Матыр ағаларыңнаңар пазыңар!
15.01.2025
Хабарлар

Марығ. «Хакас чирі» республика газетазының редакциязы, Илбек Чиңістің 80 чыл пайрамына паза Россиядағы Ада чир-суубыс арачылағҷызы чылына чарыдып, хығырығҷылар аразында «Минің матыр ағам» чоохтар мариин чарлапча
2025 чыл – нацизмнең кӱрезіге танығлығ чыл. Совет чоны Илбек Ада чаада чиңеннең пеер пӱӱл 80 чыл толча. Пістің республикабыстың Илбек Чиңіске хозымы улуғ. Нинҷе чир-суғҷыбыс амыр, ынағ чуртас ӱчӱн, пос чуртазына айабин, нацизмнең тоғыр махачы чааласхан. Олох туста тылда фронтха хабазарға прай кӱс салылған. Саарбах тузынаң пасти олғаннар иң аар тоғыстарны толдырҷаңнар, улуғ частығлар пар-чох кӱстерінең істенҷі чонға полыс турғаннар. Ана ол матыр улустаңар, пос аға-ууҷаларыңнаңар чоохтарны «Минің матыр ағам» марыға сағыпчабыс.
Марығ оңдайлары:
– чоохтың ӧӧн матыры Илбек Ада чаа араласчызы алай тыл істенҷізі ползын;
– чоох хакас тілінең пазылзын;
– чоохха хоза ӧӧн матырның, чааҷының пічіктерін, сомнарын паза хоостарын ызарға;
– постаңар искірігні пирерге: толдыра ады-солаңар, хайда ӱгренчеткенін алай тоғынчатханын паза телефон номерін;
– пазылған чоохты редакция адына «Марыға» танығлығ пу адрестерҷе ызарға алай посха ағыл турарға: 655017, Хакас Республика, Ағбан г., Щетинкин ор., 34 алай электроннай почта адрезіне ызарға: stranahaіar@maіl.rғ.
Чуртағҷылар, марығ оңдайларына тудынып, анда пос кӧңнінең паза пос алынҷа араласчалар. Марығда алты частығдаң сығара аралазарға чарир. Тоғыстар редакция адына кірген хоостыра сығарыл турарлар.
Марығда ӱс номинация кӧрілче: «Ӱгренҷінің иң артых тоғызы», «Студенттің иң артых тоғызы» паза «Улуғларның иң артых тоғызы». Чоохтарны паалапчатса, аның марыға килісчеткені, хоости пазылғаны, пазылған сині (араласчының чазына килізерге кирек) паза оңдайы санға алылар. Андағ оңдайнаң полған на номинацияда ӱс сыйыхтығ орын пирілер. Тоғыстар 2025 чылның 15 улуғ хырлазына теере алылчалар. 2025 чылның 26 улуғ хырлазына теере салтарлар иділер паза сыйыхтар читірілер.
Сурығларҷа сығдырадарға пу номерҷе: 8 (3902) 22-85-64 (Наталья Сюптерекова).
Автор :
«Хакас чирі» газетаның редакциязы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде