Ирткен неделяда Хакасия пазы Валентин Коновалов "РадиоИскатель" радионың кӧні эфирінде араласхан. Сурығларның пірсі хазна ӧдізіне теелген. 

 – 2018 чылда кічіг хырлас айында табылғанда хазна ӧдізі 26 миллиардча салковай полған, ол хазна ӧдізінің 42 проценті пӧзік процент ставкалығ коммерческай алым полған, – чарытхан Валентин Коновалов. –

Мин турғысхан ӧӧн пӧгіннернің пірсі полған – хазна ӧдізінең тоғынары: 

аның пӱдізін иптебізерге, тӧлеглер синін хызырыбызарға – піс ол пӧгінні толдырыбысхабыс. 

Сидіксіністерге кӧрбин, піс хазна ӧдізінің тиксі пӱдізінде коммерческай чардыхты 5 миллиард салковайға читіре хызырып алғабыс. Пӱӱнгі кӱнде хазна ӧдізі хозыл парған паза 28 миллиард салковайға тиңнелче.

Йа, піс хазна ӧдізін кӧріндіре хызыр полбаабыс, ағаа хоза піс пазох сидік оңдайларға кір парғабыс – мин хара тастаңар даа, алюминийдеңер дее чоохтаам – че 2018 чылда пістің хазна ӧдізібіс, 25 миллиард салковай, пос парызының 136 процентіне киліскен. Пӱӱнгі кӱнде 28 миллиард салковай хазна ӧдізі – пос парыстарының 82 проценті. Ідӧк хазна ӧдізі пӱдізінде кредиттер санын 18 процентке хызырып алғабыс.

Алында, 2017-2018 чылларда, тӧлеглерге чылда 2,5 миллиардча салковай парыбысчаң полза, амды чӱзер миллион салковай хоратчабыс, ол, тізең, нинҷе-нинҷе хати тӧбін. Ниме ӱчӱн хызырылған? Ӧӧн чардығын ниик бюджет кредиттеріне алыстырып алған сылтаанда. Йа, кредит орнына тӧреміл кредит аларға, аны ниик оңдайлыға алыстырарға килісче. Кӧзідімге, чыл тоозылчатханда, бюджет законодательствозына тӧстеніп, 3,8 миллиард салковай коммерческай кредит аларға киліскен. Піс  аны пір айға алғабыс, че аннаң пір ай даа тузаланмаабыс, кӱрген айы пасталчатханда, аның орнына бюджет кредидін алып алғабыс.

Йа, хазна ӧдізінің сині 2017-2018 чыллардағызынаң алыспаан, ол алындағы правительствозының халған ис-пайы. Че пӱӱн піс хазна ӧдізіне хай-хай асхынах хорадынчабыс, алты чыл мының алнындағы хорадығларнаң тиңнестірзе. 28 миллиардтың 23-і – 0,1 проценттіг ниик бюджет кредиттері, ол, тізең, регионға ідӧк туза ағылча.

Коммерческай кредиттернің тузазы чоғыл, анзын мин азых чоохтапчам, че піс халған 5 миллиард салковай коммерческай кредитті бюджет кредидіне алыстырарынҷа тоғыс апарчабыс.