Абазадағы ТКО полигонының сидіксінізі пӧгілер
22.01.2025
Хабарлар
Тоғазығ тузында
Cӧп-сап сурии. Хакасияның Ӧӧркі Чӧп кнезі Сергей Сокол, Москвада полып, Россияның чир-чайаан ис-пайы паза экология министрінің орынҷызы Дмитрий Тетенькиннең тоғазығ иртірген
Тоғазығда республикадағы экология сурығлары паза сӧп-сап сферазындағы сидіксіністерні пӧгері ӱзӱрілген. Федеральнай ведомство иртірген мониторингтің салтарларынҷа Хакасия ТКО-наң тоғынҷаң инфраструктуразы ас полчатхан субъекттер санына кірче. Ол санда контейнерлері ас полғанынҷа. Дефицит 37 проценттең асча.
«Россияның чир-чайаан ис-пайы паза экология министерствозын Хакасияда ТКО киреенҷе тоғыс уйан парчатханы сағыссыратча. Республикада чол карталары тимнелген паза правительство синінде чарадыға алылған. Че федеральнай кӧзідіглер хоостыра оларҷа тоғыс уғаа майың апарылча. Дмитрий Тетенькиннең субъект кӧр салған планнарны чуртасха кирерінҷе искіріглернең онлайн режимде ӱлес турарға чӧптес салғабыс. Піс президенттің ТБО айланызы сферазындағы чахиин – 2030 чылға теере хатығ коммунальнай сӧп-сапты таллирын 100 процентке читірері паза оларның чарымынаң ас нимес чардығын чир алтынзар чыырын – толдырбасха оңдай пирбеспіс», – тоғазығның салтарларынҷа сағыс-кӧрізінең ӱлескен Сергей Сокол.
Таныхтирға кирек, 2023 чылның улуғ хырлас айында Ӧӧркі Чӧп депутаттарының пастаа хоостыра «Аэросити-2000» компания ікі территориальнай зонада (Ағбан, Харатас, Сорығ, Ағбан пилтірі аймаа, Боград паза Алтай аймахтарының чардығы, ідӧк Абаза паза Таштып аймаа) региондағы оператор статузын чідір салған. 2024 чылның чарыс айының 1-ғы кӱнінең сығара ол чирлерде сӧп-сапты сығара тартар паза утилизация идер тоғысты «Экопарк» АО апар сыххан, аның тӧстегҷізі Хакас Республика Правительствозы полча.
Республиканың пістің региондағы операторға наа техника аларына федеральнай хабазығнаң тузаланҷаң оңдайы пар. Часхызын лизингке субсидия пирҷең программа тоғын сығар. Регионнарның техника аларына хоратхан ахчазының чардығын Россия бюджеді айландыр турар.
Тоғазығда ідӧк Абазада ТКО полигоны чабылғанынаң палғалыстығ cидіксініcтер ӱзӱрілген. Ол объектке хазнаның экология экспертизазы оңнығ паалағ пиргенінің тузы ирт парған, закон хоостыра амды аннаң тузаланарға чарабас.
«Абазадағы ТКО полигонына теелзе, ирткен чыл тоозылчатханда, хаҷан піс муниципалитет пазы Валентина Филимонованаң хада тахтаны нааҷылирынҷа тоғыстар хайди парчатханын сыныхтаабыс паза нааҷылағ тоғыстары тузында тӧстелчеткен сӧп-сапты хайдар апарар cурығны ӱзӱргебіс, мин ол сурығны федеральнай синде кӧдірерге молҷаам. Министр орынҷызынаң Россияның чир-чайаан ис-пайы паза экология министерствозы ол сурығны ситкіп ӱзӱрібізер тіп чӧптес салғабыс. Дмитрий Дмитриевичке аның ӱчӱн алғыс. Сурығны пӧкчең оңдай чапчаң табылған. Прай хаалағлар итчең чӧптер Хакас Республиканың чир-чайаан ис-пайы паза экология министерствозына читірілген. Ол тоғыс кӧріндіре поларына паза бюджетті ӱзӱрлиріне Ӧӧркі Чӧптің экологияҷа эксперт чӧбіне паза профильліг комитедіне ол чарадығ хайди толдырылчатханын сыныхтағда тударға чӧп пирілер», – ол кирек хоостыра сағыс-кӧрізін читірген Сергей Сокол.
Хоза чоохтирбыс, Россияның правительство кнезінің орынҷызы Дмитрий Патрушевтің чахиинҷа Хакасияда чыылығ иртер, ол чыылығ сӧп-сап суриина чарыдылар.
Сом Хакасияның Ӧӧркі Чӧбінің официальнай сайтынаң
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
