Оларның чайаачызында чонның ис-пайы кӧзіділче
24.01.2025
Хабарлар
Кічіг хоосчыларның тоғыстарынаң кӧрігҷілер танысчалар
Кӧзідіг. С.П.Кадышевтің адынаң чон чайаачызының национальнай кінінде ӱс аймах кӧзідіг тоғынча
Чон чайаачызының национальнай кіні 2025 чылны ӱс хайхастығ кӧзідігнең асты. Улуғ залдағы «Тилекей олғаннарның хараанаң» кӧзідігде Ағбандағы 1 № олған искусство школазының ӱгренҷілері тоғыстарынаң кӧрігҷілерні таныстырчалар. Хости орныхчатхан залда ус холлығ ирен-ипчілерібістің чайаачы тоғыстары чон алнына сығарылғаннар. Культура кінінің ікінҷі хадылында, тізең, чиит сомҷы Иван Зиновьевтің пастағы кӧзідии азылған.
Кибір хоостыра, хайдағ даа кӧзідіг азылар алнында авторлар, пайрам иртiрілер алнындох чыылызып алып, чон хайиина сығарылған тоғыстарын ӱзӱрчелер, паалапчалар. Пу даа кӧзідіглернiң чайаачылары ол кибірдең хыйа парбааннар. Олар, культура кінінде азынада чыылызып, тоғыстарынаң удур-тӧдір таныстырғаннар. Аннаңар пайрам пасталар алнындох учреждениеде чон илееде полған. Олар, хоостарны, сомнарны паза ус холлығларның хайхастығ тоғыстарын кӧріп, удур-тӧдір сағыстарынаң ӱлесчеткеннер. Кічіг хоосчылар ідӧк ӱгретчілерінең хада кӧрiстерiнең алысханнар.
Пастағы кӧзідігде тиксі 20 азыра чайаачы паланың аймах сырлардаң толдырылған тоғызы сығарылған. Олар Наа чылға, Хакасияның хайхастығ орыннарына, кип-чоохтарына чарыдылғаннар. Хай пірее чайаачы ооллар графика оңдайынаң хоостапчаттырлар. Хайди таныхтаан искусство школазының хоос пӧлиинің устағҷызы Надежда Яковлева, оларның школада прай 285 пала ӱгренче, хоосчылар пӧлиинде 40 олған узын алғытча. Кӧзідіге 11 – 16 частығ ӱгренҷілернің тоғыстары сығарылтыр.
– Полған на кӧзідіг – ол ӱлӱкӱн. Олғаннар аны хаҷан даа чидікпин сағыпчалар. Кӧзідіг палаларға постың чир-чайаанға кӧрізін пасхазына читір пирерге оңдай пирче. Аннаңар олар ағаа матап тимненчелер, – теен ӱгретчі.
Кічіг хоосчыларның тоғыстарын кӧріп, оларның кічіг чир-сууна хынызын кӧрерге чарир. Палалар хоостары пастыра кӧрігҷілерні Хакасияның прай даа саблығ орыннарынаң таныстырчалар. Мария Бугаева «Узупчатхан Саян» хоозында хакас чонның кип-чооғын чахсы кӧзiт салтыр. Хызыҷах аны книга хығырған соонда чайаптыр. Ол хоозында узубысхан алыптың ибіркі сіліг чир-чайаанын кӧрігҷілерге читір пирерге пӧгінтір. Мария искусство школазында пастағы чылы ӱгренче. Чайаачы хызыҷах ідӧк кізілерні хоостирға хынчаттыр. Че портреттернi чайирға узы ам даа читпинче тіп хомзынча ол. Надежда Яковлева, аның сӧстерін ис салып, андар пастыр киліп, хомзынма, соонаң ӱгреніп аларзың теен ағаа.
Олғаннар хоостарының кӧзідии иртчеткен орыннаң хости фойеде ус холлығ чоныбыстың пос холынаң чайалған 200 азыра тоғызы сығарылған. Ниме анда кӧр таппассың! Чайаачы холлығ улузыбыс ниме ле сағынып албинчаттыр! Пірсі пірсінең сіліг поғолар, нанҷыхтар, ілҷірбелер, ызырғалар харахтарны матап ӧріндірчелер. Сибер холлығ ипчілер аймах ӧңніг нинҷілердең хайдағ пасхаҷыл хоостар иске салчаттырлар. Олар піске ӧбекелерібістің кӧрізінеңер чоохтапчалар. Оларны кӧріп, чӱрек ӧрінче.
Ирина Мишарова киистең аймах кӧклӧлер, пӧріктер, кип-азахтар чайапча. Чоохтирға кирек, кииснең тоғынарға оой нимес. Че ус холлығ ипчі мал тӱгін аймах ӧңніг кииске пір-ікі ле айландырыбысча. Ол тоғысха кӧп кӱс хорадарға кирек. Ирина Владимировна, тiзең, хынған тоғыснаң айғасчатса, анзы пілдіртпинче паза тоғыс идiл парза, ӧрініс ағылча тіп таныхтапча.
Культура кінінің ікінҷі хадылында чиит сомҷы Иван Зиновьевтің тоғыстарынаң танызып аларға чарир. Чиит иреннiң пастағы кӧзідии «Искусство форм и линий» адалча. Иван кічігдеңӧк сығара ах-хара ӧңніг сомнарға хынча. Аннаңар аның тоғыстары мының алнындағы сомнарға тӧӧйлер. Хайди таныхтапчалар улуғ опыттығ сомҷылар, ікі ле ӧңніг портреттер пастыра матырның хылиин, кӧңнін кӧрігҷее читір пирерге сидік. Че, Иванның кӧрізінең, ах-хара сомнар кӧрігҷее сағысха тӱзерге оңдай пирче. Кӧзідімге, матырның кип-азаа хайдағ ӧңніг, аның харахтарының ӧӧн дее посха сағынып аларға чарир.
Пу хайхастығ кӧзідіглернең Ағбан городтың полған на чуртағҷызына, аалҷызына тикке танызып аларға чарир. Олар С.П.Кадышевтің адынаң культура кінінде 2025 чылның азығ айының 28 кӱніне теере тоғынарлар.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
