Тӧрт тоғазығ, пір чиңіс
22.01.2025
Хабарлар

«Саяны» команда «Мурманнаң» чиңіс ӱчӱн харбасча
Меспектіг хоккей. Кӱрген айда «Саяны» тӧрт матч иртiрібіскен. Мурмансктаң оолларыбыс чиңіснең айланғаннар
Хакасияның хоккей ӧмезі, пасха регионнарзар чорыхха сығып, уйан ойнапча. Кӧзідімге, пылтыр 23 улуғ хырласта «Саяны» команда «Кузбассха» 3:15 саннаң утыр салған, ӱс кӱн пазынаң «Енисейге» – 2:11 саннаң. 2025 чылның пастағы тоғазығларын хоккеисттерібіс ідӧк «ыырҷыларның» чазыларында иртіргеннер. Че унада саптырар орнына «Саяны» пик хылиин паза пӧзік узын кӧзіткен. Анзынаңар алғыда.
9 кӱргенде Хакасияның командазы пуста «Ак Барс-Динамо» ӧменең тоғасхан. Ол «валидоллығ» матч полған. Пу ойыннаңар чоохтар амға теере тоозылбинчалар. Санны асханнар пістіңнер. Михаил Лисюк Сергей Дёминнің полызиинаң 12-ҷі минутада «ыырҷының» хаалхазынзар меспекті кире сабысхан. Ӧрінізібіс ӱр полбады. Тӱрчедең хазандағылар нандыр пиргеннер. Сан – 1:1. Кӧрігҷілернің чӱрее талбырапча. 21-ҷі минутада «Ак Барс-Динамо» ікінҷі меспегін позының адына пас салған. «Саяны» пос салынминча. Денис Петров санны тиңнестірібісті. Че пастағы тайм 2:3 саннаң тоозылған. «Саяны» утырча.
Ойынның ікінҷі чардығы олох оңдайҷа парған тирге чарир. «Саяны» меспекті кире сабысча, «Ак Барс-Динамо» нандыр пирче. Салтарында тоғазығ 4:5 саннаң тоозылған. Пастағы кӧріске хазандағыларға оң полған. Че специалисттернің таниинаң, «Ак Барс-Динамоға» чарғыҷылар «полыс пиргеннер». Ноғадаңар? 76-ҷы минутада Руслан Гавричков «ыырҷының» хаалхазынзар меспекті кире сабысхан. Чарғыҷылар, тізең, голны санға албааннар. «ВКонтакте» социальнай сетьте «Бенди+» ӧме пар. Ол меспектіг хоккейге чарыдылған. «Ак Барс-Динамо» ӱчӱн «ағырчатхан» кӧрігҷілер, сағыстарынаң ӱлезіп, пу чиңіс ӱчӱн оларға уйадыстығ тіп пасханнар.
12 кӱргенде ойын Первоуральскта ирткен. «Уральский трубниктің» устағ-пастаан махтирға кирек. Пылтыр ла команда 14 ӧменің аразында халғанҷы орында полған, амғы сезонда иң кӱстіг клубтарға маң пирбинче. Первоуральсктағы ӧме пӱӱл плей-оффсар иртіп аларға пӧгінчеттір. Хысхаҷахти чоохтаза, хакасиядағылар 1:6 саннаң утыр салғаннар. Итсе, «Саяны» чахсы арачыланған сылтаанда «ыырҷы» пастағы таймда пістің хаалхазар пір ле меспек кире саап полған. Тоғазығның ікінҷі чардығында хоккеисттерібіс ойын тоозылғанҷа удурласханнар. Алында специалисттер «Саяныдаңар» пасчаңнар: «Команда чорыхтарда улуғ cаннаң утырча». Амды оларның кӧрізі алыс парған. Тоғазығ соонда хығырарға киліскен: «Уральский трубник» Хакасиядағы ӧмені чадап утып алды».
«Саянының» сын кӧрігҷізі нименең пасхалалча? Аның чӱреенде командаа киртініс пір дее сообинча. 15 кӱргенде «ағырчатхан» улустың сағынған сағызы толған. Пістіңнер Мурманскта пустығ чазының ээзін чиңіп алғаннар. Пастағы туста ойын Хазан городта чіли парған. «Саяны» санны асхан, «Мурман» нандыр пирген. Че 19-ҷы минутадаң пасти оолларыбыс соон сӱрістіре хоза пис меспек кире сабысханнар. Хысхаҷах тус аразына сан 6:1 пол парған. Кӧрігҷілернің ӧрінізі пу чир полбаан. «Мурман» ағбандағыларға чит полбаан. Ойын 7:3 саннаң тоозылған. Ӱc меспектің авторы – Сергей Дёмин, ікізінің – Денис Петров.
18 кӱргенде «Саяны» «Водник» ӧменең тоғазығ иртірген. Архангельсктегі клубтың пӱӱл пайрамнығ чыл полтыр, «Водникке» 100 чыл тол парған. Сынны чоохтаза, «ыырҷы» пістіңнерні пуста чабыра пазыбысхан. Сан – 0:8. Олох кӱн утырыс пілбинчеткен «Кузбасс» Хабаровскта «СКА-Нефтяникнең» ойнаан. Ээлер кемеровтағыларны 4:3 cаннаң утып алғаннар. Анзы кӧбізін чапсытхан.
Килчеткен неделяда Хакасияның ӧмезі теестегі ибдегі ойыннарын иртірер. 30 кӱргенде чир-суғҷыларыбыс «Сибсельмашнаң» (Новосибирск) тоғазар, 5 азығда – «Динамонаң» (Москва), 8 азығда – «Родинанаң» (Киров), 11 азығда – «Кузбасснаң» (Кемеров), 14 азығда – «Енисейнең» (Хызылчар). Неделя ортызында ойыннар 19.00 часта пасталчалар, тынағ кӱннерінде – 13.00 часта. Прайзын «Саяны» ӱчӱн «ағырарға» хығырчабыс.
Сом «Мурман» хоккей клубыни
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде