Хада-пірге тоғынғаны салтарға ағылча
10.01.2025
Хабарлар
«Беркут» кінде ікі наа корпусты азарында пастыхтар араласханнар
Нацпроект. Алтай аймаандағы Новороссийскай аалда наа Культура туразы паза «Беркут» кінде наа корпустар азылғаннар
Аның алындағы клуб 2007 чылда чуртасха хорғыс ағылчатхан пӱдіріг тіп санал сыххан. Амғы тусха теере аның тоғынҷыларына столовай полған пӱдірігде істенерге киліскен. Хакасия пазы Валентин Коновалов чайаачы тураның ӧмезіне аар туста, хол тӱзірбин, аалда культура мероприятиелерін иртірген ӱчӱн алғызын читірген.
Наа Культура туразын ирткен чылда часхызын «Культура» нацпроектче пӱдіріп пастааннар. Аның пӱдіриине федеральнай, республика паза орындағы бюджеттердең 65 миллион азыра салковай хорадылған.
Кірпистең пӱдірілген ікі хадыллығ учреждениенің улии – 1320 квадраттығ метр. Анда кӧрігҷілерге улуғ зал, кружоктар апарҷаң кабинеттер, кип-азах ілдірҷең орын, библиотека паза даа пасха культура учреждениезіне киректелчеткен орыннар пар. Киректелчеткен мебель, оборудование паза сценаа сыхчаң кип-азах алылған.
– Пу истіг Культура туразы артисттерні кӧп ӧскірзін, оларның чайаачызын ассын. Ідӧк ол орындағы чуртағҷыларның тоғасчаң орны ползын. Пу проектте араласханнарға прайзына алғызым читірчем, – чоохтаан Хакасия пазы Валентин Олегович.
Таныхтирға кирек, 2019 чылдаң пасти Хакасияда сигіс Культура туразы, 40 азыра клуб, 15 искусство школазы тыхталған, 11 модельнай библиотека азылған.
Ідӧк Наа чыл алнында Хакасия пазы Валентин Коновалов «Беркут» кӧп тузалығ кінде табырах пӱдірілчеткен ікі корпус азыбысхан. Олар Россияның Федерация Чӧбінің хабазиинаң «Ӱгредіг тилізі» хазна программазы хоостыра пӱдірілгеннер. Ағаа 79 миллион азыра салковай хорадылған.
Пӱдірігҷілер тоғыстарны пӱӱл кӱскӱзін пастааннар. Корпустарның улии – 450 квадраттығ метр. Ол 52 кізее кӧріл парған. Модульларда чыл ибіре тынанарға паза олғаннарның хазиин пиктирге чарир. Оларзар прай коммуникациялар тартылғаннар, мебель турғызылған паза даа пасха оборудование пар. Пу чағында анда пастағы патриот сменазы азылар тіп кӧрілче.
Республика пазы пу орын тиктең нимес таллағ ирт парыбысханын таныхтаан. «Беркутты» Хакасияда ла нимес, пасха даа регионнарда саарбахтарнаң патриот тоғызы апарылчатханы хоостыра чахсы пілчелер. Анда чыл сай чииттерге спортнаң, туризмнең паза ӱгредігнең палғалыстығ мероприятиелер иртірілчелер.
– Хакасия правительствозының федеральнай кіннең тӧреміл тоғызы паза Алтай аймааның устағ-пастааның ӧткіні сылтаанда, піске чыл ибіре тоғынчатхан корпустарны пӱдірерге оңдай полған. Улуғ алғызым читірчем Федерация Чӧбінің кнезі Валентина Матвиенкоға, орынҷызы Инна Святенкоға паза Хакасиядаң сенатор Олег Земцовха пу проектке хабасхан ӱчӱн. Ізенчем, хада-пірге піс регионны аннаң андар тилідербіс, – таныхтаан чооғында Валентин Коновалов.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
