Анатолий Серышев аалларның тилізін паалаан
21.01.2025
Хабарлар
Россия президентiнiң Сибирьдегі федеральнай округтың полномочиелiг кiзiзi Анатолий Серышев Новосибирск облазындағы Маслянино муниципальнай округында тоғыс чорығынаң пол килген.
Ол, социальнай паза турист объекттерiн кӧрiп, ааллар тилiзiнiң чахсы опыттарынаң танысхан.
Маслянино округ национальнай проекттернi паза хазна программаларны чуртасха кирерiнде ӧткiн араласча. Округ пазы Вячеслав Ярмановтың чооғынаң, пис чыл аразына социальнай, инженер, транспорт инфраструктура тилiзiне 5 миллиард азыра салковай позыдылған, ол санда «Аалларның тиксi тилiзi» хазна программазынҷа 1 миллиард азыра салковай тартылған. Пу ахчаа ӱгредiг, культура, спорт киреендегi социальнай объекттер тыхталғаннар паза пӱдiрiлгеннер.
Анатолий Серышев биатлон комплекстiг саналығ чылҷаң чолның тоғызын кӧрiп алған. Новосибирск облазында биатлон паза саналығ чылҷаң спорт кӧрiмi тилiзiнҷе аалдағы чирлерде орныхчатхан пу чалғыс орын полча. Спорт комплексiнде чыл ибiре тренировка иртер паза марығлар иртiрер оңдайлар тӧстелген. Маслянинодағы 3 № ортымах школа тиксi тыхтал парған. Анатолий Серышев школаның актовай паза спорт залларын кӧрiп алған, спорт школазы ӱгренҷiлерiнең хада волейболҷа марығда араласхан.
Анатолий Серышев «ЭкоНива» компаниялар ӧмезiнiң президентi Штефан Дюррнаң сӱт ас-тамаан сығарҷаң завод пӱдiриинеңер чоохтасхан. Кӱнде 1,1 муң тонна сӱттең ас-тамах сығарар завод тоғын сыхса, 500 кiзее тоғыс пирiлер. Анда сӱт, ачытхан сӱттең ас-тамахтаң пасха, iдӧк чылда 35,2 муң тонна аймах сырлар сығарылар. Ас-тамахтың чардығы экспортха сығарылар.
Халғанҷы чылларда аймахта турист кирее чахсы тилiпче. 2024 чылда муниципальнай округта 41 муң турист пол килген. Пiр чыл аразына туристтер саны 65 % ӧс парған. Президенттiң полномочиелiг кiзiзi Чупино аалда «Туризм паза аалҷыларны удурлир индустрия» нацпроект хоостыра пӱдiрiлчеткен «Форест Кэмп» ООО-ның курорт-отельінде пол килген. 40 гектар чирде 51 модульлығ тура, ресторан, мылча, палыхтаҷаң паза сомҷаң кӧл полар. Пӱӱнгi кӱнге анда 20 тура пӱдiрiл парған. Амды тураларның iстi иптелче, ресторан, мылчалар пӱдiрiлчелер, ибiркi чирлер иптелчелер. 2025 чылда курорт-отель тимге сығарыларға кирек.
Анатолий Серышев Маслянино тоғысчы посёлоктың чирлерiнде орныхчатхан «На озере» экоотель пӱдiриин кӧрiп алған. Анда 40 тураҷах, ресторан, спа-мылча, спортнаң айғазар орын полар. Пӱӱл экоотельде пастағы туристтер тынанып аларлар, 2026 чылда объекттiң iкiнҷi чардығы тимде полар.
Президенттiң полномочиелiг кiзiзi «Цивилизация» олған лагерьiнде пол килген. Пу лагерь «Новосибирск облазында социальнай хабазығ» хазна программазынҷа «Хомутина» экопарктың чирiнде Россия президентi чахиинҷа пӱдiрiлген. Анда 8 орыннығ 24 тура, 2 санитар орыны, чуунынҷаң iкi орын пӱдiрiл парған, спорт тирiглерi алылған, суғ паза чарытхы системалары тӧстелгеннер, автомобиль чолы пӱдiрiлген.
Анатолий Серышевтiң таниинаң, Россия Федерациязының президентi Владимир Путин аалларның тилiзiне, аал чуртағҷыларның чуртас синiн чахсыландырарына улуғ хайығ салча. Наа национальнай проекттер паза хазна программалары полызиинаң ол пӧгiннер толдырарға полысчалар.
- Ол оңдайларнаң тузаланып, орыннарны тилiдерге кирек. Аның ӱчӱн регион ӱлгӱлерi, орындағы пос устаныс органнары, пос кирее, орындағы чуртағҷылар хада-пірге тоғынарға киректер, - таныхтаан Анатолий Серышев.
Сом Россия президентінің СФО-дағы полпредінің официальнай сайтынаң
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
