Спорт чылының ӧріністері паза ачырғастары
10.01.2025
Хабарлар

Спорт министрі Сергей Кочан паза Юлия Токмашова
Салтарлар. Ирткен чылда спорт сферазында танығлығ киректер кӧп полған
Ӧӧн матыр
Хакасияның спортына 2024 чыл хайди ирткен? Кӧп ниме сағысха кирерге чарир. Чир-суғҷыларыбыс, сыйыхтығ орыннарға сығып, чидіглерінең ӧріндіргеннер. Республикада спорт пӱдіріглерінің саны хозылча. Тылаастаң сыхпинчатхан «Дельфин» бассейн дее тимге сых парир. Піреезіне 2024 чыл хырыс-табыстарнаң танығлығ. Анзы полғанох. Че чылның сын матырына Наталья Малышеваны санирға кирек. Кӱресчінің адынаң иң улуғ ӧріністер паза ачырғастар палғалыстығ.
Олимп ойыннары – полған на спортсменнің сағынған сағызы. Анда аралазарға пӧгініп, пик хуйахтығлар тренировкаларнаң паза марығларнаң на чуртапчалар тирге чарир. Хакастардаң олимп пьедесталына Сергей Карамчаков ла сыххан. Итсе, ол Хызылчардағы спорт школазының кӱреcчізіне саналча. 2012 чылның хола призеры Любовь Волосова, Карамчаков чіли, мында харбазарға пастаан, че улуғ чиңістерге аны Улан-Удэде читіргеннер. Хакасиядаң сығара тилекейнің иң улуғ мариина Леонид Чучунов (олаңай кӱрес) 2000 чылда парған, 2004 чылда Афинызар марафонец Дмитрий Бурмакин чӧрген. Чибіргі чыл пазынаң олимп лицензиязын Наталья Малышева утча.
Хайди піс аның ӱчӱн ӧрінгебіс. Наташа 4-ҷі класстаң сығара кӱреснең айғасча. 19 частығда чоннар аразындағы класстығ спорт узы нормативін толдырыбысхан. Ол 2016 чылдох Олимп ойыннарында кӱс сынир тіп ізенгеннер. Малышева сағынған сағызын ундубаан. Хакас абахай пала таап алған соонда кибіссер айланған. Лицензия холында. Прай Хакасия «ағырарға» тимненче. Арға-мӧрійге пір ле хаалағ халғанда, Парижсер чол чабыл парған. Андадох пілдістіг полған: спорт кӱрезінҷе Россияның cпорт федерациязының чарадии – улуғ алҷааc. Я, саба чарадығ ӱчӱн нандырған Россияның олимп комитедінің президенті Станислав Поздняков. Аны тоғызынаң сығарыбысханнар. Че тусты нандыра айландыр полбассың. Олимпиадада Россиядаң 15 ле кізі араласхан. Командаа чалғыс кӱмӱс медальны ағылғаннар теннисисттер Мирра Андрееванаң Диана Шнайдер. Специалисттернің таниинаң, хакас кӱресчінің дее сыйыхтығ орынға сығар кӱзі чидерҷік.
Тилекейнің иң улуғ мариинда аралазарға киліспеенде, Наталья Малышева пос салынмаан. Наталья Юрьевна – кӱстіг кӱресчі, чиит тренер, часкалығ іҷе. Піс ағаа поғдархапчабыс, наа чиңістер алғапчабыс.
Алынҷа таныхтирҷыхпыс Гаврил Анжигановты. Киндірліг пилтірі аалдаң cыххан ирен грек-рим кӱрезінең айғасча. 2024 чылны ол хаҷан даа ундубас, неке. Пылтыр кӱресчі Россия чемпионадында ӱзінҷі орынға сығып аларға, Тун пайрамда ниикке чӧрҷең машинаны утып аларға, вузты тоозыбызарға паза ӧнетін чаа операциязында аралазарға маңнанған. Аның арғызы Тимур Чепчигашев ідӧк чемпионатта хола медаль холға кирген паза СВО-ға парыбысхан.
Чарыс айында сыйых ит пирген Наталья Пудова. Хакас хыс, 50 килограмм кӧдірімде харбазып, тилекей первенствозында кӱмӱс медаль утхан. Тренерлер Наташа 2028 чылдағы Олимп ойыннарында аралазар тіп ухаанҷылапчалар. Сағыс толған полза, чахсы поларҷых.
