Пӱӱл пастағы «фура» чорыхха сығыбысты
24.01.2025
Хабарлар
Волонтёр-студенттер фураа мотоциклні таарлапчалар
СВО араласчыларына полызығ. Ағбаннаң ӧнетін чаа операциязында араласчатхан чааҷыларға паза ДНР-ның, ЛНР-ның чуртағҷыларына пу чыл пастағы гуманитарнай полызығ ызылған
Ӧнетін чаа операциязы пасталғаннаң республиканың чуртағҷылары, пістің чааҷыларға гуманитарнай полызығ, чыып, ысханнар. Полызығ чыырында Хакасияның министерство-ведомстволары, предприятие-учреждениелер ӧмелері, идінҷектер, халых пірігістері паза олаңай чуртағҷылар араласчалар. Республиканың прай чоны мындағ полызығлығ мероприятиелерде араласча тізе, пір дее саба полбас.
Хайди таныхтаан «Россияның Афганистан паза ӧнетін чаа операциялар ветераннары пірігізінің» региондағы пӧлиинің устағҷызы Александр Векшин, республикадаң пастағы гуманитарнай полызығ Омск облазындағы полигонзар ызылған. Чардыхти мобилизацияҷа хығыртылған Хакасияның чааҷылары анда азых чазыда чаалазарға тимненіс иртчеткеннер, андох олар палаткаларда чуртааннар. Оларға чылығ кип-азах, узуҷаң чылығ хаптар, чорғаннар, матрастар, чылытчаң пушкалар, палаткалар, генераторлар паза даа пасха ниме-ноо кӧп киректелген. Чааҷылар СВО зоназынзар ызылған соонда, пастағы туста полызығ ызар адрестер чох таа полғаннар, анаң, ол киректер иптел парғанда, гуманитарнай полызығ сыбыра ызыл турған.
Гуманитарнай полызығ чыыпчатхан пункттың cклады алнында узун «Сканиа» фура турған. Складта аймах ниме-ноо кӧп чыыл партыр, оларны Олимп резерві училищезiнің (техникумының) студенттері фуразар таарлапчатханнар. Олар, ікі шеренгаа турыбызып, чӱленҷең сетьтерні, тактика носилкаларын, чылығ кип-азах паза даа пасха ниме-ноо таарлап турғаннар. Iди пір мотоциклні (аны iдӧк «скутер» адапчалар) нинҷе-де кізі, холнаң кӧдіріп, фура істінзер кирген. Андағ мотоцикллер СВО зоназында пiстің штурмовиктер ӧмелеріне табырах ойладарға уғаа кирек полчалар.
Iдӧк тасхар, склад алнында ызыларға тимде турчалар камуфляж ӧңніг «ГАЗель» паза УАЗ автомобильлер. Оларны тимір чол платформаларында апарарлар. СВО зоназында хайдағ даа техника артых полбинча. Склад істінде таарлирын сағып турчалар генераторлар, чылытчаң пушкалар, кӧні чааҷаа пазылған посылкалар. Пістің волонтерлар чааҷыларға чазынҷаң кӧп сетка тимнеп салтырлар, оларны ӧӧнінде ипчі чон тимнепче нооза, аннаңар iди пос кӧңнінең полысчатханнарға улуғ алғыс читірерге кирек. Олар пістің чааҷыларның чуртастарын ал халчалар. Iдӧк алғыс сӧстерін читірерге кирек Олимп резерві училищезінің студенттеріне, хайзылары полған на сай гуманитарнай полызығны ызарында араласчалар.
Полызығ чығҷаң пунктта прай тоғыстарнаң устапчалар Хакасия пазының орынҷызы Владислав Мингела, Александр Векшин паза студенттернің ӱгретчілері.
Тоғыс аразында Владислав Мингела регион устағҷызы Валентин Коноваловтың чахиинҷа СВО араласчыларына гуманитарнай полызығ чыырында пос кӧңнінең ӧткін араласчатхан чуртағҷыларға Хакасия пазының алғыстас пiчіктерін читірген.
– Пӱӱл піс ӧнетін чаа операциязында араласчатхан чааҷыларыбысха пастағы гуманитарнай полызығ ысчабыс. Аны чыырында республиканың прай даа чоны араласча. Улуғ алғыс прайзына. Амды СВО зоназынзар дрон-разведчиктер, дрон-камикадзелер ысчабыс. Олар пістің штурмовиктерге уғаа киректер. Iдӧк чуртағҷылар палаткалар, чылығ кип-азах, узуҷаң чылығ хаптар, блиндажтарда, окоптарда тузаланҷаң свечілер тимнеп салғаннар. Автомобильлер ызарға тимнелгеннер, мотоцикллер дее штурмовой отрядтарға тың киректер.
Донбасстың чуртағҷыларына даа таарлағ ысчабыс. Пу пістің 30-ҷы фура ызылча, полғанында ла – 20-ҷе тонна таарлағ. Тимір чолҷа iкi платформа ысхабыс, 100-че машина ызылған. Гуманитарнай полызығлығ ікі фура Курск облазының чуртағҷыларына ызылған, – чоохтаан Хакасия пазының орынҷызы.
Таныхтирға кирек, ікi чыл артиинаң Хакасия СВО араласчыларына пір муң тонна азыра гуманитарнай полызығ ызыбысхан. Хайди чоохтаан полызығ ызарында сыбыра араласчатхан Хакасияның ГО, ЧС паза ПБ хазна комитедінің кнезі Владимир Карамашев, полған на партия – пістің арачылағҷыларыбысха уғаа кирек хозым. Хада-пірге тудынып, піс Чиңicті чағдатчабыс.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
