзар оларға орын таап пирерге сурыныснаң айланған. Аның сурынызы хоостыра чӧрімге «Луначарский» кинотеатрның ікінҷі хадылында орын пирілген. Анда чыылызып, чӧрімге хозылған чон чааҷыларға посылкалар тимнеп пастаан. Ідӧк ипчілер Чир-суубысты арачылапчатхан иреннерге хамзоллар, істіне кисчең кип-азахтар, чаада киректелчеткен ӧнетін хурлар, рюкзактар тігіп пастааннар. Госпитальларда имненчеткен чааҷыларға ідӧк прай киректелчеткен кип-азах тікчелер. Чоохтирға кирек, госпитальларнаң олар тӧреміл тоғынчалар. Пірееде чааҷыларның айланызы хоостыра прай кирек нимелерні табырах садызып алып, госпитальзар посылка ызыбысчалар.
2023 чылның хосхар айынаң сығара чӧрім араласчылары чӱленҷең сетьтер ӱр сыхханнар. Пӱӱнгі кӱнге Харатастағы волонтёрлар фронтсар 500 азыра сеть ызыбысханнар. Ирткен чылда, тізең, 340 сеть.
– Чӱленҷең сетьтерні піс чааҷылар сурынызы хоостыра ӱрчебіс. Анаң оларны фронтсар позывнойлары хоостыра гуманитарнай полызығны чыыр пірге пункт, «Опора», «Русич» фондтар пастыра алай Россия почтазынҷа ысчабыс, – чоохтапча чӧрім араласчызы Ольга.
Ольга чӧрімге 2023 чылның хосхар айында хозылтыр. Ол тустаң пасха ирен-ипчілернең хада чӱленҷең сетьтер паза ӱгре тігерге киректелчеткен ӱӱҷiк тамаан, iдӧк фрукттарны хурудып, чааҷылар чиизін тимнепче. Чӧрімнің хай пірее араласчылары 2022 чылдаң сығара чааҷыларға носкилер, хамзоллар, пилге хурчанҷаң хурлар палғапчалар.
Пӱӱнгі кӱнде Харатастағы чӧрімге пасха даа организациялар хозылчалар. Іди Харатастағы отрасльлар технологиялары техникумының студенттері фронтсар хамзоллар, істіне кисчең кип-азахтар паза палғаан хурларға ис чапсыра тікчелер.
Хайди таныхтапча волонтёр Ольга, пістің хазнада кӧп кізі чааҷыларның ӱчӱн сағыссырапча. Іди кинотеатрдаң ырах нимес тоғынчатхан пірее ипчілер чӱленҷең сетьтернi ӱрерге обед тузында кил парчаттырлар. Андағ оңдайнаң олар чиңісті чағыннадарға кӱстенчелер. Хай піреезі, тізең, Ағбаннаң тынағ кӱннерiнде сыбыра килче осхас.
Харатастағы чӧрім араласчылары, тыс пілбин, тоғыстарын тӧреміл апарчалар. Пӱӱнгі кӱнде анда 200-ке чағын кізі араласча. Ӱр ниместе чӧрімге Пригорсктың чуртағҷылары хозылғаннар. Маң чох таа полза, Елена андағы ипчілерге хайди даа полыс пирерге кирек тіп чараттыр. Амды чӧрімнің устағҷызы Пригорсктағы ипчілерні чӱленҷең сетьтер ӱрерге ӱгретче.
– Ол улуғ тоғыс. Елена мында піснең айғасча. Амды ол Пригорсктағы ӧткін ипчілерні прай тоғыстарны орта апарарға ӱгретче. Пір кічіг сетьтің узуны пис метр. Улуғларның сині 5*15 паза 8*20. Улуғ сетьтер піріктiрілген кічіг сетьтердең пӱтчелер. Чоохтирға кирек, пістің чааҷылар оларға пірер ле нимес сеть ыс пирерге сурынчалар. Оларның саны илееде кӧп. Кӧрілген тусха оларны тимнебізерге маңнанминчатсабыс, андада піс, прай араласчыларны хығырып, харааға даа теере мында одырчабыс. Андағ киректер пол парчаох. Че піс пілчебіс, олар чааҷыларны ыырҷыдаң арачылапчалар. Аннаңар уламох кӱстеніп тоғынчабыс, – чоохтапча волонтёр.
Харатастағы чағбан чӱректіг ипчілернең тоғасханымда, мағаа Еленанаң танызып аларға оңдай полбаан. Ӧткін ипчі тоғынҷаң кӱннерде ӧӧн тоғызында істенче. Че аның тынағдағы ӧӧрелері, кинотеатрның ікінҷі хадылында тӧреміл чыылызып, тоғыстарын тохтағ чох апарчалар. Пенсиядағы ипчілер андар тоғысха чіли кӱн алыстыра чӧрчелер. Тоғыстарны фронтсар табырах арах ызыбызарға кирек полза, олар кӱннiң сай анда сетьтер ӱрчелер. Харатастағы ӧмеде ідӧк тынағдағы иреннер пар. Оларға даа анда тоғыс асхынах нимес. Иреннер прай тоғысты пастапчалар. Анатолий паза Сергей чӱленҷең сетьтернi прай саринаң эмекнең палғабысчалар. Анаң на ипчілер тоғыcха чапсынчалар. Чӱленҷең сетьтi тимнепчетсе, олар ідӧк Худай сӧзін хығырчалар. Хайди таныхтапча волонтёр Ольга, чӧрімге кірчеткен ипчілернiң дее чағыннары СВО-да араласчалар. Піреезі, улуғ ачырғасха, постың иң чағын кізізін анда чідір салған. Че чобаға урунып таа, олар пасха чааҷыларға полызарын тохтатпинчалар.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
