Наа чыл ӧрiнiстер сыйлазын

31.12.2024

Хабарлар

Аарлығ хығырығҷыларыбыс, аарлығ хакас чоныбыс!

Паар-чӱреебiстең сыххан чылығ сӧстернең алғыстапчабыс сiрернi Наа чылнаң!

Радион Сунчугашев, «Хакас чирi» газетаның ӧӧн редакторы, филология наукаларының кандидады

Пу ӧрiнiстiг, чарых ӱлӱкӱнде кӧңнiңер iдӧк чарых ползын. Хыйал-чобағлар, сидiксiнiстер, iкiнҷiлестер ирткен чылда халзыннар. Наа 2025 чыл сiрерге ӧрiнiстер паза чахсы ла хабарлар ағылзын!

Амғы туста хабарлар уғаа табырах тарапчалар. Чуртасха интернет паза анзынаң палғалыстығ телефоннар пик кiр парғаннар. Аннаңар полған на кiзiнi саны-пазы чох аймах чоох-чаах паза хабарлар ибiрче. Оларның аразында тайма, чой искiрiглер ас нимес. Аннаңар прайзыбысха уғаа сизiктiг поларға кирек. Хайдағ-да обалға кiр парбас ӱчӱн, сын хабарларнаң тузаланарға кирек. Мында уғаа туза полчалар хазна СМИ-лары. Андағ сын паза туза искiрiглернi «Хакас чирi» хазна газетазында хығырарға чарир. Редакцияның ӧмезi килчеткен чылда чоныбысха кирек паза туза хабарларны, аймах искiрiглернi, хазна чарадығларын тузында тимнеп, сығарарын узарадар. Iдӧк наа чылда

Хакас Республикабыстың чуртазын прай саринаң чарыдар рубрикалар узарадыларлар: политика, экономика, аал хонии, чон чуртазы, ӱгредiг, культура, спорт паза даа пасхазы. Чонға – ӱлгӱдеңер, ӱлгее – чоннаңар! Пу ӧӧн кӧстег, хайзына пiс тудынчабыс. Прайзы удур-тӧдiр тiл алызып, истiзерге кирек. Чир-суубыстың ӧӧн ис-пайы – чоныбыс. Аннаңар газетабыстың страницаларында чир-суубысты, чоныбысты сабландырчатхан тоғысчы, чайаачы, спорт, тирiглiг кӱстер паза даа пасха матырлардаңар хығырарға чарир. Таныхтирға кирек, «Хакас чирi» чалғыс газета, хайзы хакас тiлiбiстi, кибiрлерiбiстi паза тиксi культурабысты хайраллир паза тилiдер сурығларға тӧремiл кӧп хайығ айландырча. Iдӧк ӧмебiстiң тоғынҷылары пу сурығларҷа аймах комиссияларда, чӧптерде ӧткiн тоғыс апарчалар.

Чағдапчатхан наа чыл Илбек Чиңiстiң 80 чылынаң палғалыстығ полар. Илбек Ада чаа полған на сӧбiрее теелген. Кем-де фронтта матыр чаалазып, кем-де тылда матыр iстенiп Илбек Чиңiстi чағыннатхан. Пу тема хоостыра пiс «Минiң матыр ағам» чоох мариин иртiрербiс. Iзенчебiс, кӧп хығырығҷы ӱндезер паза аралазар. Хакас чирiнiң, чоныбыстың Чиңiске илбек хозымы ундудылбасха кирек.

Iзенчебiс, килер чылда хадох поларбыс. Ӱзiлбезiн хығырығҷыларның паза газетабыстың палғалызы, улам тыыдылзын. Наа чылға газетаа пазынған улусха сыйых оңдайынаң календарь тимнебӧк салғабыс.

Наа чыл прай туған-чағыннарны пiрiктiрче. Килчеткен чыл чахсы ла киректернең, ӧрiнiснең, хыныснаң танығлығ ползын, чуртастағы чидiглерiң уламох пӧзiк ползын, сағынчатхан сағыстарың прай толзын. Хазииңар пик ползын! Ырыстығ, часкалығ полыңар! Айланзын амыр чуртас! Удурлаңар Наа чылны ынағ сӧбiренең. Часка – хаҷан прайзы ибде!!!

Алғыстастар. Хакасия чуртағҷыларын Наа 2025 чылнаң газетабыстың хығырығҷылары алғыстапчалар