Сынны кӧзідерге
29.01.2025
Хабарлар
Тарифтер. Чарытхы ӱчӱн тӧлег хайди саналары ӱзӱрілген
Хакасия пазының орынҷызы Юрий Курлаев республиканың ЖКХ министерствозы, тарифтерні хайығда тутчаң хазна комитеді, «АтомЭнергоСбыт» АО-ның Хакасиядағы пӧлии, «Абаканэнергосбыт» ООО паза «Хакасэнерго» пӧлии устағҷыларынаң чыылығ иртірген, хайзында тураларын чарытхынаң тузаланып чылытчатхан чуртағҷыларға чарытхы ӱчӱн тӧлегні саназа, аның хоратхан синін санға алардаңар чоох парған.
– Чарылған тарифнең тузаланар сурығ – ол сидік паза кӧп оңдайлығ пӧгін, хайзын ситкіп пӧгерге кирек. Аннаңар пу сурыға хайығ тартчатханнарны прайзын пір стол кистінзер чыып алдыбыс. Тӧлеглер закон хоостыра саналарынаң пасха, ідӧк сынны кӧзіткені піске танығлығ полча. Піс полған на чуртағҷаа сынны читір пирерге кӱстенчебіс.
2025 чылның кӱрген айының пастағы кӱнінең сығара, чылығ пирҷең туста тураны чарытхы полызиинаң чылытса, пастағы льготалығ син айда 7020 киловаттха тиңнелче паза чуртты чарытхынаң чылытпинчатса – 3900 киловаттха. Ікінҷі син айда 10800 киловаттха тиңнелче, чуртты чарытхы полызиинаң чылытса паза 6000 киловаттха, чарытхынаң чылытпинчатса. Аннаң кӧп хорадылған чарытхы «коммерческай» синҷе саналар.
Чарытхы айда 3900 киловаттаң кӧп хорап парза, чарытхы читірҷең организациязар ЕГРН-наң чуртха искіріг, льгота синін ӧскіреріне, чуртта чарытхынаң чылыдар установка парынаңар пічік (техническай паспорт, техническай план, техническай сан пиріс, УТИ-даң пічік) ағыл килерге кирек. Кирексініс полза, специалисттер чорыхтығ сыныхтағ иртірібізерлер.
Потребительлер кирек пічіктерні ағылбазалар, чарытхы ӱчӱн тӧлег кӱрген айы ӱчӱн саналза, айда 3900 киловатт син тузаланылар. Азығ айының 25-ҷі кӱніне теере адалған пічіктер кірзе, чарытхыны читірчеткен организация чарытхы ӱчӱн тӧлегні хатап санап пирер, – пас салған Юрий Курлаев Tеlеgram-каналында.
«АтомЭнергоСбыт» АО-зар пічіктерні компанияның офизінзер посха ағыл килерге алай АтомЭнергоСбыт мобильнай приложение алай пос кабинеді пастыра пічiктернің электроннай хобырғанын онлайн сервис пастыра ыс пирерге чарир. Тариф сині паза чарытхы ӱчӱн тӧлег хайди саналчатханы хоостыра сурығларҷа контакт-кіннің пу телефон номеріне сығдырадарға чарир: 8(3902) 24-84-64.
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
