Чиңісчілерні алғыстапчабыс!
15.01.2025
Хабарлар

Пастағы орынға турысхан араласчылар Алиса Боргоякованаң Татьяна Тюмерекова-Кызласова
«Сӧбіре чылында – сӧбіре сомы». «Хакас чирі» республика газетазы 2024 чылда, Сӧбіре чылында, сомнар мариин чарлаан. 27 улуғ хырласта марығ чиңіcчілеріне паза араласчыларына сыйыхтар читірілген
Сӧбіре – ол кізінің ӧӧн ӧзені. Кізі поларға пісті іҷе-пабабыс, аға-ууҷаларыбыс ӱгретчелер, соонаң піс позыбыс пала-пархаларыбысты чуртассар, чон аразынзар кирчебіс. Кибірліг сӧбірені, кӧп пала ӧскірерін, улуғ сӧбіренің кибір-чозахтарын хайраллап халары – хазнабыстың ӧӧн пӧгіннерінің пірcі. Сӧбіре хайызығларының улуғ киречізі – сом. Пӱӱнгі наа технологиялар тузында сомның тузазы кӧместең соона чылдырылза даа, сомнар піске пурунғыларыбысты ундударға пирбинчелер. Пу сағыстарға тӧстеніп, «Сӧбіре чылында – сӧбіре сомы» сомнар мариин иртірер пастағнаң газетабыстың ӧӧн редакторы Радион Дмитриевич Сунчугашев сыххан.
Пастап хығырығҷылар марығда аралазарға тың на маңзырабааннар. Че, кибірли, марығ тузы тоозыларына нинҷе-де тоғыс кірген. Тиксі тоғыс араласчы пол парған. Араласчылар уғаа чапсых сомнар ысханнар, оларда кем суурылғанын чарыда пасханнар. Сомнар аразында иргі сомнар хайығ тартханнар. Оларда олаңай ла сӧбірелер суурылбааннар, чоныбыстың кибірліг кип-азаа, узанызы кӧзіділген.

Ікінҷі орынға турысхан Любовь Миндибековаа сыйых читірілген
Марығ оңдайларынҷа араласчаа сӧбіренің нинҷе-де тӧлі суурылған пір сомны ызарға киректелген. Че иргі паза амғы сомнарны алынҷа паалиры кӧрілбеен. Аннаңар чарғыҷылар ӧмезі сомнарны ікі чарарға паза полған на сыйыхтығ орында ікілер араласчыны таныхтирға чаратхан. Іди иргі сомнарны ысханнар Асхыстағы олғаннарның хоза ӱгредіг кінінің ӱгретчізі Татьяна Кискидосова, Казанов аалның тынағдағы чуртағҷызы Людмила Кызласова, Ӱс чулдағы ортымах школаның хакас тілі паза литература ӱгретчізі Татьяна Тюмерекова-Кызласова паза А.М.Топановтың адынаң Хакас национальнай драма театрының артизі Кирилл Султреков, амғы сомнарны – Ӱс чулдағы ортымах школаның директоры Алиса Боргоякова, Асхыс аалның тынағдағы чуртағҷызы Анна Сунчугашева паза Калининдегі ортымах школаның пасталығ класстар ӱгретчізі Любовь Миндибекова, Пыдырахтағы ортымах школаның «Кӱніҷек» школа алнындағы ӧменің ӱгренҷілері Софья Боргоякова паза Валерия Сульберекова. Оларның сомнарын паза пасханнарын тиксі паалап, чарғыҷылар ӧмезі мындағ салтарларға килген: пастағы орынны Татьяна Тюмерекова-Кызласованың паза Алиса Боргоякованың тоғыстарына пирерге, ікінҷі орынны – Кирилл Султрековнаң Любовь Миндибекованың, ӱзінҷі орынны – Татьяна Кискидосованаң Анна Сунчугашеваның.

Татьяна Кискидосова (сол саринаң), Людмила Кызласова, Анна Сунчугашева
Полған на чиңісчее кӧрілген орынның дипломы, «90 чыл чоннаң хада» кинде, «Ноға-ноғаҷахтар» журнал паза 2025 чылның пастағы чарым чылына пазыныс сыйлалған. Ідӧк 1-ғы паза 2-ҷі орыннар чиңісчілеріне «Хакас чирі» республика газетазының таңмазы таныхталған кружкалар сыйлалған. Араласчылар ідӧк пу сыйыхтарнаң таныхтатханнар паза оларға араласчы дипломнары читірілген. Аннаң пасха, редакция олғаннарны марығда араластырған ӱчӱн Пыдырахтағы ортымах школаның «Кӱніҷек» школа алнындағы ӧмезінің воспитательі Галина Мурусуповаа 2025 чылның 1 чарым чылына пазынысты паза «Ноға-ноғаҷахтар» журналның 20 азыра экземплярын читірген.
Чоохтирға кирек, газета редакциязы марығ араласчыларын Ағбанзар хығыртпинча, позы сыйыхтарны читір пирче. Ол кӧстегнең 27 улуғ хырласта чорыхха ӧӧн редактор орынҷызы Наталья Сюптерекова ызылған. Асхыс паза Казанов ааллардағыларны піс М.Е.Кильчичаковтың адынаң Асхыс аймааның ӧӧн библиотеказының хығырығҷылар залында чығабыс. Орын пирген ӱчӱн библиотекаа паза аның устағҷызы Наталья Асочаковаа алынҷа алғызыбысты читірчебіс. Марығ араласчылары, Татьяна Кискидосова, Анна Сунчугашева паза Людмила Кызласова, пу танығлығ кирекке сигедектер кис килтірлер. Татьяна Авдеевна, тізең, ідӧк пай поғозын кизіп алтыр паза хыл пладын тартын килтір. Анаң піс Калининдегі ортымах школада Любовь Миндибекованы алғыстаабыс. Пастағы орынға турысхан чиңісчілер – Татьяна Тюмерекованаң Алиса Боргоякова – сыйыхтарын істенчеткен Ӱс чулдағы ортымах школада алғаннар. Пыдырахтағыларға сыйыхтарны Таштып аймаандағы хабарҷыбыс Тарина Бутонаева читір пирген. Паза пір чиңісчі Кирилл Султреков сыйиин редакцияда ӧӧн редактор Радион Сунчугашевтің холынаң алған.

Ікінҷі орынға турысхан Кирилл Султреков
Прай араласчыларға сомнар мариинда араласхан ӱчӱн алынҷа алғызыбысты читірчебіс. «Хакас чирі» республика газетазы чыл сай пірее марығ иртірерге кӱстенче. Кем-де оларда сыбыра аралас турча, че полған на сай пірее наа хығырығҷы хозыл ла турадыр.
Паза пір чахсы кирек. Газета ӧмезі 2025 чылда, Россияда Ада чир-суубыс арачылағҷызы чылында, «Минің матыр ағам» чоохтар мариин чарлирға чарат салған!
Сомнар Илона Каковани паза авторни
Автор :
Наталья Сюптерекова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде