Ӱгренерге хаҷан даа орай нимес
24.01.2025
Хабарлар
ХГУ-ның хакас пӧлииндегі пастағы курстың студенттері Роман Таштандинов, Виктория Чебодаева, Анастасия Кольчинаева, Лейла Бозыкова паза Вадим Идимешев
Таңда – Россияның студенттер кӱнi. Н.Ф.Катановтың адынаң Хакас хазна университедiнiң филология паза искусстволар институдының хакас кафедразындағы пастағы курстың студенттері пастағы сыныхтағларын иртчелер. Анда 20 азыра оол-хыс ӱгренче
Чииттер ӧӧнiнде Асхыс аймаанаңнар, кӧбiзi институтсар колледж соонаң ӱгренерге килген. Виктория Чебодаева Асхыс чирiндегi Таштып пилтiрi аалдаң. Ол ӱгренерге паза сӧбiренең айғазарға маңнанча.
9 класс соонаң Олимп резервi училищезiнзер (техникумынзар) «Администратор» кӧстегҷе ӱгренерге кiрген. Специальность хоостыра тоғынарға килiспеен. Чиит хыс Асхыстағы 18 № училищеде ӱгредиин узаратхан. Анда ол «Каменщик, бетонщик» специальность алған. Чиит кiзее тимiр чолда тоғынарға килiскенӧк. Ол, хадағҷы полып, Ағбанда вагоннар хадар турҷаң.
Анда-мында ӱгренiп, аар тоғыстар толдырып, Виктория пӧзiк ӱгредiг кирек тiп салтарға килген.
– Школа соонаң кӧп тус ирт парған сылтаанда хатап ӱгренiп пастирға сидiк пiлдiрген, улам ХГУ-зар кiрер алнында экзаменнерге тимненерге. Че мин позыма пӧгiн турғысхам, вузсар кiрiп аларға, ӱгренерге. Аннаңар кӧп тимненгем. Сыныхтағларны прай иртiп алғаныма матап ӧрiнгем, поғдархастығ даа пiлдiрген, че соонаң орта хаалағ иткенiмде iкiнҷiлеп сыххам. Минiң ӱс пала нооза, улии пизiнҷi класста ӱгренче, кiчии олған садынзар чӧрче. Ӱгренерге паза сӧбiре тударға сыдан поларбын ма тiп чочын сыххам. Че хонғаным мағаа чахсы хабасхан, ам даа полысча. Аның ӱчӱн ағаа хаҷан даа алғызым читiрчем. Мин тоғынминчатханда, ол ахча тоғынар сурығны прай позына алып алған, кiчиин, олған садынзар апарып, ағыл килче.
Иирлерде iкi палама ибдегi тоғыстарын толдырарға полысчам, ирiм кiчиинең айғасча, иб аразында хайынча, чиис тимнепче, – чоохтапча студент.
Виктория Чебодаева ӱгредiге нандырығлығ хайчатханда, зачеттарын прай маңнаныстығ тудып алған. Пастағы экзаменнi «автоматнаң» алған. Хайди ол позы тiпче, студент кӱстенчетсе, иртiрбин чӧрчетсе, ӱгретчiлер аны санға алчалар, iдӧк чахсы паалағлар турғысчалар. Андағ студенттер стипендияны даа чахсы алчалар. Ол, тiзең, хомай нимес.
– Сӧбiренi тударға паза ӱгренерге аар нимес полтыр. Олған садында орыннар пар, андар палаларны кiчiгдең ала аларға тимделер. Чахсы азырапчалар. Аннаңар пичелленмин ӱгренчем. Пiстiң группа ынағ чуртапча. Ӱгренерге ниик чӱрекнең чӧрчебiс, кӧңнiме чатча, занятиелернi иртiрбеске кӱстенчем, пала ағырбаза ла, кӱннiң чӧрчем, – хосча пастағы курстағы студент.
Мына мындағлар амғы студенттер. Профессия аларға, сӧбiренең айғазарға маңнанчалар, хайзылары ағаа хоза тоғынчалар.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
