Чарытхы ӱчӱн тӧлег хайди саналчатханы ӱзӱрiлген
23.01.2025
Хабарлар
Кӱрген айының 22-ҷi кӱнiнде Хакасия пазының орынҷызы Юрий Курлаев республиканың ЖКХ министерствозы, тарифтернi хайығда тутчаң хазна комитедi, «Абаканэнергосбыт» ООО паза «Хакасэнерго» пӧлии устағҷыларынаң чыылығ иртiрген, хайзында тураларын чарытхынаң тузаланып, чылытчатхан чуртағҷыларға чарытхы ӱчӱн тӧлегнi саназа, аның хоратхан синiн санға аларынаңар чоох парған.
- Чарылған тарифнең тузаланар сурығ – ол сидiк паза кӧп оңдайлығ пӧгiн, хайзын ситкiп пӧгерге кирек. Аннаңар пу сурығ хайығ тартчатханнарның прайзын пiр стол кистiнзер чыып алдыбыс. Тӧлеглер закон хоостыра саналарынаң пасха, iдӧк сынны кӧзiткенi пiске танығлығ полча. Пiс полған на чуртағҷаа сынны читiр пирерге кӱстенчебiс.
2025 чылның кӱрген айының пастағы кӱнiне чылығ пирҷең туста чарытхынаң тураны чылытса, пастағы льготалығ син айда 7020 киловаттха тиңнелче паза чуртты чарытхынаң чылытпинчатса – 3900 киловаттха. Iкiнҷi син айда 10800 киловаттха тиңнелче, чуртты чарытхы полызиинаң чылытса паза 6000 киловаттха, чарытхынаң чылытпинчатса. Аннаң кӧп хорадылған чарытхы «коммерческай» синге саналар.
Чарытхы айда 3900 киловаттаң кӧп хорап парза, чарытхы читiрҷең организациязар ЕГРН-наң чуртха искiрiг, льгота синiн ӧскiрерiне, чуртта чарытхынаң чылыдар установка парынаңар пiчiк (техническай паспорт, техническай план, техническай сан пирiс, УТИ-даң пiчiк) ағыл килерге кирек. Кирексiнiс полза, специалисттер чорыхтығ сыныхтағ иртiрiбiзерлер.
Потребительлер кирек пiчiктернi ағылбазалар, чарытхы ӱчӱн тӧлег кӱрген айынаң саналза, айда 3900 киловатт син тузаланылар. Азығ айының 25-ҷi кӱнiне теере адалған пiчіктер кiрзе, чарытхыны читірчеткен организация чарытхы ӱчӱн тӧлегнi хатап санабызар, - пас салған Юрий Курлаев Telegram-каналында.
АтомЭнергоСбытсар пiчiктернi компанияның офизiнзер посха ағыл килерге алай АтомЭнергоСбыт мобильнай приложение, алай личнай кабинет пастыра пiчіктернiң электроннай хобырғанын онлайн сервис пастыра ыс пирерге чарир. Тариф синi паза чарытхы ӱчӱн тӧлег хайди саналчатханы хоостыра сурығларҷа контакт-кiннiң пу телефон номерiне сығдырадарға: 8(3902) 24-84-64.
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
