Пӱӱн Хакасия пазы Валентин Коновалов Студенттер кӱнi алнында Харатастағы тағ-пӱдiрiг техникумында чииттернең тоғазығ иртiрген.

Анда техникумның иң артых студенттерi араласханнар. Чоохтирға кирек, Харатастағы тағ-пӱдiрiг техникумы иң чахсы ӱгредiг учреждениелернiң санына кiрче. Ирткен чылда ол тиксi Россия синiнде иң артыхтарның санында полған.

Валентин Олегович пастап техникумның наа, пӱӱнгi кӱнге килістіре нааҷылалған кабинеттерінең танысхан. Ол - сас хырыхчатхан устарны тимнепчеткен узанӌаң паза гражданскай арачыланыс кабинеттерi. Хакасия пазы оларны уғаа чахсы паалаан.

Соонаң ол техникумның иң öткiн  паза чахсы ӱгренчеткен оол-хыстарынаң чоохтасхан. Чииттер Хакасия пазына кöп сурығлар пиргеннер. Олар спортха, тоғыс рыногына, тиксi ӱгредiг системазына паза техникумның таңдағызына теелгеннер. Валентин Коновалов, пiр дее чазырбин, пiстiң регионда хайди кирек парчатханын оол-хыстарға чоохтап пирген. Паза оларға профессияны пос чӱреенең таллирға паза тöремiл ӱгренiп, чуртаста алнынзар хаалирға чöп пирген. 

Iдöк республика пазы, чииттернең чоох алысчатханда, Россия президентi Владимир Путин турғысхан кöстеглердеңер чоохтап пирген: 

- Сiрер прайзы пiлчезер, 2025 чыл Ада Чир-суубыс арачылағҷызы чылы тiп чарлал парған. Пӱӱл пiстiң республикада азығ айында СВО ветераннарына паза чааӌыларына устағӌылар кадрларын тимнирiнӌе алынӌа программа тоғынып пастир. Сағам республиканың ӱгредiг учреждениелерi аны чуртасха кирерiне пiчiктер тимнепчелер. Сағынчам, ол программа кöп кiзiнің хайиин тартар. Ол "Время героев" федеральнай проектке тööй тоғынар.