Меспектіг хоккейге хынчатхан улусты «Саяны» команданың таңдағызы сағыссыратча. Суперлига хоккеисттерге наа оңдайлар асхан. Ӧмедегілер аннаң орта тузалан поларлар ба? Хакасияда меспектіг хоккей илееде кізіні піріктірчеттір. Пасха спорт кӧрімнерінде андағ ниме чоғыл. Кӧрігҷілер «Саянының» ӱчӱн турысчалар, хонҷых регионнарзар «ағырарға» пар килчелер. Аннаңар оолларыбысха пуста прай кӧңнілерін салып ойнирға кирек.
Сыйыхтас
Хакасияның физическай культуразының паза спортының министерствозы позының салтарларын 26 улуғ хырласта иткен. Кізілер пайрамнығ мероприятиее «Ағбан» гостиницаның конференц-залынзар чыылысханнар. Улуғ аалҷыларның санында полғаннар Хакасия пазы Валентин Коновалов, сенатор Олег Земцов, ӱгредіг министрі Анатолий Бутенко, юстиция паза региональнай арачыланыс министрі Валерий Духно паза пасхазы. Валентин Коновалов, чонзар айланып, чоох тутхан. Ол теен:
– Ирткен чыл Хакасияа чидіглернең танығлығ. Республиканың 125 спортсмені Россияның піріктірілген командаларынзар таллағны ирт парыбысхан. Ікі кізі чоннар аразындағы класстығ спорт узы полыбысхан, 20 артиинаң кізі – Россияның спорт узы. Прай тренерлерге паза спортсменнерге алғызымны читірчем. Сірер, пасхазына кӧзідім полып, спортха хынысты тыытчазар. 2025 чылда наа рекордтар турғызарға алғапчам. Хазых, часкалығ полыңар.
Ол кӱн спорт ведомствозы артыхтарның артығын аймах номинацияларҷа таныхтаан. «Хакасияның поғдархазы» чылның иң чахсы спортсменнеріне паза тренерлеріне кӧрілген. Олимп спорт кӧрімнерінде Наталья Малышева (ипчілер кӱрезі) паза Константин Плохотников (ниик атлетика) прайзын ас парыбысханнар. Олимп нимес спорт кӧрімнерінде Даниела Колесник (пауэрлифтинг) паза Фёдор Жибинов (гиря кӧдірері) сыйыхтаттырғаннар, паралимп спорт кӧрімнерінде – теннисисттер Инна Балахчинанаң Григорий Исаков. Тренерлердең Андрей Ромащенконы (ниик атлетика), Кирилл Жибиновты (гиря кӧдірері) паза Михаил Хоботовты (хазии уйаннарның спорты – ниик атлетика) таныхтааннар.
Чииттерге кӧрілген номинация чох полтыр. Іди дее полза, министерство Наталья Пудованы (ипчілер кӱрезі) паза Владислав Кононенконы (ниик атлетика) алынҷа таныхтабызарға чаратхан. Чиит тренерлердең махтаға сыххан Виталий Канзычаков. Халғанҷы туста Наташа Пудова аның холында узын таптапча. Кӱресчі хыстың пылтырғы чидіглерінде Виталий Леонидовичтің хозымы улуғ.
Чыл салтарларына чарыдылған пайрамда тӱзімніг тоғыныбысхан пірігістерні, учреждениелерні адааннар. Спорт министерствозының кӧрізінең, ниик атлетикаҷа федерация – прайзынаң чахсы істенчеткен пірігіс. Муниципалитеттердең Ағбан пилтірі аймаа пір ле хати нимес сыйыхтатхан. ГТО-ҷа тоғысты Шира аймаа чахсы апарчаттыр.
Кибір хоостыра пайрамнығ мероприятиенің халғанҷызында нормативтерні толдырыбысхан спортсменнерні чеестееннер. «Чоннар аразындағы класстығ спорт узы» аарластығ атты киречілепчеткен танығны алған боксер Сергей Слободян, 9 кізее «Россияның спорт узы» танығны читіргеннер. Оларның санында полғаннар Сергей Саитов (бокс), Валентин Кольчиков, Максим Тумояков, Валерия Карамчакова (спорт кӱрезі), Иван Косьянов (суғда чӱзері), Николай Карамашев (ММА), Юлия Токмашова (хол-азахнаң тудыс). Чир-суғҷыбыс Юлия Токмашова спортнаң он чыл айғас парир. 2023 чылда хакас хыс хол-азахнаң тудысча Россия чемпионадында ӱзінҷі орынға сыххан. Аның тренері – Иван Чанчиков. Ідӧк Олимп резерві училищезінің (техникумының) студенті кикбоксингте кӱзін сынапча.
Сом Илона Каковани
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде